ఆన్‌లైన్ బెట్టింగ్ వ్యసనం.. వ్యాపారవేత్తను బలి తీసుకున్న కానిస్టేబుల్ దంపతులు

Siddipet Murder: చట్టాన్ని కాపాడాల్సిన చేతులే కిరాతకానికి ఒడిగట్టాయి. సిద్దిపేట జిల్లా సీసీఎస్ విభాగంలో కానిస్టేబుల్‌గా పనిచేస్తున్న గౌటి ప్రవీణ్, ఆన్‌లైన్ బెట్టింగుల వ్యసనానికి బానిసయ్యాడు. కేవలం ప్రవీణ్ మాత్రమే కాకుండా, అతని భార్య రజిత కూడా ఈ జూదంలో పాలుపంచుకోవడం గమనార్హం. గత రెండేళ్లుగా ఈ దంపతులు బెట్టింగుల్లో ఏకంగా రూ. 60 లక్షల వరకు నష్టపోయారు. చేసిన అప్పులు తీర్చే మార్గం కనిపించక, అడ్డదారులు తొక్కి ప్రాణాలు తీసే స్థాయికి దిగజారిపోయారు.

నమ్మించి మృత్యుపాశం బిగించిన వైనం
సిద్దిపేట పట్టణానికి చెందిన ప్రముఖ వ్యాపారవేత్త బెల్దె విశ్వనాధం (57) వద్ద ప్రవీణ్ గతంలో తన స్థలాన్ని తాకట్టు పెట్టి రూ. 12 లక్షలు అప్పుగా తీసుకున్నాడు. అయితే, గడువు ముగిసినా డబ్బు చెల్లించకపోవడంతో, ఆ స్థలాన్ని అమ్మేస్తానని విశ్వనాధం హెచ్చరించారు. దీంతో అతడిని అడ్డు తొలగించుకోవాలని పథకం వేసిన కానిస్టేబుల్ దంపతులు.. వేరే స్థలం చూపిస్తామంటూ నమ్మించి గత శనివారం మెట్టుబండల శివారులోని నిర్మానుష్య ప్రాంతానికి కారులో తీసుకెళ్లారు. అక్కడే అతని కాళ్లు, చేతులు కట్టేసి వైరుతో గొంతు బిగించి అత్యంత పాశవికంగా హతమార్చారు.

హత్య తర్వాత నగలతో పరార్
హత్య అనంతరం నిందితులు ఏమాత్రం కనికరం లేకుండా విశ్వనాధం ఒంటిపై ఉన్న 10 తులాల బంగారు ఆభరణాలను దోచుకున్నారు. సాక్ష్యాలను తారుమారు చేసేందుకు మృతదేహాన్ని ఇమాంబాద్ సమీపంలోని కాలువలో పడేశారు. అనంతరం ఏమీ ఎరగనట్టు హైదరాబాద్ వెళ్లి, దొంగిలించిన బంగారాన్ని విక్రయించి సొమ్ము చేసుకున్నారు. తమ పాపం పండదని భావించిన ఈ జంట, పోలీసుల నిఘా నుంచి తప్పించుకోలేకపోయింది.

చుట్టుముట్టిన సీసీటీవీ కెమెరాలు
భర్త కనిపించడం లేదని విశ్వనాధం భార్య ఫిర్యాదు చేయడంతో రంగంలోకి దిగిన పోలీసులు లోతైన విచారణ చేపట్టారు. పట్టణంలోని సీసీటీవీ ఫుటేజీలను పరిశీలించగా, విశ్వనాధం చివరిసారిగా కానిస్టేబుల్ ప్రవీణ్ కారులో వెళ్లినట్లు స్పష్టమైంది. దీని ఆధారంగా ప్రవీణ్‌ను అదుపులోకి తీసుకుని విచారించగా, భార్యతో కలిసి చేసిన ఈ ఘాతుకాన్ని అంగీకరించాడు. పోలీసులు మృతదేహాన్ని వెలికితీసి, నిందితులిద్దరినీ అరెస్ట్ చేశారు.

వృద్ధురాలిపై కూడా దాడి.. విస్తుపోయిన పోలీసులు
విచారణలో వెలుగు చూసిన మరో చేదు నిజం పోలీసులను ఆశ్చర్యానికి గురిచేసింది. గత నెల 25వ తేదీన తమ ఇంటి సమీపంలో ఉండే ఒక వృద్ధురాలిని ఆసుపత్రికి తీసుకెళ్తామని నమ్మించి, కారులో తీసుకెళ్లి ఆమె మెడలోని పుస్తెల తాడును కూడా ఈ దంపతులు దొంగిలించినట్లు తేలింది. అప్పుల కోసం ఎంతటి నీచానికైనా సిద్ధపడిన ఈ కిలాడీ దంపతుల తీరు ప్రస్తుతం జిల్లా వ్యాప్తంగా చర్చనీయాంశమైంది. ఆన్‌లైన్ జూదం ఒక నిండు ప్రాణాన్ని బలితీసుకోవడమే కాకుండా, ఒక ప్రభుత్వ ఉద్యోగి కుటుంబాన్ని జైలు పాలు చేసింది.

Also Read: అర్ధరాత్రి హైజాక్.. ధర్మవరంలో ఏటీఎంనే ఎత్తుకెళ్లిన కేటుగాళ్లు.. అనంతపురం సమీపంలో సీన్ కట్ చేస్తే!