Indian ship fired Strait of Hormuz: హర్మూజ్ జలసంధి సమీపంలో భారతీయ నౌకపై కాల్పులు జరిగిన ఘటన చర్చనీయాంశమైంది. ఈ ఉదంతంపై స్పందించిన భారత విదేశీ వ్యవహారాల మంత్రిత్వ శాఖ (MEA), ఇరాన్ రాయబారితో అత్యవసర భేటీ నిర్వహించింది. ఈ వ్యూహాత్మక జలమార్గంలో ప్రయాణించే వాణిజ్య నౌకల భద్రతపై ఖచ్చితమైన హామీ కావాలని భారత్ పట్టుబట్టింది. భారత అధికారులతో జరిగిన సమావేశంలో ఇరాన్ రాయబారి ఈ ఘటనపై వివరణ ఇచ్చారు.
ఈ కాల్పులు “ఉద్దేశపూర్వకంగా చేసినవి కావు.” అని, కమ్యూనికేషన్ లోపం (Communication Gap) వల్లే ఇది జరిగిందని ఇరాన్ రాయబారి పేర్కొన్నారు. అయితే, ఇరాన్ ఇస్లామిక్ రివల్యూషనరీ గార్డ్ కార్ప్స్ నేవీ (IRGCN)కి చెందిన స్థానిక యూనిట్ల స్థాయిలో సమన్వయ లోపం ఉండవచ్చని భారత వర్గాలు భావిస్తున్నాయి.
భవిష్యత్తులో ఇలాంటి ఘటనలు పునరావృతం కాకుండా ఉండటానికి, నౌకలు జలసంధిలోకి ప్రవేశించక ముందే ఇరాన్ కేంద్ర అధికార యంత్రాంగం నుంచి ముందస్తు క్లియరెన్స్ అందేలా చూడాలని భారత్ కోరింది. నౌకలను ముందుగానే గుర్తించి, వాటికి అధికారికంగా అనుమతి ఇస్తే క్షేత్రస్థాయిలో ఉన్న సైనిక దళాల మధ్య గందరగోళం ఉండదని భారత అధికారులు స్పష్టం చేశారు. గతంలో నౌకల రాకపోకల విషయంలో ఇరాన్ అందించిన సహకారాన్ని ఈ సందర్భంగా భారత్ గుర్తు చేసింది.
హర్మూజ్ జలసంధి గుండా ప్రయాణించే నౌకల భద్రత కోసం భారత్ ఇప్పటికే 21 నౌకల జాబితాను ఇరాన్ అధికారులతో పంచుకుంది. ముందస్తుగా సమాచారం ఇచ్చినప్పటికీ, ఒక భారతీయ నౌకపై కాల్పులు జరగడం పట్ల భారత్ తీవ్ర అభ్యంతరం వ్యక్తం చేసింది. ఈ కాల్పుల కారణంగా సదరు నౌక తన ప్రయాణాన్ని మధ్యలోనే ఆపివేసి వెనక్కి తిరిగి రావాల్సి వచ్చింది.
ఈ కాల్పుల ఘటనలో రెండు భారతీయ నౌకలకు స్వల్ప నష్టం వాటిల్లింది. సముద్రంలో సాధారణంగా జరిగే చిన్న ఆయుధాల కాల్పుల వల్ల కొన్ని తూటాలు నౌకల వైపు దూసుకువచ్చాయి. నౌకల బ్రిడ్జ్ విండోస్ దెబ్బతిన్నాయి తప్ప, ఎవరికీ ఎటువంటి గాయాలు కాలేదని, నౌక నిర్మాణానికి పెద్దగా నష్టం కలగలేదని అధికారులు ధృవీకరించారు.
ప్రస్తుతం హర్మూజ్ జలసంధి ఇరాన్ సాయుధ దళాల పూర్తి పర్యవేక్షణలో ఉంది. ఇరాన్ ఓడరేవులపై అమెరికా విధించిన ఆంక్షల నేపథ్యంలో అక్కడ ఉద్రిక్తతలు కొనసాగుతున్నాయి. వాణిజ్య నౌకల రాకపోకలను పునరుద్ధరిస్తామని గతంలో సూచనలు వచ్చినప్పటికీ, ప్రస్తుత పరిస్థితులు మరింత సంక్లిష్టంగా మారాయి. ముందస్తుగా అనుమతులు తీసుకోవడం ద్వారా మాత్రమే ఇలాంటి సున్నితమైన ప్రాంతాల్లో నౌకల ప్రయాణం సురక్షితమని భారత్ బలంగా నమ్ముతోంది.
Read Also: తమిళనాడులో బాణసంచా పరిశ్రమలో పేలుడు.. 17 మంది సజీవ దహనం!
Share
ఇక పై ఏకపక్ష నిర్ణయాలు ఉండవ్.. నిర్మాతల నిర్ణయమే ఫైనల్..
Vastu: వాస్తు ప్రకారం ఆలాంటి ఇంట్లో ఉంటే ఆయుఃఆరోగ్య ఐశ్వర్యాలు కలిసి వస్తాయట
