Navratri Fasting: నవరాత్రి ఉపవాస సమయంలో.. ఈ ఫుడ్ తింటే ఫుల్ ఎనర్జీ !

Navratri Fasting: నవరాత్రి.. అంటే తొమ్మిది రాత్రులు జరుపుకునే ఈ పండుగ. మన దేశంలో అత్యంత పవిత్రమైన పండగలలో ఇది కూడా ఒకటి. ఈ సమయంలో.. చాలా మంది భక్తులు దుర్గాదేవిని పూజిస్తారు. అంతే కాకుండా ఉపవాసాలు కూడా పాటిస్తారు. ఉపవాసం అంటే పూర్తిగా ఆహారం తీసుకోకపోవడం కాదు.. కొన్ని నిర్దిష్ట ఆహార పదార్థాలను మాత్రమే తీసుకోవడం. అయితే.. ఈ ఉపవాస సమయంలో శరీరానికి అవసరమైన పోషకాలు లభించకపోతే.. బలహీనంగా, నీరసంగా అనిపిస్తుంది. అందుకే నవరాత్రి ఉపవాస సమయంలో కూడా చురుకుగా, శక్తివంతంగా ఉండటానికి ఎలాంటి ఆహారం తీసుకోవాలో ఇప్పుడు తెలుసుకుందాం.

ఉపవాస సమయంలో తీసుకోవాల్సిన ఆహార పదార్థాలు:

నవరాత్రి ఉపవాసంలో కొన్ని రకాల ఆహార పదార్థాలు అస్సలు తినకూడదని చెబుతారు. ఉదాహరణకు, బియ్యం, గోధుమలు, ఉల్లిపాయలు, వెల్లుల్లి వంటివి సాధారణంగా తినరు. వాటికి బదులుగా.. ప్రత్యామ్నాయ ఆహారాలను ఎంచుకోవాలి.

పండ్లు, జ్యూస్‌లు:
పండ్లలో విటమిన్లు, మినరల్స్, ఫైబర్ పుష్కలంగా ఉంటాయి. ఇవి శరీరానికి తక్షణ శక్తిని అందిస్తాయి. అరటిపండు, ఆపిల్, దానిమ్మ, బొప్పాయి, నారింజ వంటి పండ్లను తీసుకోవడం వల్ల శరీరం హైడ్రేటెడ్‌గా ఉంటుంది. పండ్ల రసాలు కూడా చాలా మంచివి. అయితే. షుగర్ కలపకుండా తాజా జ్యూస్ లను తీసుకోవడం ఉత్తమం. ఫ్రూట్ సలాడ్ కూడా తినొచ్చు.

పాలు, పాల ఉత్పత్తులు:
పాలు, పెరుగు, పన్నీర్, లస్సీ వంటివి ఉపవాస సమయంలో తినడం మంచిది. ఎందుకంటే వీటిలో ప్రోటీన్, కాల్షియం అధికంగా ఉంటాయి. ఫలితంగా ఇవి ఎముకలను బలోపేతం చేయడమే కాకుండా.. కడుపు నిండిన భావనను కూడా కలిగిస్తాయి. పెరుగులో ఉండే ప్రోబయోటిక్స్ జీర్ణక్రియకు సహాయ పడతాయి. లస్సీ తాగడం వల్ల శరీరానికి చలవ చేస్తుంది. అంతే కాకుండా శరీరానికి అవసరం అయిన తక్షణ శక్తిని ఇది అందిస్తుంది.

కూరగాయలు:
నవరాత్రి ఉపవాసంలో తినగలిగే కొన్ని కూరగాయలు కూడా ఉన్నాయి. ఉదాహరణకు, బంగాళదుంపలు, చిలగడదుంపలు (స్వీట్ పొటాటో), గుమ్మడికాయ, పాలకూర, టమాటోల వంటివి. బంగాళదుంపలు, చిలగడదుంపలు కార్బోహైడ్రేట్లకు మంచి మూలం. ఇవి శరీరానికి అవసరమైన శక్తిని అందిస్తాయి. వాటిని ఉడికించి లేదా వేయించి కూడా తినవచ్చు. చిలగడదుంపను ఉడికించి తినడం చాలా ఆరోగ్యకరం.

