Bhogi Festival 2026: భోగి పండగ విశిష్టత ఏంటి ? పాటించాల్సిన నియమాల గురించి తెలుసా ?

Bhogi Festival 2026: తెలుగువారికి అత్యంత ఇష్టమైన పెద్ద పండగ సంక్రాంతి. ఈ మూడు రోజుల వేడుకల్లో మొదటి రోజు ‘భోగి’. పాత సామాన్లను, మనసులోని నెగటివ్ ఆలోచనలను వదిలేసి, కొత్త వెలుగులతో జీవితాన్ని ప్రారంభించడమే ఈ పండగ ముఖ్య ఉద్దేశ్యం. చలికాలం ముగిసి, సూర్యుడు తన దిశను మార్చుకునే ఈ సమయంలో జరుపుకునే భోగి పండగకు ఆధ్యాత్మికంగా, శాస్త్రీయంగా ఎంతో ప్రాముఖ్యత ఉంది. మన సంస్కృతిని ప్రతిబింబించే ఈ వేడుకల గురించి ఇప్పుడు వివరంగా తెలుసుకుందాం.

భోగి 2026 తేదీ, సమయం:

హిందూ పంచాంగం ప్రకారం.. సూర్యుడు ధనస్సు రాశి నుంచి మకర రాశిలోకి ప్రవేశించే ముందు రోజును భోగిగా జరుపుకుంటాం.

తేదీ: జనవరి 14, 2026 (బుధవారం)

భోగి మంటల సమయం: తెల్లవారుజామున 5:00 గంటల నుంచి 6:30 గంటల వరకు అత్యంత శుభప్రదం.

భోగి పండుగ విశేషాలు – ఆచారాలు:

1. భోగి మంటలు: భోగి రోజు తెల్లవారుజామునే లేచి ఇంటి ముందు భోగి మంటలు వేయడం ప్రధాన ఆచారం. ఇంట్లోని పాత వస్తువులను, పనికిరాని కట్టెలను ఈ మంటల్లో వేస్తారు. దీని వెనక ఉన్న అంతరార్థం ఏమిటంటే.. పాత పద్ధతులను, మనలోని చెడు గుణాలను వదిలేసి సరికొత్తగా జీవితాన్ని ప్రారంభించడం. శాస్త్రీయంగా చూస్తే.. ఆ చలి సమయంలో మంటల వల్ల వచ్చే వేడి శరీరానికి ఆరోగ్యాన్ని ఇస్తుంది.

2. భోగి పళ్లు (పిల్లల ఆశీర్వాదం): చిన్న పిల్లలు ఉన్న ఇంట్లో భోగి పళ్ల వేడుక తప్పనిసరి. రేగు పళ్లు, చిల్లర నాణేలు, పూలు, అక్షతలను కలిపి పిల్లల తలపై పోస్తారు. దీని వల్ల పిల్లలకు ఉన్న దిష్టి పోతుందని, ఆయురారోగ్యాలతో ఉంటారని నమ్మకం.

3. ముగ్గులు, గొబ్బెమ్మలు: ఇంటి ముందు రంగురంగుల ముగ్గులు వేసి, వాటి మధ్యలో ఆవు పేడతో చేసిన గొబ్బెమ్మలను పెడతారు. వీటిని పూలతో అలంకరిస్తారు. గొబ్బెమ్మలను గౌరీ దేవి స్వరూపంగా భావించి పూజిస్తారు.

4. హరిదాసు కీర్తనలు, గంగిరెద్దులు: తెలుగు లోగిళ్లలో హరి దాసుల కీర్తనలు, గంగి రెద్దుల ఆటలు భోగి రోజున ప్రత్యేక ఆకర్షణగా నిలుస్తాయి. ఇది మన పల్లెటూరి సంస్కృతికి అద్దం పడుతుంది.

Also Read: మకర సంక్రాంతి.. పండగ వెనుక ఉన్న అసలు సైన్స్ మీకు తెలుసా?

భోగి ప్రాముఖ్యత:

ఆధ్యాత్మికంగా.. భోగి రోజున ఇంద్రుడిని పూజిస్తారు. వర్షాలను ఇచ్చి పంటలు పండడానికి కారణమైనందుకు కృతజ్ఞతగా ఇంద్రుడికి ‘భోగి మంటల’ రూపంలో గౌరవం ఇస్తారు. అందుకే దీనిని ‘ఇంద్రోత్సవం’ అని కూడా పిలుస్తారు.

అలాగే.. ఈ రోజున వండే ‘భోగి వంటకాలు’ కూడా ప్రత్యేకమే. కొత్త బియ్యం, బెల్లం, నువ్వులతో చేసిన వంటకాలు ఆరోగ్యాన్నిస్తాయి. ముఖ్యంగా నువ్వులు, చెరకు వంటివి చలి కాలంలో శరీరానికి అవసరమైన వేడిని అందిస్తాయి.

భోగి అంటే కేవలం పాత వస్తువులను కాల్చడం కాదు, మనసులోని ద్వేషాన్ని, అసూయను వదిలేసి ప్రేమానురాగాలను పెంచుకోవడం. ఈ 2026 భోగి మీ అందరి జీవితాల్లో సరికొత్త వెలుగులు నింపాలని కోరుకుందాం.

Also Read: సంక్రాంతి పండగ ఎప్పుడు ? తేదీ, శుభ ముహూర్తం ఇదే !

Share

• 
• 
• 
• 
• 
•