Hanuman Temples: కిష్కింధ నుంచి వారణాసి వరకు.. హనుమంతుడు నేటికీ కాపాడే ఆరు పవిత్ర క్షేత్రాలు

Hanuman Temples: హనుమంతుడు కేవలం పురాణ కాలానికి చెందిన దైవం మాత్రమే కాదు.. నేటికీ భక్తుల అచంచల విశ్వాసంలో.. నిరంతర సాధనలో సజీవంగా ఉన్న ‘చిరంజీవి’ అని భక్తులు నమ్ముతారు. భయం, అలసట, సందిగ్ధ సమయాల్లో ఆయన నామం ప్రతి సామాన్యుడికి కొండంత అండగా నిలుస్తుంది. ఇదిలా ఉంటే మన దేశంలోని కొన్ని ప్రత్యేక ప్రదేశాలలో హనుమంతుని ఉనికిని కేవలం కథల ద్వారానే కాకుండా.. అక్కడి ఆధ్యాత్మిక శక్తి ద్వారా అనుభవించవచ్చు. భక్తి, క్రమశిక్షణ, కర్తవ్య నిష్ఠ మేళవించిన ఆ ఆరు పవిత్ర క్షేత్రాల గురించి.. అక్కడ వెల్లివిరిసే ఆంజనేయుని దివ్య ఉనికి గురించి ఇప్పుడు తెలుసుకుందాం.

1. చిత్రకూట్: 

రామాయణంలో చిత్రకూట్‌కు ఒక ప్రత్యేక స్థానం ఉంది. వనవాస కాలంలో రాముడు, సీత, లక్ష్మణులు ఇక్కడ గడిపినప్పుడు, హనుమంతుడు వారి సేవలో తరించాడు. ఇక్కడ హనుమంతుడు శక్తి ప్రదర్శన కంటే.. అహకారం లేని సేవకుడిగా కనిపిస్తాడు. చిత్రకూటంలోని దేవాలయాలు క్రమశిక్షణ, మౌనం, సేవకు ప్రాధాన్యత ఇస్తాయి. ఇక్కడ హనుమంతుని శక్తి మానసిక స్థైర్యాన్ని, కర్తవ్య నిష్ఠను పెంచుతుందని భక్తుల నమ్మకం.

2. హంపి (కిష్కింధ):

ప్రస్తుత హంపి ప్రాంతమే పూర్వపు కిష్కింధ. ఇక్కడే హనుమంతుడు మొదటిసారి రాముడిని కలిశాడు. ఈ రాతి కొండలు, గుహలు, తుంగభద్ర నదీ తీరం హనుమంతుడి విధేయతకు సాక్ష్యంగా నిలుస్తాయి. ఇక్కడ పూజలు కేవలం శారీరక బలం కోసం కాకుండా.. నైతిక విలువల కోసం, మిత్రధర్మం కోసం నిర్వహిస్తారు. హనుమంతుడు ఒక మార్గదర్శిగా.. నాయకుడిగా ఇక్కడ కొలవబడతాడు.

3. మహేంద్రగిరి:

సముద్రాన్ని దాటడానికి ముందు హనుమంతుడు తన శక్తిని గుర్తు చేసుకున్న ప్రదేశం మహేంద్రగిరి. ఇది ఆత్మ విశ్వాసానికి ప్రతీక. ఏదైనా పెద్ద పని చేసే ముందు మనలోని అపరిమితమైన శక్తిని ఎలా మేల్కొల్పాలో ఈ క్షేత్రం మనకు నేర్పుతుంది. ఇక్కడి ధ్యాన వాతావరణం భక్తులలో స్పష్టతను, మానసిక బలాన్ని నింపుతుంది.

4. గంధమాదన పర్వతం:

సంజీవని మూలిక కోసం హనుమంతుడు పర్వతాన్నే ఎత్తిన ఉదంతం మనకు తెలుసు. అయితే.. ఇక్కడ గమనించాల్సిన విషయం ఆయన బాధ్యతాయుతమైన వేగం. గంధమాదన పర్వతం రక్షణకు, పునరుద్ధరణకు చిహ్నం. హనుమంతుని శక్తి ఇక్కడ విధ్వంసకారిగా కాకుండా.. ప్రాణాలను రక్షించే సంజీవనిలా అనుభవమవుతుంది.

Also Read: తెలంగాణ ఆత్మగౌరవ ప్రతీకలు.. అద్భుత శక్తి రూపాలు, సమ్మక్క సారలమ్మలు

5. వారణాసి :

వారణాసిలోని సంకట మోచన్ ఆలయం భక్తుల అంతర్గత అడ్డంకులను తొలగిస్తుంది. ఇక్కడ హనుమంతుడు కేవలం కోరికలు తీర్చే దేవుడు కాదు. భయాన్ని జయించే ధైర్యాన్నిచ్చే గురువు. నిరాడంబరత, ఆత్మపరిశీలన ఇక్కడి ఆరాధనలో ముఖ్య భాగాలు. మానసిక అశాంతిని పోగొట్టి, స్థితప్రజ్ఞతను ప్రసాదించే శక్తిగా హనుమంతుడు ఇక్కడ పూజలందుకుంటాడు.

6. సాలార్ సార్ (రాజస్థాన్):

సాలార్ సార్ బాలాజీ ఆలయం భక్తుల నిరంతర ఆచరణకు నిదర్శనం. ఇక్కడ హనుమంతుడు గడ్డం, మీసాలతో కనిపిస్తాడు. భక్తులు చేసే మొక్కులు, ఉపవాసాలు, నిరంతర నామస్మరణ ఈ ప్రాంతాన్ని ఒక శక్తి కేంద్రంగా మార్చాయి. నిరంతర సాధన ద్వారా దైవత్వాన్ని ఎలా నిలుపుకోవచ్చో సాలార్ సార్ నిరూపిస్తుంది.

Share

• 
• 
• 
• 
• 
•