Warangal: వీధి కుక్కల బీభత్సం.. 8 ఏళ్ల బాలికపై దాడి, రక్తపు మడుగులో చిన్నారి

వరంగల్ నగరంలో వీధి కుక్కలు స్వైరవిహారం చేస్తున్నాయి. శివనగర్ ప్రాంతంలో కుక్కల దాడి తీవ్ర కలకలం రేపింది. ఈ ఘటనలో అక్షర అనే ఎనిమిదేళ్ల బాలిక తీవ్రంగా గాయపడింది. బాలికపై కుక్క ఒక్కసారిగా దాడి చేయడంతో ఆ చిన్నారి ప్రాణాపాయ స్థితిలోకి వెళ్లింది. బాలిక గట్టిగా కేకలు వేయడంతో అప్రమత్తమైన స్థానికులు వెంటనే అక్కడికి చేరుకున్నారు. జనం గుమిగూడటంతో కుక్కలు బాలికను వదిలి పారిపోయాయి. ఈ ప్రమాదం నుంచి బాలిక తృటిలో తప్పించుకుంది.

https://twitter.com/bigtvtelugu/status/2035361219411091756

బాలిక శరీరంపై కుక్క తీవ్రమైన గాయాలు చేసింది. రక్తపు మడుగులో ఉన్న చిన్నారిని కుటుంబ సభ్యులు హుటాహుటిన ఆసుపత్రికి తరలించారు. ప్రస్తుతం వైద్యులు ఆ బాలికకు చికిత్స అందిస్తున్నారు. కేవలం నాలుగు రోజుల క్రితం కూడా ఇదే ప్రాంతంలో మరో చిన్నారిపై కుక్కలు దాడి చేసిన ఘటన స్థానికులను మరింత ఆందోళనకు గురిచేస్తోంది. వరుస దాడులతో కాలనీ వాసులు బయటకు రావాలంటేనే భయపడుతున్నారు.

మున్సిపల్ అధికారుల నిర్లక్ష్యంపై ప్రజలు తీవ్ర ఆగ్రహం వ్యక్తం చేస్తున్నారు. వీధి కుక్కల బెడద గురించి గతంలోనే అధికారులకు ఫిర్యాదు చేసినా ఎలాంటి చర్యలు తీసుకోలేదని కాలనీ వాసులు వాపోతున్నారు. అధికారులు స్పందించి కుక్కల బెడద నుంచి తమను కాపాడాలని కోరుతున్నారు. చిన్నపిల్లలను బయటకు పంపాలంటే తల్లిదండ్రులు వణికిపోతున్నారు.

నగరంలో రోజురోజుకూ పెరుగుతున్న కుక్కల దాడులు ప్రజల భద్రతను ప్రశ్నార్థకంగా మార్చుతున్నాయి. అధికారులు ఇప్పటికైనా క్షేత్రస్థాయిలో చర్యలు చేపట్టి వీధి కుక్కలను నియంత్రించాలని స్థానికులు డిమాండ్ చేస్తున్నారు. లేనిపక్షంలో ఆందోళనలు ఉధృతం చేస్తామని హెచ్చరిస్తున్నారు.

ALSO READ: Asia’s Largest Airport : ఆసియాలోనే అతిపెద్ద ఎయిర్ పోర్ట్.. ప్రారంభానికి ముహూర్తం ఫిక్స్!