Dino Podcast: డైనోసార్లంటే పిల్లలకే కాదు, పెద్దలకూ ఎప్పుడూ ఆసక్తే. లక్షల సంవత్సరాల క్రితం భూమిని ఏలిన ఈ వింత జీవుల రహస్యాలను ఛేదించడానికి ‘డినో డీట్స్’ (Dino Deets) ఛానల్ వేదికగా సరికొత్త పాడ్కాస్ట్ సిరీస్ ప్రారంభమైంది. ‘డినో డైమెన్షన్స్’ (Dino Dimensions) పేరుతో వచ్చిన ఈ పాడ్కాస్ట్ మొదటి ఎపిసోడ్కు హోస్ట్గా వ్యవహరించిన దేవాన్ష్, డైనోసార్ల ప్రపంచానికి సంబంధించిన ఎన్నో ఆసక్తికరమైన నిజాలను, అలాగే భారతదేశానికి ఉన్న ఒక ప్రత్యేకమైన డైనోసార్ కనెక్షన్ను పంచుకున్నారు.
Read also-Illu Illaalu pillalu prema : భర్తతో నాలుగేళ్ల ప్రయాణం.. ప్రేమ బేబీ బంప్స్ పిక్స్ వైరల్..
చాలా మంది ‘జురాసిక్ వరల్డ్’ సినిమాలు చూసి, డైనోసార్లన్నీ జురాసిక్ కాలంలోనే జీవించాయని భావిస్తుంటారు. కానీ ఇక్కడే అసలైన ట్విస్ట్ ఉంది. ఎక్కువ శాతం డైనోసార్లు నిజానికి ‘క్రిటేషియస్’ (Cretaceous) కాలంలో జీవించాయని దేవాన్ష్ వివరించారు. డైనోసార్లు భూమిపై దాదాపు 150 మిలియన్ సంవత్సరాల కంటే ఎక్కువ కాలం మనుగడ సాగించాయి, ఇది మానవజాతి చరిత్ర కంటే చాలా ఎక్కువ. ఇవి ముఖ్యంగా మూడు ప్రధాన కాలాల్లో భూమిని ఏలాయి – ట్రయాసిక్, జురాసిక్, క్రిటేషియస్ పీరియడ్స్.
డైనోసార్లన్నీ భారీగా ఉంటాయని అనుకుంటే పొరపాటే. ఇవి రకరకాల పరిమాణాల్లో, ఆకారాల్లో ఉండేవి. కొన్ని చిన్న పక్షుల సైజులో, చెట్ల కొమ్మలంత పరిమాణంలో చాలా చిన్నగా ఉంటే.. మరికొన్ని మాత్రం కొండంత పరిమాణంలో ఉండేవి. కొన్ని డైనోసార్లయితే పూర్తిగా పెరిగిన మగ జిరాఫీ కంటే కూడా చాలా ఎత్తుగా ఉండేవంటే అవి ఎంత భారీగా ఉండేవో ఊహించుకోవచ్చు. శాస్త్రవేత్తలు ఇప్పటివరకు దాదాపు 800కు పైగా డైనోసార్ జాతులను కనుగొన్నారు, అయితే ఒకప్పుడు భూమిపై జీవించిన మొత్తం డైనోసార్లలో ఇది చాలా స్వల్ప భాగం మాత్రమేనని పరిశోధకులు నమ్ముతున్నారు.
నిజానికి ‘డైనోసార్’ అనే పదానికి గ్రీకు భాషలో ‘భయంకరమైన బల్లి’ అని అర్థం. మనకు బాగా తెలిసిన టిరన్నోసారస్ రెక్స్, ట్రైసెరటాప్స్, స్టెగోసారస్ వంటివి డైనోసార్లలో అత్యంత ప్రజాదరణ పొందిన జాతులు.
అయితే, కొన్ని డైనోసార్లకు అవి లభ్యమైన ప్రాంతాల ఆధారంగా పేర్లు పెట్టడం విశేషం. ఉదాహరణకు, అమెరికాలోని ‘యూటా’ ప్రాంతంలో దొరికిన డైనోసార్కు ‘యూటా రాప్టర్’ అని, ‘అర్జెంటీనా’లో లభించిన శిలాజాలకు ‘అర్జెంటీనోసారస్’ అని నామకరణం చేశారు.
ఈ ఎపిసోడ్లో హైలైట్ అంశం భారతదేశానికి చెందిన డైనోసార్ గురించిన ప్రస్తావన. ఇండియాలో కనుగొనబడిన ఒక ప్రత్యేకమైన డైనోసార్ జాతికి ‘రాజాసారస్’ అని పేరు పెట్టారు. సంస్కృతంలో ‘రాజా’ అంటే రాజు అని అర్థం వస్తుంది కాబట్టి, రాజాసారస్ అంటే ‘కింగ్ లిజార్డ్’ అని అర్థం. భారతదేశ చరిత్రలోనే అత్యంత శక్తివంతమైన క్రూర జంతువుగా దీనిని అభివర్ణించవచ్చు.
భూమిపై ఒక మిస్టీరియస్ యుగానికి గుర్తులుగా మిగిలిన డైనోసార్ల గురించి శాస్త్రవేత్తలు ప్రతి సంవత్సరం ఎన్నో కొత్త విషయాలను వెలికితీస్తూనే ఉన్నారు. ఈ మొదటి ఎపిసోడ్ను ఎంతో ఆసక్తికరంగా ముగించిన దేవాన్ష్, తన తదుపరి ఎపిసోడ్లో డైనోసార్ల ప్రపంచంలోనే అత్యంత పాపులర్ మరియు ప్రమాదకరమైన ‘మైటీ టిరన్నోసారస్ రెక్స్’ (T-Rex) గురించి మరిన్ని ఆశ్చర్యకరమైన విషయాలను పంచుకోబోతున్నట్లు ప్రకటించారు. డైనోసార్ల ప్రపంచాన్ని సరికొత్త కోణంలో చూడాలనుకునే వారికి దేవాన్ష్ అందిస్తున్న ‘డినో డైమెన్షన్స్’ పాడ్కాస్ట్ ఒక చక్కని ఛాయిస్ అని చెప్పాలి.
Share
Illu Illaalu pillalu prema : భర్తతో నాలుగేళ్ల ప్రయాణం.. ప్రేమ బేబీ బంప్స్ పిక్స్ వైరల్..
నేడు సీఎం రేవంత్ అధ్యక్షతన కేబినెట్ సమావేశం!
