Madraskaaran Teaser: మెగా డాటర్ నిహారిక తమిళ్ సినిమా టీజర్ చూశారా.. యాక్షన్ అదిరిపోయింది

Madraskaaran Teaser: మెగా డాటర్ నిహారిక కొణిదెల ప్రస్తుతం వరుస సినిమాలతో బిజీగా మారింది. ఈ నేపథ్యంలోనే ఆమె కోలీవుడ్ లో హీరోయిన్ గా ఎంట్రీ ఇస్తున్న విషయం తెల్సిందే. గతంలో ఆమె విజయ్ సేతుపతి నటించిన ఒక సినిమాలో స్పెషల్ రోల్ లో కనిపించింది. ఇక ఇప్పుడు మద్రాస్ కారన్ అనే సినిమాతో హీరోయిన్ గా కోలీవుడ్ ఎంట్రీ ఇస్తుంది.

నిహారికతో పాటు.. భూతకాలం, కుంబళంగి నైట్స్ మరియు ఆర్‌డిఎక్స్ చిత్రాలతో మంచి పేరు తెచ్చుకున్న మలయాళ కుర్ర హీరో షేన్ నిగమ్ కూడా ఈ సినిమాతో తమిళ్ లోకి అడుగుపెడుతున్నాడు. వాలి మోహన్ దాస్ దర్శకత్వం వహిస్తున్న ఈ చిత్రాన్ని ఎస్‌ఆర్‌ ప్రొడక్షన్స్‌పై బి జగదీష్‌ నిర్మిస్తున్నాడు. ఇప్పటికే ఈ సినిమా నుంచి రిలీజైన పోస్టర్స్ ప్రేక్షకులను విశేషంగా ఆకట్టుకున్నాయి.

తాజాగా ఈ సినిమా టీజర్ ను మేకర్స్ రిలీజ్ చేశారు. టీజర్ మొత్తాన్ని యాక్షన్ సీక్వెన్స్ తో నింపేశారు. షేన్ తో పాటు తమిళ్ నటుడు కలైయరసన్ కీలక పాత్రలో నటిస్తున్నాడు. టీజర్ చూస్తుంటే ఈ కథ మొత్తం ఇద్దరు వ్యక్తుల మధ్య వైరంలా కనిపిస్తుంది.

ఒకరు తన కుల అహంకారానికి ఆజ్యం పోసినవారు కాగా.. మరొకరు తన కొడుకు మరణానికి ప్రతీకారం తీర్చుకోవాలని పగతో తిరుగుతున్నట్లు కనిపించింది. అసలు వీరిద్దరికి మధ్య ఉన్న సంబంధం ఏంటి.. ? ఎందుకు ఇంతలా శత్రువులు అయ్యారు అనేది సినిమా చూసి తెలుసుకోవాల్సిందే. పుదుకోట్టైకి చెందిన సత్యమూర్తి అనే పాత్రలో షేన్ కనిపిస్తున్నాడు.. అతనికి జోడిగా నిహారిక కనిపిస్తుంది. త్వరలోనే ఈ సినిమా ప్రేక్షకుల ముందుకు రానుంది. మరి ఈ సినిమాతో నిహారిక, షేన్ కోలీవుడ్ లో పాగా వేస్తారేమో చూడాలి.