Real Estate Interest Rates | ఈరోజు రిజర్వ్ బ్యాంక్ ఆఫ్ ఇండియా రెపో రేటును తగ్గించడంతో దేశంలోని బ్యాంకులు వడ్డీ రేట్లను తగ్గించనున్నాయి. రెపో రేటును 0.25 శాతం తగ్గించడంతో రియల్ ఎస్టేట్ రంగంలో డిమాండ్ పెరుగుతుందని రియల్టర్ల మండలి నరెడ్కో వెల్లడించింది. ‘‘రియల్టీ రంగం బలమైన వృద్ధి, సానుకూల ధోరణిని కనబరుస్తోంది. రెపో రేటును తగ్గించడం ద్వారా ఈ రంగాన్ని మరింత బలోపేతం చేయవచ్చు. 25–30 బేసిస్ పాయింట్ల మేర తగ్గించాల్సిన అవసరం ఉంది. ఇది రియల్ ఎస్టేట్ మార్కెట్‌కు ఉత్సాహాన్ని ఇచ్చి, నిర్మాణం, సిమెంట్, స్టీల్ రంగాలకు కూడా ప్రయోజనం కలిగించగలదు,’’ అని నరెడ్కో అధ్యక్షుడు జి. హరిబాబు అన్నారు.
ఆర్‌బీఐ ఎంపీసీ శుక్రవారం కీలక వడ్డీ రేట్లను తగ్గించడంతో, నరెడ్కో దీనిపై స్పందించడం గమనార్హం. ‘‘వడ్డీ రేట్ల తగ్గింపుతో టైర్-2, 3 నగరాల్లో అందుబాటు ధరల ఇళ్లకు మంచి ప్రోత్సాహం లభిస్తుంది. అలాగే, పట్టణాభివృద్ధికి, సమగ్ర వృద్ధికి ఇది మద్దతునిస్తుంది. రేట్లు తగ్గించడంతో డెవలపర్లు, ఇళ్ల కొనుగోలుదారులకు మేలు జరుగుతుంది. పెట్టుబడులు పెరుగుతాయి, లిక్విడిటీ మెరుగవుతుంది. ఫలితంగా, ప్రస్తుతం ఉన్న ప్రాజెక్టుల నిర్మాణం వేగవంతమవుతుంది, కొత్త ప్రాజెక్టులను ప్రారంభించేందుకు ఉత్సాహం పెరుగుతుంది’’ అని హరిబాబు పేర్కొన్నారు. రెపో రేటు తగ్గింపుతో అన్ని ప్రాంతాల్లో స్థిరమైన వృద్ధి సాధ్యమవుతుందని ఆయన అన్నారు.
రియల్ ఎస్టేట్ రంగానికి కలిగే ప్రయోజనాలు
వడ్డీ రేట్ల తగ్గింపుతో రియల్ ఎస్టేట్ రంగానికి ప్రయోజనం కలుగుతుందని, రుణాల ఖర్చు తగ్గుతుందని నైట్‌ఫ్రాంక్ సీఎండీ శిశిర్ బైజాల్ అభిప్రాయపడ్డారు. ‘‘రేట్లు తగ్గడంతో బ్యాంకింగ్ వ్యవస్థలో లిక్విడిటీ మెరుగుపడుతుంది. దీంతో డెవలపర్లు తక్కువ వడ్డీ రేటుకు రుణాలు పొందగలుగుతారు,’’ అని ఆయన అన్నారు. వినియోగ వృద్ధికి మద్దతుగా ఆర్థిక మంత్రి బడ్జెట్‌లో తీసుకున్న చర్యలకు తోడుగా, ఆర్‌బీఐ వడ్డీ రేట్లను తగ్గించాల్సిన అవసరం ఉందని బీసీడీ గ్రూప్ సీఎండీ అంగద్ బేడి అభిప్రాయపడ్డారు.
సొంత ఇల్లు తో లాభాలు
ప్రపంచంలో నివసించే ప్రతి ఒక్కరికీ ఒక గృహం అవసరం. మీరు నిజంగా విశ్రాంతి తీసుకోవాలంటే, ఇంటి కంటే మంచిది మరేదీ ఉండదు. అందుకే ఏ వయసులో ఉన్నా సొంత ఇల్లు కలిగి ఉండటం ఉత్తమం. ఇది భద్రతతో పాటు సౌకర్యాన్ని కూడా అందిస్తుంది.
1. అద్దె భారం ఉండదు
మీరు అద్దె ఇంటిలో ఉంటే, ప్రతి నెలా అద్దె చెల్లించాల్సిందే. కానీ సొంత ఇల్లు ఉంటే, అద్దె భారం లేకుండా మనుగడ సాగించవచ్చు. ప్రతి ఏడాది అద్దె పెరుగుతుండటంతో అద్దెకు ఉన్నవారికి ఆర్థిక ఒత్తిడి పెరుగుతోంది. అంతేకాకుండా, చాలా మంది ఇంటి యజమానులు 11 నెలల కాలానికి అగ్రిమెంట్లు చేయించుకుంటున్నారు. కానీ, సొంత ఇల్లు ఉంటే ఈ కఠిన నిబంధనలతో బాధపడాల్సిన అవసరం ఉండదు.
