రీల్స్ పిచ్చి.. ముగ్గురు బలి.. తుపాకీతో విన్యాసాలు చేస్తూ ట్రక్కును ఢీకొట్టిన యువత

Madhya Pradesh Mauganj bike accident: నేటి డిజిటల్ యుగంలో సోషల్ మీడియాలో లైకులు, వ్యూస్ కోసం యువత ఎంతటి సాహసానికైనా సిద్ధపడుతోంది. క్షణికమైన ఆనందం కోసం ప్రాణాలను సైతం పణంగా పెడుతూ ప్రమాదకరమైన రీల్స్చేయడం ఒక వ్యసనంలా మారిపోయింది. బైకులపై స్టంట్లు చేయడం, ఆయుధాలను చూపించ‌డం వంటి చర్యలను గొప్పతనంగా భావిస్తున్నారు. తమ కుటుంబాలకు తీరని శోకాన్ని మిగిల్చుతున్నారు. తాజాగా మధ్యప్రదేశ్‌లో జరిగిన ఒక ఘోర ప్రమాదం రీల్స్ పిచ్చి ఎంతటి ప్రమాదకరమో మరోసారి నిరూపించింది.

మధ్యప్రదేశ్‌లోని మౌగంజ్ జిల్లాలో ముగ్గురు యువకులు ఒకే పల్సర్ బైకుపై అతివేగంతో వెళ్తూ రీల్స్ తీయడం ప్రారంభించారు. కేవలం వేగమే కాకుండా, తమ వద్ద ఉన్న ఒక నాటు తుపాకీని గాలిలోకి ప్రదర్శిస్తూ సినిమా ఫక్కీలో వీడియో షూట్ చేస్తున్నారు. ఆ వీడియోను తీయడానికి వారి వెనుక మరో బైకుపై ఇద్దరు స్నేహితులు అనుసరిస్తున్నారు. అతివేగం, చేతిలో తుపాకీ.. ఈ క్రమంలో వారి దృష్టి రోడ్డుపై కంటే కెమెరాపైనే ఎక్కువగా ఉండటంతో ప్రమాదం ముంచుకొచ్చింది.

వేగంగా దూసుకుపోతున్న పల్సర్ బైకు ఒక్కసారిగా నియంత్రణ కోల్పోయింది. రోడ్డు పక్కన ఆగి ఉన్న ఒక ట్రక్కును ఆ బైకు అత్యంత బలంగా ఢీకొట్టింది. ఈ తాకిడికి బైకుపై ఉన్న ముగ్గురు యువకులు గాల్లోకి ఎగిరి కిందపడి, తీవ్ర గాయాలతో అక్కడికక్కడే ప్రాణాలు కోల్పోయారు. విషాదకరమైన విషయం ఏమిటంటే, వారిని వీడియో తీస్తున్న వెనుక బైకు కూడా అదే వేగంతో వచ్చి ట్రక్కును ఢీకొట్టింది. ఈ రెండో బైకుపై ఉన్న ఇద్దరు యువకులు తీవ్రంగా గాయపడి ప్రస్తుతం ఆసుపత్రిలో మృత్యువుతో పోరాడుతున్నారు.

సమాచారం అందుకున్న పోలీసులు ఘటనా స్థలానికి చేరుకుని మృతదేహాలను పోస్ట్‌మార్టం నిమిత్తం తరలించారు. ప్రాణాలు కోల్పోయిన యువకులు వాడిన నాటు తుపాకీని స్వాధీనం చేసుకున్నారు. రీల్స్ కోసం చట్టవిరుద్ధమైన ఆయుధాలను వాడటం, ట్రాఫిక్ నిబంధనలు ఉల్లంఘించడం వల్లే ఈ ఘోరం జరిగిందని పోలీసులు ప్రాథమికంగా నిర్ధారించారు. సోషల్ మీడియాలో గుర్తింపు కోసం ప్రాణాలను పణంగా పెట్టవద్దని యువతకు, వారి తల్లిదండ్రులకు అధికారులు విజ్ఞప్తి చేస్తున్నారు.

రీల్స్ మోజులో పడి ముగ్గురు యువకులు ప్రాణాలు కోల్పోయారు.

మధ్యప్రదేశ్‌లోని మౌగంజ్ జిల్లాలో పల్సర్ బైకుపై అతివేగంతో వెళ్తూ, నాటు తుపాకీ ప్రదర్శిస్తూ వీడియో తీస్తుండగా ఈప్రమాదం జరిగింది.

అదుపు తప్పిన బైకు ఆగి ఉన్న ట్రక్కును బలంగా ఢీకొట్టడంతో ముగ్గురు అక్కడికక్కడే మృతి చెందారు.… pic.twitter.com/qfDhX58Kq1

— ChotaNews App (@ChotaNewsApp) April 19, 2026