Khammam Crime: దారుణ విషాదం.. చిన్నారి ప్రాణం తీసిన పెన్సిల్

పాఠశాలలో తోటి పిల్లలతో కలిసి ఆడుతూ పాడుతూ గడపాల్సిన ఆ చిన్నారిని విధి వెక్కిరించింది. చదువుకోవడానికి చేతికి పట్టిన పెన్సిలే ఆ బాలుడి పాలిట కాలయముడైంది. ఖమ్మం జిల్లా కూసుమంచి మండలం నాయకన్‌గూడెంలో బుధవారం చోటుచేసుకున్న ఈ విషాద ఘటన స్థానికంగా తీవ్ర కలకలం రేపింది.

అసలేం జరిగింది?

నాయకన్‌గూడెం గ్రామానికి చెందిన ఆరేళ్ల విహార్ స్థానిక ఒక ప్రైవేటు పాఠశాలలో యూకేజీ చదువుతున్నాడు. బుధవారం మధ్యాహ్నం పాఠశాల విరామ సమయంలో విహార్ మూత్ర విసర్జన కోసం బయటకు వెళ్లాడు. తిరిగి తరగతి గదిలోకి వెళ్లే క్రమంలో తోటి విద్యార్థులతో కలిసి ఉత్సాహంగా పరుగెత్తుకుంటూ వస్తున్నాడు. ఆ సమయంలో బాలుడి చేతిలో పెన్సిల్ ఉంది.

తరగతి గది గడప వద్దకు రాగానే విహార్ ఒక్కసారిగా అదుపు తప్పి బోర్లా పడిపోయాడు. దురదృష్టవశాత్తూ అతను పడిపోయే క్రమంలో చేతిలో ఉన్న పెన్సిల్ బలంగా అతని గొంతు భాగంలో (శ్వాసనాళం వద్ద) గుచ్చుకుంది. తీవ్రమైన గాయం కావడంతో రక్తస్రావం మొదలై విహార్ అక్కడికక్కడే కుప్పకూలిపోయాడు.

ఆసుపత్రికి తరలిస్తుండగానే విషాదం

ప్రమాదాన్ని గమనించిన పాఠశాల సిబ్బంది వెంటనే తేరుకుని 108 అత్యవసర వాహనానికి సమాచారం అందించారు. బాలుడిని వెంటనే కూసుమంచి ప్రభుత్వ ఆసుపత్రికి తరలించారు. అయితే, మార్గమధ్యలోనే విహార్ పరిస్థితి విషమించింది. ఆసుపత్రిలో పరీక్షించిన వైద్యులు, బాలుడు అప్పటికే మృతి చెందినట్లు ధ్రువీకరించారు. గొంతు భాగంలో పెన్సిల్ లోతుగా దిగబడటంతో అంతర్గత రక్తస్రావం జరిగి ప్రాణాలు పోయాయని వైద్యులు వెల్లడించారు.

కన్నీరుమున్నీరవుతున్న తల్లిదండ్రులు

కళ్లముందే ఆడుకుంటూ వెళ్లిన కుమారుడు విగతజీవిగా మారడంతో విహార్ తల్లిదండ్రులు, కుటుంబ సభ్యులు గుండెలవిసేలా రోదిస్తున్నారు. చిన్నారి మృతితో నాయకన్‌గూడెం గ్రామంలో విషాదఛాయలు అలముకున్నాయి. పాఠశాల ఆవరణలో పిల్లల భద్రతపై ఈ ఘటన పలు సందేహాలను రేకెత్తించింది. అజాగ్రత్తగా పరిగెత్తడం వల్ల జరిగే ప్రమాదాలపై ఉపాధ్యాయులు, తల్లిదండ్రులు పిల్లలకు నిరంతరం అవగాహన కల్పించాలని ఈ ఘటన గుర్తు చేస్తోంది.

ALSO READ: Palnadu Crime: బావమరిదిని సిలిండర్‌తో కొట్టి చంపిన బావ