2. స్థిరత్వం
ప్రస్తుత కాలంలో ప్రైవేట్ ఉద్యోగాలు పెరగడంతో, ఉద్యోగుల బదిలీలు తగ్గిపోతున్నాయి. అలాగే, వర్క్ ఫ్రమ్ హోమ్ చేసే అవకాశం ఉన్నవారికి ఒకే చోట స్థిరపడటం అవసరం. ఇటువంటి వారందరికీ సొంత ఇల్లు ఎంతో ఉపయోగకరం. వ్యాపారం చేసేవారికి కూడా సొంత ఇల్లు ఒక స్థిరమైన ఆస్తిగా మిగిలిపోతుంది. అత్యవసర సమయాల్లో ఇంటిపై రుణం పొందొచ్చు. వృద్ధాప్యంలో ఇంటిని తాకట్టు పెట్టి మార్టగేజ్ లోన్ తీసుకుని అవసరాలను తీర్చుకోవచ్చు.
3. సామాజిక మరియు కుటుంబ బంధాలు
సొంత ఇంటిలో ఎక్కువ కాలం నివసించేవారు సమాజంతో బలమైన సంబంధాలు ఏర్పరుచుకుంటారు. ఒకే ప్రాంతంలో ఎక్కువ కాలం ఉండటం వల్ల ఆ పొరుగు పరిసరాలతో సత్సంబంధాలు ఏర్పడతాయి. ఇది పిల్లల విద్య మరియు వారి సామాజిక అవసరాలను తీర్చడంలో కూడా దోహదపడుతుంది. పిల్లలకు వారసత్వంగా ఇంటిని అందించేందుకు కూడా ఇది మంచి ఆప్షన్. స్థిరాస్తి విలువ పెరుగుతుండటంతో, పిల్లలకు అత్యంత విలువైన ఆస్తిగా ఇది మిగిలిపోతుంది.
4. స్వేచ్ఛ, ఆధునీకరణ
సొంత ఇంటిపై పూర్తిగా మీ నియంత్రణ ఉంటుంది. ఇంటిలో మీరు చేయాలనుకున్న మార్పులను స్వేచ్ఛగా చేసుకోవచ్చు. ఇంటిని మీ ఇష్టానుసారం ఆధునీకరించుకోవచ్చు, అదనపు హంగులతో మెరుగుపర్చుకోవచ్చు. ఇంటిని అలంకరించుకోవడం, కొత్త సౌకర్యాలను జోడించడం పూర్తిగా మీ స్వచ్ఛంద నిర్ణయంగా ఉంటుంది. అలాగే, మీ బంధువులు, స్నేహితులు రావడానికి ఎవరికి అనుమతి కోరాల్సిన అవసరం ఉండదు. ఇంటి యజమానుల నుంచి ఎదురయ్యే నిబంధనలు, ఆంక్షల నుంచి ముక్తి లభిస్తుంది.
5. స్థిరాస్తి విలువ పెరుగుతుంది
ఇన్వెస్ట్‌మెంట్ కోసం అనేక మంది స్టాక్ మార్కెట్, బ్యాంక్ డిపాజిట్లు, బంగారం వంటి మార్గాలను ఎంచుకుంటారు. అయితే, స్థిరాస్తిలో పెట్టుబడి వేయడం అత్యంత విశ్వసనీయమైనదిగా పరిగణించబడుతుంది. సొంత ఇంటి విలువ ఎప్పుడూ పెరుగుతుందే కానీ, తగ్గడం జరగదు. గతం లో 25 ఏళ్ల క్రితం తక్కువ ఆదాయంతో కూడిన ఉద్యోగులు సైతం ఇండిపెండెంట్ హౌస్‌ను నిర్మించుకుని నివసించేవారు. కానీ ప్రస్తుతం, భార్యాభర్తలు ఇద్దరూ కలిపి లక్షల్లో సంపాదించినప్పటికీ, అపార్ట్‌మెంట్‌లో చిన్న ఫ్లాట్ కొనడమే సాధ్యమవుతోంది. అది కూడా ఎక్కువ కాలపరిమితి గల బ్యాంకు రుణం తీసుకోవడం ద్వారా మాత్రమే సాధ్యమవుతోంది.
రెపో రేటు తగ్గించడంతో రియల్ ఎస్టేట్ రంగం కొత్త ఊపును సంతరించుకోనుంది. రుణాల ఖర్చు తగ్గడం, హౌసింగ్ మార్కెట్ వృద్ధిని పెంచే అవకాశాన్ని కల్పించనుంది. అలాగే, సొంత ఇల్లు కలిగి ఉండటం ద్వారా భద్రత, స్థిరత్వం, సామాజిక సంబంధాలు, ఆర్థిక ప్రయోజనాలు పొందొచ్చు. కాబట్టి, ప్రస్తుత పరిస్థితుల్లో సొంత ఇంటిని కలిగి ఉండటం ఉత్తమ నిర్ణయంగా చెప్పొచ్చు.
Share
Rahul Gandhi: అవును.. ఆ ఎన్నికల్లో అవకతవకలు, 39 లక్షల కొత్త ఓటర్లు ఎలా చేరారు?
Team India: కోహ్లీ కారణంగా అయ్యర్, జైస్వాల్‌ కెరీర్‌ నాశనం ?
