గుడ్ న్యూస్.. సిలిండర్ అయిపోయిందా? టెన్షన్ వద్దు, స్విగ్గీ ఇన్‌స్టామార్ట్‌లో ఆర్డర్ చేయండి!

Swiggy Cylinder: ఇన్‌స్టంట్ డెలివరీ రంగంలో సరికొత్త విప్లవానికి తెరలేపుతూ స్విగ్గీ ఇన్‌స్టామార్ట్ సంచలన నిర్ణయం తీసుకుంది. ఇకపై కేవలం కిరాణా సామాగ్రి, కూరగాయలే కాకుండా.. నేరుగా వంటగ్యాస్ సిలిండర్లను కూడా మీ ఇంటికే డెలివరీ చేయనుంది. ఇందుకోసం ప్రముఖ ప్రభుత్వ రంగ చమురు సంస్థ హిందుస్థాన్ పెట్రోలియం కార్పొరేషన్ లిమిటెడ్ (HPCL)తో స్విగ్గీ చేతులు కలిపింది. పది నిమిషాల్లో సరుకులు అందించే ట్రెండ్‌ను మార్చేసి, ఇప్పుడు వంటింట్లో గ్యాస్ అయిపోతే వచ్చే కష్టాలను తీర్చేందుకు ఈ సరికొత్త సేవలను అందుబాటులోకి తెచ్చింది.

హెచ్‌పీ నవ్యతో సరికొత్త ప్రయాణం
ఈ భాగస్వామ్యంలో భాగంగా హెచ్‌పీసీఎల్ కొత్తగా మార్కెట్లోకి తీసుకొచ్చిన ‘హెచ్‌పీ నవ్య’ సిలిండర్లను స్విగ్గీ ఇన్‌స్టామార్ట్ సరఫరా చేయనుంది. ఇవి సంప్రదాయ స్టీల్ సిలిండర్లలా కాకుండా, అత్యాధునిక ఫైబర్ గ్లాస్ టెక్నాలజీతో రూపొందించిన కాంపోజిట్ సిలిండర్లు. ఇవి బరువు చాలా తక్కువగా ఉండటమే కాకుండా, లోపల ఎంత గ్యాస్ ఉందో బయటికే కనిపించేలా పారదర్శకంగా ఉంటాయి. ప్రస్తుతానికి 10 కిలోలు, 5 కిలోల బరువు గల వేరియంట్లలో ఈ సిలిండర్లను స్విగ్గీ ద్వారా ఆర్డర్ చేసుకోవచ్చు.

విద్యార్థులు, బ్యాచిలర్లకు వరం
ఈ సేవల వల్ల అన్నిటికంటే పెద్ద ప్లస్ పాయింట్ ఏమిటంటే.. ఎలాంటి పాత గ్యాస్ కనెక్షన్ లేదా అడ్రస్ ప్రూఫ్ పత్రాలు లేకపోయినా వీటిని సులభంగా బుక్ చేసుకోవచ్చు. నగరాలకు కొత్తగా వలస వచ్చే సాఫ్ట్‌వేర్ ఉద్యోగులకు, హాస్టళ్లు లేదా గదుల్లో అద్దెకు ఉండే విద్యార్థులకు, చిన్న కుటుంబాలకు ఇది ఒక అద్భుతమైన వరం. గ్యాస్ కనెక్షన్ కోసం ఏజెన్సీల చుట్టూ తిరిగే పనిలేకుండా, మొబైల్ ఫోన్‌లో ఒక్క క్లిక్‌తో సిలిండర్‌ను సొంతం చేసుకోవచ్చు.

తొలి విడతగా బెంగళూరులో ప్రారంభం
పైలట్ ప్రాజెక్ట్ కింద ఈ సేవలను తొలుత ఐటీ హబ్ బెంగళూరులో ప్రారంభించారు. అక్కడ లభించే స్పందన, డెలివరీ ప్రక్రియలోని సాధకబాధకాలను పరిశీలించిన తర్వాత దేశంలోని మిగిలిన ప్రధాన నగరాలకు కూడా ఈ సేవలను విస్తరించాలని స్విగ్గీ యోచిస్తోంది. కస్టమర్ల అవసరాలను గుర్తించి, టెక్నాలజీని వాడుకుంటూ నిత్యావసర సేవలను మరింత సులభతరం చేయడంలో స్విగ్గీ ఇన్‌స్టామార్ట్ వేసిన ఈ అడుగు క్విక్-కామర్స్ రంగంలో సరికొత్త బెంచ్‌మార్క్‌ను సెట్ చేయబోతోంది.

Also Read: భాగ్యనగరంలో బోనాల సంబురం.. గోల్కొండ కోటలో తొలి బోనంతో షురూ అయిన జాతర