Saudi Arabia UAE Conflict: సౌదీ దెబ్బకు దిగొచ్చిన యూఏఈ.. యెమెన్ నుంచి బలగాల ఉపసంహరణ!

Saudi Arabia UAE Conflict: గల్ఫ్ దేశాలైన సౌదీ అరేబియా, యునైటెడ్ అరబ్ ఎమిరేట్స్ (UAE) మధ్య విభేదాలు భగ్గుమన్నాయి. యెమెన్ యుద్ధంలో ఇన్నాళ్లు మిత్రపక్షాలుగా ఉన్న ఈ రెండు దేశాల మధ్య ‘ఆయుధాల రవాణా’ చిచ్చు రేపింది. సౌదీ అరేబియా హెచ్చరికలతో యూఏఈ తన బలగాలను యెమెన్ నుంచి వెనక్కి తీసుకుంటున్నట్లు ప్రకటించింది.

యెమెన్‌లోని ముకల్లా (Mukalla) నౌకాశ్రయంపై మంగళవారం సౌదీ అరేబియా వైమానిక దాడులు చేసింది. యూఏఈ నుంచి వచ్చిన ఒక నౌక ద్వారా యెమెన్‌లోని వేర్పాటువాద సంస్థ ‘సదరన్ ట్రాన్సిషనల్ కౌన్సిల్’ (STC)కు ఆయుధాలు, సాయుధ వాహనాలు సరఫరా అవుతున్నాయన్న సమాచారంతో ఈ దాడులు చేసినట్లు సౌదీ ప్రకటించింది. అంతేకాకుండా, 24 గంటల్లోగా యూఏఈ తమ బలగాలను యెమెన్ నుంచి ఉపసంహరించుకోవాలని యెమెన్ ప్రభుత్వం అల్టిమేటం జారీ చేసింది.

దక్షిణ యెమెన్‌ను ప్రత్యేక దేశంగా మార్చాలని STC కోరుతుండగా, దానికి యూఏఈ మద్దతు ఇస్తోంది. అయితే, యెమెన్ సమైక్యంగా ఉండాలని సౌదీ కోరుకుంటోంది. ఇటీవల STC వేర్పాటువాదులు సౌదీ సరిహద్దులకు దగ్గరగా ఉన్న ప్రాంతాలను ఆక్రమించుకోవడం తమ జాతీయ భద్రతకు ‘రెడ్ లైన్’ (Red Line) అని సౌదీ హెచ్చరించింది. మిత్రదేశమైనా సరే ఉపేక్షించేది లేదని స్పష్టం చేసింది.

తాము యెమెన్ నుంచి తమ మిగిలిన బలగాలను వెనక్కి తీసుకుంటున్నట్లు యూఏఈ రక్షణ శాఖ కీలక ప్రకటన చేసింది. అయితే, ఆ నౌకలో ఆయుధాలు లేవని, తమ సైన్యం కోసమే వాహనాలు పంపామని వివరణ ఇచ్చింది. సౌదీ భద్రతకు తాము కట్టుబడి ఉన్నామని పేర్కొంటూ ఉద్రిక్తతలను తగ్గించే ప్రయత్నం చేసింది.

Read Also: iPhone Scam: ఆన్‌లైన్‌లో కొత్త ఐఫోన్ కొంటే పాత ఫోన్ డెలివరీ.. ఎలా గుర్తుపట్టాలంటే