IOCL Recruitment: ఐఓసీఎల్ నుంచి భారీ ఉద్యోగ నోటిఫికేషన్.. ఈ క్వాలిఫికేషన్ ఉంటే చాలు, పూర్తి వివరాలివే

భారత ప్రభుత్వరంగ దిగ్గజ సంస్థ అయిన ఇండియన్ ఆయిల్ కార్పొరేషన్ లిమిటెడ్ (IOCL), నిరుద్యోగ యువతకు అద్భుతమైన అవకాశాన్ని కల్పించింది. హర్యానాలోని పానిపట్ రిఫైనరీ & పెట్రోకెమికల్ కాంప్లెక్స్‌లో వివిధ విభాగాల్లో ఖాళీగా ఉన్న 637 ట్రేడ్ అప్రెంటిస్ పోస్టుల భర్తీకి అధికారికంగా నోటిఫికేషన్‌ను విడుదల చేసింది. ఈ శిక్షణ కాలంలో అభ్యర్థులు పారిశ్రామిక నైపుణ్యాలను పెంపొందించుకోవడంతో పాటు ప్రభుత్వ నిబంధనల ప్రకారం స్టైపెండ్ పొందే అవకాశం ఉంటుంది.

విభాగాలు, ఖాళీల వివరాలివే..

ఈ నోటిఫికేషన్ ద్వారా మొత్తం 637 ట్రేడ్ అప్రెంటిస్ పోస్టులను భర్తీ చేయనున్నారు. ఇందులో కెమికల్ ప్లాంట్, ఫిట్టర్, కెమికల్, మెకానికల్, ఎలక్ట్రికల్, ఇన్‌స్ట్రుమెంటేషన్ వంటి సాంకేతిక విభాగాలతో పాటు అకౌంట్స్ వంటి నాన్-టెక్నికల్ విభాగాల్లో కూడా ఖాళీలు ఉన్నాయి. అభ్యర్థులు తమ ఆసక్తి మరియు అర్హతను బట్టి సంబంధిత విభాగానికి దరఖాస్తు చేసుకోవచ్చు.

విద్యార్హతలు..

పోస్టులను అనుసరించి అభ్యర్థుల విద్యార్హతలు నిర్ణయించబడ్డాయి. గుర్తింపు పొందిన యూనివర్సిటీ లేదా సంస్థ నుండి కనీసం 50 శాతం మార్కులతో బీఎస్సీ (B.Sc), బీఏ (B.A), బీకామ్ (B.Com), బీఈ (B.E), బీటెక్ (B.Tech), ఎంబీఏ (MBA) లేదా సీఏ (CA) ఉత్తీర్ణులై ఉండాలి. రిజర్వ్‌డ్ కేటగిరీ అభ్యర్థులకు మార్కుల్లో కొంత సడలింపు ఉంటుంది.

వయోపరిమితి..

31 జనవరి 2026 నాటికి అభ్యర్థుల వయస్సు 18 ఏళ్ల నుంచి 24 ఏళ్ల మధ్య ఉండాలి. ప్రభుత్వ నిబంధనల ప్రకారం వయోపరిమితిలో సడలింపులు వర్తిస్తాయి. ఎస్సీ (SC), ఎస్టీ (ST) అభ్యర్థులకు 5 ఏళ్లు, ఓబీసీ (OBC) అభ్యర్థులకు 3 ఏళ్లు, పీడబ్ల్యూబీడీ (PwBD) అభ్యర్థులకు 10 ఏళ్ల వరకు మినహాయింపు ఉంటుంది.

ఎంపిక విధానం.. 

అభ్యర్థుల ఎంపిక ప్రక్రియ పూర్తిగా పారదర్శకంగా నిర్వహించబడుతుంది. దరఖాస్తు చేసుకున్న అభ్యర్థులు వారి విద్యార్హత పరీక్షల్లో సాధించిన మెరిట్ మార్కుల ఆధారంగా ఎంపిక చేయబడతారు. ఎంపికైన అభ్యర్థులకు డాక్యుమెంట్ వెరిఫికేషన్, వైద్య పరీక్షలు నిర్వహించిన అనంతరం విధుల్లోకి తీసుకుంటారు.

దరఖాస్తు ప్రక్రియ..

అర్హత కలిగిన అభ్యర్థులు కేవలం ఆన్‌లైన్ ద్వారా మాత్రమే దరఖాస్తు చేసుకోవాలి. 2026 ఫిబ్రవరి 7వ తేదీ నుంచి దరఖాస్తు ప్రక్రియ ప్రారంభమైంది. దరఖాస్తు చేయడానికి చివరి తేదీ 2026 ఫిబ్రవరి 20. అభ్యర్థులు గడువు ముగిసేలోపు IOCL అధికారిక వెబ్‌సైట్ సందర్శించి, సరైన ధ్రువపత్రాలతో తమ దరఖాస్తులను సమర్పించాల్సి ఉంటుంది. కెరీర్ ప్రారంభంలో ప్రభుత్వ రంగ సంస్థలో శిక్షణ పొందాలనుకునే వారికి ఇది ఒక గొప్ప అవకాశం.

అఫీషియల్ వెబ్ సైట్: https://iocl.com/

ALSO READ: Kavitha: నిరుద్యోగుల నోట్లో మట్టి.. రాష్ట్రంలో ఉద్యోగ నోటిఫికేషన్లు ఎక్కడ..? రేవంత్ సర్కార్‌పై కవిత ఫైర్