Alwal Murder Case: అల్వాల్ లో దారుణం.. సొంత తల్లిని చంపి ఇంట్లోనే పాతిపెట్టిన కూతురు, అల్లుడు

Alwal Murder Case: సాంకేతిక పరిజ్ఞానం పరుగులెడుతున్న నేటి ఆధునిక యుగంలో కూడా మానవత్వం మంటగలిసిపోతోంది. శాస్త్ర సాంకేతిక రంగాల్లో మనిషి చంద్రుడిని దాటి అంగారకుడి వైపు అడుగులు వేస్తున్నా, కొందరి ఆలోచనలు మాత్రం ఇంకా చీకటి యుగంలోనే మగ్గిపోతున్నాయి. మూఢనమ్మకాలు పెనుభూతంలా మారి సమాజాన్ని వెనక్కి నెడుతున్నాయి.హైదరాబాద్‌లోని అల్వాల్‌లో అత్యంత క్రూరమైన, నాగరిక సమాజం తలదించుకునే ఘటన వెలుగులోకి వచ్చింది. కన్నతల్లి అని కూడా చూడకుండా ఒక కూతురు, తన భర్తతో కలిసి తల్లిని హత్య చేసి.. ఆపై మృతదేహాన్ని ఇంట్లోనే పాతిపెట్టిన ఉదంతం స్థానికంగా పెను సంచలనం సృష్టించింది. దాదాపు ఏడాది కాలంగా ఈ ఘోరాన్ని అత్యంత రహస్యంగా ఉంచిన నిందితులు, చివరకు పోలీసుల విచారణలో దొరికిపోయారు.

మృతురాలు అంజు గత ఏడాది కాలంగా కనిపించకుండా పోవడంతో, ఆమె పెద్ద కుమార్తెకు అనుమానం వచ్చి పోలీసులకు ఫిర్యాదు చేసింది. అయితే, అప్పటి నుండి చిన్న కూతురు, అల్లుడు రకరకాల కట్టుకథలు చెబుతూ అందరినీ మభ్యపెడుతూ వచ్చారు. తల్లి ఎక్కడికో వెళ్ళిపోయిందని, తమకు తెలియదని నమ్మిస్తూ కాలం గడిపారు. కానీ, పెద్ద కుమార్తె పట్టుబట్టి పోలీసులపై ఒత్తిడి తేవడంతో అసలు నిజం బయటపడింది. పోలీసులు చిన్న కూతురు, అల్లుడిని అదుపులోకి తీసుకుని తమదైన శైలిలో విచారించగా, ఏడాది క్రితమే తల్లిని చంపేసి ఇంట్లోనే పాతిపెట్టి పూజలు చేసినట్లు వారు నేరాన్ని అంగీకరించారు.

ఈ దారుణానికి గల కారణాలపై పోలీసులు లోతుగా దర్యాప్తు చేస్తున్నారు. ప్రాథమిక సమాచారం ప్రకారం, చిన్న కుమార్తె ప్రేమ వ్యవహారాన్ని తల్లి అంజు వ్యతిరేకించడమే ఈ హత్యకు ప్రధాన కారణమని అనుమానిస్తున్నారు. లేదా ఆస్తి తగాదాల నేపథ్యంలో ఈ ఘాతుకానికి ఒడిగట్టారా అనే కోణంలో కూడా పోలీసులు విచారణ జరుపుతున్నారు. కన్నతల్లిని చంపి, అదే ఇంట్లో శవంతో పాటు ఏడాది కాలం పాటు నివసించడం నిందితుల వికృత మనస్తత్వానికి అద్దం పడుతోంది.

ప్రస్తుతం ఘటనా స్థలంలో పోలీసులు మృతదేహం అవశేషాలను వెలికితీసేందుకు ఏర్పాట్లు చేస్తున్నారు. ఫోరెన్సిక్ నిపుణుల సమక్షంలో తవ్వకాలు జరిపి ఆధారాలు సేకరించనున్నారు. ఈ ఘటనతో అల్వాల్ ప్రాంతవాసులు తీవ్ర దిగ్భ్రాంతికి గురయ్యారు. నిందితులపై కఠిన చర్యలు తీసుకోవాలని స్థానికులు డిమాండ్ చేస్తున్నారు.

Read Also: Araku Murder: అరకులో దారుణం.. రిసార్ట్స్‌లో వ్యక్తి దారుణ హత్య.. ఉలిక్కిపడ్డ పర్యాటక ప్రాంతం

Share

• 
• 
• 
• 
• 
•