Anantapur: హాస్పిటల్ జనరేటర్‌లో మృతదేహం కలకలం.. పక్కనే ఇడ్లీ పార్శిల్.. మిస్టరీగా మారిన మృతి

Anantapur: అనంతపురం నగరంలో అత్యంత రద్దీగా ఉండే సాయినగర్ లో తీవ్ర కలకలం రేగింది. స్థానికంగా ఉన్న భారతీ హాస్పిటల్ వెలుపల ఏర్పాటు చేసిన జనరేటర్‌లో గుర్తు తెలియని వ్యక్తి మృతదేహం లభ్యం కావడం సంచలనంగా మారింది. గత రెండు రోజులుగా ఆసుపత్రి పరిసరాల్లో తీవ్ర దుర్వాసన వస్తుండటంతో, సిబ్బంది సోమవారం జనరేటర్ గదిని తెరిచి చూడగా, లోపల కుళ్లిపోయిన స్థితిలో ఒక శవం కనిపించింది. షాక్‌కు గురైన హాస్పిటల్ నిర్వాహకులు వెంటనే పోలీసులకు సమాచారం అందించారు.

ఘటనా స్థలానికి చేరుకున్న అనంతపురం టూ-టౌన్ పోలీసులు కేసు నమోదు చేసి దర్యాప్తు చేపట్టారు. మృతదేహం పూర్తిగా ఉబ్బిపోయి, గుర్తుపట్టలేని విధంగా ఉండటంతో, సుమారు మూడు రోజుల క్రితం మరణం సంభవించి ఉంటుందని పోలీసులు ప్రాథమికంగా నిర్ధారించారు. మృతుడు మతిస్థిమితం లేని వ్యక్తి అయి ఉండవచ్చని పోలీసులు అనుమానిస్తున్నారు. అయితే, ఈ కేసును మరింత జటిలం చేస్తూ, జనరేటర్‌లో డెడ్ బాడీ పక్కనే ఇడ్లీ చట్నీ పార్శిల్ ఉన్నట్లు పోలీసులు గుర్తించారు. అసలు ఆ వ్యక్తి జనరేటర్‌లోకి ఎందుకు వెళ్లాడు? ఆహారం తినడానికా? లేక చలికి రక్షణ కోసమా? అనే కోణంలో పోలీసులు ఆరా తీస్తున్నారు.

ఈ ఘటన ఆసుపత్రి వర్గాల్లో, స్థానికంగా భయాందోళనలు సృష్టించింది. పోలీసులు ఈ మిస్టరీని ఛేదించేందుకు ముమ్మరంగా ప్రయత్నిస్తున్నారు. మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించారు. నిందితుడు ఎలా లోపలికి ప్రవేశించాడో తెలుసుకునేందుకు, గత మూడు రోజులుగా హాస్పిటల్, పరిసర ప్రాంతాల్లోని అన్ని సీసీటీవీ ఫుటేజీలను క్షుణ్ణంగా పరిశీలిస్తున్నారు. శనివారం జనరేటర్ తెరిచినప్పుడు ఎవరూ లేరని సిబ్బంది చెబుతుండటంతో, ఆ తర్వాతే ఈ ఘటన జరిగినట్లు భావిస్తున్నారు. మృతుడి గురించి ఏవైనా వివరాలు తెలిస్తే వెంటనే టూ-టౌన్ పోలీస్ స్టేషన్‌లో సమాచారం అందించాలని పోలీసులు ప్రజలను కోరారు.