Double Benefits: ఇకపై వృద్ధుల పేరుతో FD..అధిక వడ్డీతోపాటు రెట్టింపు లాభం

Double Benefits: ఏప్రిల్ 1న కొత్త ఆర్థిక సంవత్సరం (FY2025-26) ప్రారంభమైంది. నేటి నుంచి కొత్త రూల్స్ అమల్లోకి వచ్చాయి. ఈ సందర్భంగా సీనియర్ సిటిజన్లకు సంబంధించి ఒక గుడ్ న్యూస్ వచ్చింది. అది ఏంటంటే వడ్డీ ఆదాయంపై TDS మినహాయింపు. సీనియర్ సిటిజన్లకు TDS మినహాయింపు పరిమితి లక్ష రూపాయల వరకు పెంచారు. దీంతో, ఇప్పుడు ఫిక్స్‌డ్ డిపాజిట్, సీనియర్ సిటిజన్ సేవింగ్స్ స్కీమ్ (SCSS) వంటి పథకాలు వృద్ధులకు చాలా ప్రయోజనకరంగా మారాయి. ఇప్పుడు మీరు ఈ ఫిక్స్‌డ్ డిపాజిట్‌లో పెట్టుబడి చేయాలనుకుంటే, మీ కుటుంబంలోని పెద్దవారి పేరుతో చేయడం మంచిది. దీని వలన మీకు రెట్టింపు లాభం వచ్చే అవకాశం ఉంది.

TDS పరిమితి రూ.1,00,000కి పెంపు
కొత్త ఆర్థిక సంవత్సరం నుంచి సీనియర్ సిటిజన్లకు TDS తగ్గింపు పరిమితి రెట్టింపు చేయబడింది. ఇప్పుడు రూ. 1,00,000 వరకు ఆదాయంపై TDS తగ్గించబడదు. దీని అర్థం సీనియర్ సిటిజన్లు FD, SCSS వంటి పథకాల నుంచి వడ్డీగా రూ. 1,00,000 వరకు సంపాదిస్తే, దానిపై TDS తగ్గించబడదు. ఇప్పటివరకు ఈ పరిమితి రూ. 50,000 వరకు మాత్రమే ఉండేది.

బ్యాంకులు ఇప్పటికే ఎక్కువ వడ్డీ
చాలా మంది వృద్ధులు FDని నమ్మకమైన పెట్టుబడి మార్గంగా భావిస్తారు. పదవీ విరమణ తర్వాత వారి పొదుపుపై ఎలాంటి రిస్క్ లేకుండా తీసుకోవడానికి ఇష్టపడతారు. అందువల్ల, వారి డబ్బును సురక్షితంగా ఉంచుకోవడానికి, వారు ఫిక్స్‌డ్ డిపాజిట్లలో పెట్టుబడి పెడతారు. సీనియర్ సిటిజన్ల ఆలోచనను అర్థం చేసుకుని, బ్యాంకులు వారిని ప్రాధాన్యతా కస్టమర్ల జాబితాలో చేర్చి, సాధారణ ప్రజల కంటే FDలపై అధిక వడ్డీని అందించడం ద్వారా FDలలో ఎక్కువ డబ్బు పెట్టుబడి పెట్టమని ప్రోత్సహిస్తాయి.

రెట్టింపు ప్రయోజనం
సాధారణంగా, బ్యాంకులు సాధారణ ఫిక్స్‌డ్ డిపాజిట్లతో పోలిస్తే వివిధ కాలపరిమితి గల FDలపై సీనియర్ సిటిజన్లకు 50 బేసిస్ పాయింట్లు లేదా 0.50% ఎక్కువ వడ్డీని అందిస్తాయి. ఇది కాకుండా, కొన్ని బ్యాంకులు 80 సంవత్సరాలు లేదా అంతకంటే ఎక్కువ వయస్సు ఉన్న ‘సూపర్ సీనియర్ సిటిజన్స్’ కు 0.25% అదనపు వడ్డీని ఇస్తున్నాయి. ఇలాంటి క్రమంలో మీరు పెద్దల పేరిట FD చేయడం ద్వారా మీకు రెట్టింపు ప్రయోజనం లభిస్తుంది.

వడ్డీ ఆదాయంతోపాటు..
సీనియర్ సిటిజన్లకు TDS తగ్గింపు పరిమితి రెట్టింపు అయినప్పటికీ, సాధారణ ప్రజలకు ఈ పరిమితి ఇప్పటికీ రూ. 40,000 గానే ఉంది. ఇలాంటి పరిస్థితుల్లో, మీరు కొత్త ఆర్థిక సంవత్సరంలో మీ పేరు మీద కాకుండా మీ కుటుంబంలోని ఒక వృద్ధుడి పేరు మీద FD చేయాలి. ఆ క్రమంలో వడ్డీ ప్రయోజనాన్ని పొందడంతో పాటు, మీరు వడ్డీ నుంచి వచ్చే ఆదాయంపై కూడా మినహాయింపు ప్రయోజనాన్ని పొందుతారు.

ఉదాహరణకు
మీరు మీ సొంత పేరుతో 3 సంవత్సరాల FDలో రూ. 3,00,000 పెట్టుబడి పెట్టి, దానిపై వడ్డీ రేటు 7 శాతం పొందితే, మీరు వడ్డీ నుంచి రూ. 69,432 సంపాదిస్తారు. సాధారణ వ్యక్తులకు TDS తగ్గింపు పరిమితి రూ. 40,000 కాబట్టి, రూ. 69,432 ఆదాయంపై TDS తగ్గించబడుతుంది. మరోవైపు, మీరు అదే మొత్తాన్ని మీ కుటుంబంలోని ఒక వృద్ధుడి పేరు మీద జమ చేస్తే, మీకు 0.50% ఎక్కువ వడ్డీ లభిస్తుంది. TDS తగ్గింపు ఉండదు. ఈ సందర్భంలో, మీరు రూ. 3,00,000 పై 7.5% రేటుతో రూ. 74,915 వడ్డీని పొందుతారు. కానీ దానిపై TDS తీసివేయబడదు. FY2025-26 ప్రారంభంతో, ఫిబ్రవరి 1, 2025న బడ్జెట్‌ను సమర్పిస్తూ ఆర్థిక మంత్రి నిర్మలా సీతారామన్ చేసిన ప్రకటన నేటి నుంచి అమల్లోకి వచ్చింది.