Vitamin D Deficiency: విటమిన్ డి లోపమా ? ఇలా చేస్తే.. ప్రాబ్లమ్ సాల్వ్

Vitamin D Deficiency: విటమిన్ డి అనేది మన శరీరానికి చాలా ముఖ్యమైన పోషకం. దీనిని “సూర్యరశ్మి విటమిన్” అని కూడా పిలుస్తారు. ఎందుకంటే సూర్యరశ్మి మన చర్మంపై పడినప్పుడు మన శరీరం సహజంగానే దీనిని ఉత్పత్తి చేస్తుంది. విటమిన్ డి, కాల్షియంను గ్రహించడానికి అంతే కాకుండా ఎముకలను పటిష్టం చేయడానికి అత్యవసరం. ఇది రోగనిరోధక వ్యవస్థ పనితీరు, కండరాల బలం, మానసిక ఆరోగ్యంవంటి అనేక ఇతర శారీరక విధుల్లో కూడా కీలక పాత్ర పోషిస్తుంది.

చాలా మందిలో ఈ విటమిన్ డి లోపం అనేది సాధారణంగా ఉన్నా, దాని లక్షణాలను గుర్తించడంలో ఆలస్యం జరుగుతుంది. ఈ లోపం యొక్క అనేక లక్షణాలు ఇతర సాధారణ ఆరోగ్య సమస్యల మాదిరిగానే ఉంటాయి. అందుకే ప్రజలు వీటిని అంతగా పట్టించుకోరు. దీన్నే డాక్టర్లు ‘నిశ్శబ్ద లక్షణం’ అని చెబుతున్నారు.

డాక్టర్లు చెప్పే నిశ్శబ్ద, ప్రమాదకరమైన లక్షణం ఏంటి ?
విటమిన్ డి లోపం యొక్క అత్యంత నిశ్శబ్దంగా, ప్రమాదకరంగా ఉండే లక్షణాలలో ఒకటి దాని ప్రభావం మానసిక ఆరోగ్యంపై చూపడం. చాలా మంది డాక్టర్లు తరచుగా దీనిని గురించి మాట్లాడరు.

దీర్ఘకాలిక అలసట, నిస్సత్తువ: ఎంత నిద్రపోయినా తగ్గని నిరంతర అలసట, బలహీనత దీని ముఖ్య లక్షణం. చాలా మంది దీనిని ఒత్తిడి లేదా సరిగా నిద్ర లేకపోవడం అని కొట్టిపారేస్తారు.

మానసిక కల్లోలం/డిప్రెషన్: ఎలాంటి స్పష్టమైన కారణం లేకుండా తరచుగా నిరాశగాఉండటం, దిగులుగా అనిపించడం, లేదా మానసిక కల్లోలం కలగడం. విటమిన్ డి మెదడులోని కొన్ని రసాయనాలను నియంత్రించడంలో సహాయపడుతుంది. కాబట్టి లోపం వల్ల ఈ సమస్యలు వస్తాయి. ఈ లక్షణాన్ని చాలా మంది విటమిన్ లోపంగా కాకుండా కేవలం మానసిక సమస్యగా మాత్రమే చూస్తారు. అందుకే ఇది ‘నిశ్శబ్దంగా’ ఉండిపోతుంది.

ఇతర సాధారణ లక్షణాలు:
నిశ్శబ్ద లక్షణంతో పాటు.. విటమిన్ డి లోపం యొక్క ఇతర సాధారణ సూచనలు.

ఎముకలు, కీళ్ల నొప్పులు : ముఖ్యంగా నడుము కింది భాగంలో, కాళ్లలో తరచుగా నొప్పిగా ఉండటం.

కండరాల బలహీనత, తిమ్మిర్లు: కండరాలు బలహీనంగా అనిపించడం, సులభంగా అలసిపోవడం లేదా తరచుగా కండరాల తిమ్మిర్లు రావడం.

తరచుగా అనారోగ్యం పాలవడం : రోగనిరోధక శక్తి తగ్గి, తరచుగా జలుబు, ఫ్లూ లేదా ఇతర ఇన్ఫెక్షన్లు రావడం.

జుట్టు రాలడం: విటమిన్ డి జుట్టు పెరుగుదలకు కూడా ముఖ్యమైనది కాబట్టి. జుట్టు అధికంగా రాలడం ఒక లక్షణం కావచ్చు.

గాయాలు మానడానికి ఎక్కువ సమయం పట్టడం : చిన్న గాయాలు లేదా దెబ్బలు కూడా త్వరగా మానకపోవడం.

ప్రమాదాలు:
విటమిన్ డి లోపాన్ని పట్టించుకోకుండా వదిలేస్తే.. అది తీవ్రమైన ఆరోగ్య సమస్యలకు దారితీయవచ్చు. అందుకే ఇది చాలా ప్రమాదకరమైంది.

బోలు ఎముకల వ్యాధి : ఎముకలు బలహీనపడి, చిన్న దెబ్బలకే విరిగే ప్రమాదం పెరుగుతుంది.

గుండె జబ్బులు, మధుమేహం ప్రమాదం: దీర్ఘకాలిక విటమిన్ డి లోపం ఈ తీవ్రమైన వ్యాధుల ప్రమాదాన్ని పెంచుతుంది.

పిల్లలలో రికెట్స్ : పిల్లలలో ఎముకలు మెత్తబడి, వంకరగా మారతాయి.

Also Read: పసుపు నీరు తాగుతున్నారా ? ముందుగా ఈ విషయాలు తెలుసుకోండి

పరిష్కారం, నివారణ:
మీకు పైన తెలిపిన లక్షణాలు ఏవైనా తరచుగా కనిపిస్తే.. వెంటనే మీ డాక్టర్‌ను సంప్రదించి.. విటమిన్ డి రక్త పరీక్ష చేయించుకోవడం చాలా అవసరం. లోపాన్ని నిర్ధారిస్తే.. డాక్టర్ సలహా మేరకు..

సూర్యరశ్మి : ప్రతిరోజూ 15-20 నిమిషాల పాటు లేత ఉదయం లేదా సాయంత్రం సూర్యరశ్మిలో ఉండటం.

ఆహారం : కొవ్వు ఎక్కువగా ఉండే చేపలు (సాల్మన్, ట్యూనా), గుడ్డు పచ్చసొన , విటమిన్ డి పటిష్టం చేసిన పాలు, పెరుగు వంటి ఆహారాలు తీసుకోవడం.

సప్లిమెంట్స్ : డాక్టర్ సిఫార్సు మేరకు విటమిన్ డి సప్లిమెంట్స్ (మాత్రలు లేదా సిరప్) తీసుకోవడం.

విటమిన్ డి లోపం నిశ్శబ్దంగా ఉన్నప్పటికీ.. దాని ప్రభావం చాలా తీవ్రంగా ఉంటుంది. సరైన సమయంలో గుర్తించి చికిత్స తీసుకోవడం ద్వారా ఆరోగ్యాన్ని మెరుగు పరుచుకోవచ్చు.