పప్పులు, గింజలు:
బాదం, జీడిపప్పు, వాల్నట్స్, పిస్తా, అక్రోట్ వంటివి చాలా శక్తివంతమైనవి. వీటిలో ఆరోగ్యకరమైన కొవ్వులు, ప్రోటీన్లు, విటమిన్లు పుష్కలంగా ఉంటాయి. రోజుకు కొన్ని గింజలను తీసుకోవడం వల్ల ఆకలి నియంత్రణలో ఉంటుంది. అంతే కాకుండా ఇవి శరీరానికి కావాల్సిన శక్తిని కూడా అందిస్తాయి. ఖర్జూరం, ఎండు ద్రాక్ష వంటివి కూడా తక్షణ శక్తినిస్తాయి.

కొన్ని రకాల పిండి పదార్థాలు:
సాధారణ గోధుమ పిండికి బదులుగా, కట్టు (రాజగిర), సాబుదాన (సగ్గుబియ్యం) లేదా సింఘాడా పిండి (నీటిలో పెరిగే సింఘాడా గింజల పిండి) ఉపయోగించవచ్చు. ఈ పిండి పదార్థాలతో రొట్టెలు, పూరీలను తయారు కూడా తయారు చేసుకోవచ్చు. సగ్గుబియ్యంతో వడలు, కిచిడీ తయారు చేసుకోవడం చాలా సాధారణం. ఇవి శరీరానికి కార్బోహైడ్రేట్లు అందించి.. చురుకుగా ఉంచుతాయి.

సాల్ట్, స్పైసెస్:
సాధారణ ఉప్పుకు బదులుగా.. సైంధవ లవణం ఉపయోగించాలి. నల్ల మిరియాలు, జీలకర్ర, పచ్చిమిర్చి, అల్లం, నిమ్మరసం వంటివి వంటలలో ఉపయోగించవచ్చు.

Also Read: నవరాత్రి సమయంలో ఉపవాసం ఎందుకు ఉంటారో తెలుసా ?

శక్తివంతంగా ఉండటానికి కొన్ని చిట్కాలు:

తరచుగా తినడం: ఉపవాసం ఉన్నప్పుడు ఒకేసారి ఎక్కువ ఆహారం తీసుకోకుండా.. ప్రతి 2-3 గంటలకి కొద్ది కొద్దిగా తినాలి. ఇది రక్తంలో చక్కెర స్థాయిలను స్థిరంగా ఉంచడంలో సహాయపడుతుంది.

నీరు ఎక్కువగా తాగడం: ఉపవాస సమయంలో డీహైడ్రేషన్ కాకుండా ఉండటానికి, నీరు, నిమ్మరసం, కొబ్బరి నీరు, మజ్జిగ ఎక్కువగా తాగాలి.

కొవ్వు పదార్థాలను తగ్గించడం: నూనెలో వేయించిన పదార్థాలకు బదులుగా.. ఉడికించిన లేదా కాల్చిన ఆహారాలను తినాలి.

తగినంత నిద్ర: ఉపవాసం ఉన్నప్పుడు శరీరానికి తగినంత విశ్రాంతి అవసరం.

నవరాత్రి ఉపవాసం కేవలం ఒక నియమం కాదు. అది శరీరానికి, మనస్సుకు శుద్ధి చేసే ఒక ప్రక్రియ. సరైన ఆహారాన్ని ఎంచుకోవడం ద్వారా.. ఈ పవిత్రమైన కాలాన్ని శక్తివంతంగా, ఉత్సాహంగా ఆస్వాదించవచ్చు. పైన చెప్పిన సూచనలను పాటించి.. ఈ నవరాత్రులను ఆరోగ్యకరమైన రీతిలో జరుపుకోండి.