Devotional news: నవరాత్రి పూజల నుంచి నిత్యార్చన వరకు.. ఎరుపు రంగుకు ఎందుకంత ప్రాముఖ్యత

Devotional news: హిందూ సంప్రదాయంలో రంగులకు విశిష్టమైన అర్థాలు ఉన్నాయి. ముఖ్యంగా ‘శక్తి’ ఆరాధనలో ఎరుపు రంగు కీలక పాత్ర పోషిస్తుంది. ఎరుపు రంగు కేవలం ఒక రంగు మాత్రమే కాదు. అది ఉత్సాహానికి, పౌరుషానికి, ప్రేమకు , సృజనాత్మకతకు సంకేతం. అమ్మవారిని దర్శించుకున్నప్పుడు ఆమె ధరించే ఎర్రటి చీర, నుదుట ఉండే ఎర్రటి కుంకుమ మనలో ఒక రకమైన దైవిక శక్తిని నింపుతాయి. ఈ రంగు దేవికి ఎందుకు అత్యంత ప్రీతిపాత్రమైనదో, పురాణాలు , తత్వశాస్త్రం ఏమి చెబుతున్నాయో ఇప్పుడు తెలుసుకుందాం.

మన సంస్కృతిలో ఎరుపు రంగు అత్యంత శక్తివంతమైన రంగుగా పరిగణిస్తారు. అమ్మవారి ఆలయాల్లో చూసినా లేదా ఇంట్లో లలితా సహస్రనామ పారాయణం చేసినా ఎరుపు రంగు వస్త్రాలు, ఎర్ర చందనం, ఎర్రటి అక్షతలు తప్పనిసరిగా కనిపిస్తాయి.

1. శక్తి, పౌరుషానికి చిహ్నం:
అమ్మవారు దుష్ట శిక్షణ కోసం అవతరించిన మహా శక్తి. మహిషాసుర మర్దినిగా ఆమె రాక్షసులతో పోరాడినప్పుడు ఆమెలోని ఉగ్రత్వానికి, పరాక్రమానికి ఎరుపు రంగు ప్రతీక. ఎరుపు రంగు అగ్నిని సూచిస్తుంది. అగ్ని ఎలాగైతే వ్యర్థాలను దహించి శుద్ధి చేస్తుందో.. అమ్మవారి శక్తి కూడా మనలోని అజ్ఞానాన్ని, అహంకారాన్ని దహించి జ్ఞానాన్ని ప్రసాదిస్తుంది. తంత్ర శాస్త్రం ప్రకారం, ఎరుపు రంగు మన శరీరంలోని ‘మూలాధార చక్రం’తో సంబంధం కలిగి ఉంటుంది. ఇది మనిషికి మనుగడను, స్థిరత్వాన్ని ఇస్తుంది.

2. సృజనాత్మకత, సంతానోత్పత్తి:
స్త్రీ తత్త్వానికి మూలం సృజన. ప్రపంచాన్ని సృష్టించే ప్రకృతి స్వరూపిణి అమ్మవారు. ఎరుపు రంగు రక్తాన్ని సూచిస్తుంది. ఇది జీవనాధారం. పురాణాల ప్రకారం.. ఎరుపు రంగు సంతానోత్పత్తికి చిహ్నం. అందుకే వివాహిత స్త్రీలు సౌభాగ్యం కోసం ఎర్రటి కుంకుమను ధరిస్తారు. అమ్మవారికి ఎర్రటి చీరలను సమర్పిస్తారు. ఇది వంశాభివృద్ధిని, మంగళప్రదమైన జీవితాన్ని సూచిస్తుంది.

3. గ్రహ దోష నివారణ:
జ్యోతిష్య శాస్త్రం ప్రకారం, ఎరుపు రంగు కుజ గ్రహానికి సంబంధించినది. కుజుడు శక్తికి, ధైర్యానికి అధిపతి. జాతకంలో కుజ దోషం ఉన్నవారు లేదా ధైర్యం.. కావాలనుకునే వారు ఎర్రటి వస్త్రాలతో అమ్మవారిని పూజిస్తారు. ఇలా చేయడం వల్ల మనసులోని భయాలు తొలగిపోతాయని భక్తుల నమ్మకం.

4. రజో గుణానికి సంకేతం:
ప్రకృతి మూడు గుణాల కలయిక: సత్త్వ, రజ, తమ గుణాలు. ఎరుపు రంగు ‘రజో గుణానికి’ సంకేతం. ఇది కార్యాచరణను, చైతన్యాన్ని సూచిస్తుంది. లోక కల్యాణం కోసం అమ్మవారు నిరంతరం చైతన్యవంతంగా ఉండి భక్తులను రక్షిస్తుందని చెప్పడానికి ఎరుపు రంగును ఉపయోగిస్తారు. అందుకే లలితా దేవిని “లోహితాక్షీ” (ఎర్రటి కన్నులు కలది), “రక్త వర్ణ” అని స్తుతిస్తారు.

5. శాస్త్రీయ కోణం:
శాస్త్రీయంగా చూస్తే.. ఎరుపు రంగు తక్కువ తరంగదైర్ఘ్యం కలిగి ఉండి, దూరంగా ఉన్నా కూడా కంటికి స్పష్టంగా కనిపిస్తుంది. ఇది మెదడును త్వరగా ఉత్తేజితం చేస్తుంది. ఆధ్యాత్మిక సాధనలో ఏకాగ్రత పెరగడానికి, మనస్సును దైవకార్యం వైపు మళ్లించడానికి ఎరుపు రంగు ప్రభావవంతంగా పనిచేస్తుంది.

పూజలో ఎరుపు రంగును ఎలా ఉపయోగించాలి ?
అమ్మవారికి ఎర్రటి మందార పూలు లేదా గులాబీలతో అర్చన చేయడం విశేష ఫలితాలను ఇస్తుంది.

పూజా పీఠంపై ఎర్రటి వస్త్రాన్ని పరచడం వల్ల ఆ ప్రదేశంలో సానుకూల తరంగాలు పెరుగుతాయి.

అమ్మవారికి ఎర్రటి గాజులు, పసుపు-కుంకుమ సమర్పించడం వల్ల సౌభాగ్యం సిద్ధిస్తుంది.