డయాబెటిస్ (షుగర్ వ్యాధి, మధుమేహం) నియంత్రించాలంటే మందులతో పాటు ఆహారంపై కూడా ప్రత్యేక శ్రద్ధ అవసరం. ముఖ్యంగా రాత్రి తీసుకునే భోజనం చాలా కీలకం. చాలా మంది పగటిపూట డైటింగ్ పాటించినా, రాత్రి భోజనంలో మాత్రం నిర్లక్ష్యం చేస్తుంటారు. నిపుణుల అభిప్రాయం ప్రకారం.. రాత్రి భోజనం తేలికగా, తక్కువ కార్బోహైడ్రేట్లు, ఎక్కువ ప్రోటీన్, ఫైబర్ కలిగి ఉండాలి. అలాంటి ఆహారం నెమ్మదిగా జీర్ణమవుతుంది. దీంతో రక్తంలో చక్కెర స్థాయిలు ఒక్కసారిగా పెరగకుండా ఉండటానికి సహాయపడుతుంది. అలాగే ఎక్కువసేపు ఆకలి వేయకుండా కూడా ఉంచుతుంది.
రాత్రి అన్నం తినే అలవాటు ఉన్నవారు తెల్ల బియ్యం బదులుగా బ్రౌన్ రైస్ లేదా గోధుమ రవ్వను ఉపయోగించడం మంచిది. సోయా చంక్స్లో ప్రోటీన్ అధికంగా ఉంటుంది. క్యారెట్, బీన్స్, బఠానీ, ఉల్లిపాయ, జీరా, బిర్యానీ ఆకు వేసి ఒకే పాత్రలో ఉడికించుకోవచ్చు. ఈ భోజనం ఫైబర్, ప్రోటీన్, అవసరమైన పోషకాలతో నిండి ఉంటుంది. ఇది రాత్రి భోజనానికి మంచి ఎంపిక.
రాత్రి తేలికగా తినాలనుకునేవారికి మొలకల సలాడ్ మంచి ఆప్షన్. మొలకెత్తిన ధాన్యాల్లో విటమిన్లు, పోషకాలు ఎక్కువగా ఉంటాయి. ఇవి సులభంగా జీర్ణమవుతాయి. మొలకెత్తిన పెసలు, నల్ల శనగలు, దోసకాయ, టమాటా, ఉల్లిపాయ, కొత్తిమీర కలిపి సలాడ్ తయారు చేయాలి. కొద్దిగా మిరియాల పొడి, రాక్ సాల్ట్, నిమ్మరసం కలిపితే రుచిగా ఉంటుంది. ఈ సలాడ్లో ఫైబర్ ఎక్కువగా ఉండటంతో ఎక్కువసేపు కడుపు నిండినట్లు ఫీలింగ్ కలుగుతుంది.
వేయించిన శనగపిండితో తయారయ్యే సత్తుకు గ్లైసెమిక్ ఇండెక్స్ తక్కువగా ఉంటుంది. అందువల్ల ఇది రక్తంలో చక్కెరను వేగంగా పెంచదు. సత్తులో ఉల్లిపాయ, పచ్చిమిర్చి, అల్లం, వాము, ఆవనూనె, మసాలాలు కలిపి మిక్స్ తయారు చేయాలి. దీన్ని జొన్న, సజ్జ, గోధుమ పిండితో చేసిన పిండిలో నింపి తక్కువ నూనెతో కాల్చాలి. పెరుగుతో కలిపి తింటే పోషకాలు మరింత పెరుగుతాయి.
రాత్రి తేలికగా తినాలనిపిస్తే బాదం, బ్రోకలి సూప్ కూడా మంచి ఎంపిక. బ్రోకలీలో శరీరానికి ఉపయోగపడే అనేక పోషకాలు ఉంటాయి. బాదంలో ఆరోగ్యకరమైన కొవ్వులు, ప్రోటీన్ పుష్కలంగా ఉంటాయి. బ్రోకలీని ఉడికించి, వెల్లుల్లి, ఉల్లిపాయతో వేయించి, బాదంతో కలిపి గ్రైండ్ చేయాలి. తర్వాత కొద్దిగా లోఫ్యాట్ పాలు లేదా నీరు కలిపి మరిగించి మిరియాల పొడి చల్లి వేడిగా తాగాలి.
Also Read: ఖర్చు లేకుండానే డేటింగ్ చేయాలా? తక్కువ బడ్జెట్లో ఇలా ప్లాన్ చేయండి
మెంతికూరలో ఫైబర్, ఆరోగ్యానికి ఉపయోగపడే మొక్కల కాంపౌండ్స్ ఉంటాయి. శనగపిండిలో ప్రొటీన్ పుష్కలంగా ఉంటుంది. శనగపిండి, జొన్నపిండి, మెంతికూర, పెరుగు, పసుపు, ఇంగువ, పచ్చిమిర్చి పేస్ట్ కలిపి పిండి సిద్ధం చేయాలి. తర్వాత పలుచగా థేప్లాలు చేసి తక్కువ నూనెతో కాల్చాలి. పుదీనా చట్నీ లేదా పెరుగుతో తింటే రుచిగా ఉంటుంది.
డయాబెటిస్ నియంత్రణలో రాత్రి భోజనం కీలక పాత్ర పోషిస్తుంది. తృణధాన్యాలు, కూరగాయలు, ప్రోటీన్, ఫైబర్ అధికంగా ఉన్న ఆహారాన్ని ఎంచుకోవాలి. వేయించినవి, ఎక్కువ తీపి ఉన్నవి, హెవీ ఫుడ్ రాత్రివేళ తగ్గించడం మంచిది. తగినంత నీరు తాగడం, క్రమం తప్పకుండా వ్యాయామం చేయడం, సరైన మోతాదులో భోజనం చేయడం కూడా రక్తంలో షుగర్ లెవెల్స్ నియంత్రించడంలో సహాయపడుతుంది. కొత్త డైట్ను ప్రారంభించే ముందు తప్పనిసరిగా వైద్యుడి సలహా తీసుకోవాలి.
Share
నలుగురిలో నిలబడితే డిఫరెంట్గా, స్టైల్గా కనిపించాలా? దీపికా పదుకొనే ఫ్యాషన్ టిప్స్ మీ కోసం
