మహేష్ బాబు ‘వారణాసి’ విడుదలకు ముందే హైదరాబాద్‌లోకి ఐమ్యాక్స్.. ఎక్కడంటే?

Hyderabad IMAX Return: హైదరాబాద్ సినీ ప్రియులకు సరికొత్త అంతర్జాతీయ సినిమా వీక్షణ అనుభూతిని అందించేందుకు ఐమ్యాక్స్ (IMAX) సిద్ధమవుతోంది. టాలీవుడ్ సూపర్ స్టార్ మహేష్ బాబు సహ-యాజమాన్యంలోని ప్రముఖ మల్టీప్లెక్స్ బ్రాండ్ ‘AMB సినిమాస్’ వేదికగా హైదరాబాద్‌లోకి ఐమ్యాక్స్ ఫార్మాట్ ఘనంగా పునరాగమనం చేస్తోంది.

ఐమ్యాక్స్ కార్పొరేషన్ ఏషియన్ సినిమాస్ సంయుక్తంగా భారతదేశంలో మూడు సరికొత్త ‘ఐమ్యాక్స్ విత్ లేజర్’ థియేటర్లను ఏర్పాటు చేయడానికి వ్యూహాత్మక ఒప్పందాన్ని కుదుర్చుకున్నాయి. ఈ ఒప్పందంలో భాగంగా మొట్టమొదటి స్క్రీన్‌ను హైదరాబాద్‌లోని ‘AMB క్లాసిక్’ లో ఏర్పాటు చేయనున్నారు. సూపర్ స్టార్ మహేష్ బాబు, టాలీవుడ్ దిగ్గజ దర్శకుడు ఎస్.ఎస్. రాజమౌళి కాంబినేషన్‌లో ఎంతో ప్రతిష్టాత్మకంగా తెరకెక్కుతున్న ‘వారణాసి’ చిత్రం 2027లో విడుదల కానుంది. ఈ సినిమా విడుదల కంటే ముందే, అనగా 2026 చివరి నాటికి ఈ థియేటర్ ప్రేక్షకులకు అందుబాటులోకి రానుంది. మిగిలిన రెండు లోకేషన్లు 2028 నాటికి రానున్నాయి.

ఒకప్పుడు హైదరాబాద్ ‘ప్రసాద్స్ ఐమ్యాక్స్’లో 2015లో ఐమ్యాక్స్ ఫార్మాట్ నిలిచిపోయింది. నాటి నుండి గత పదేళ్లుగా నగర సినీ ప్రియులు ఈ అనుభూతికి దూరమయ్యారు. ఈ లోటును భర్తీ చేసేందుకు ఐమ్యాక్స్ సంస్థ సుదీర్ఘ కాలంగా సరైన భాగస్వామి కోసం ఎదురుచూసి, ఇప్పుడు AMB సినిమాస్‌తో జతకట్టింది. ‘వారణాసి’ చిత్రాన్ని పూర్తిగా ఐమ్యాక్స్-సర్టిఫైడ్ డిజిటల్ కెమెరాలతో చిత్రీకరిస్తున్నారు. గతంలో రాజమౌళి తెరకెక్కించిన ‘RRR’, ‘బాహుబలి 2’ చిత్రాలు ప్రపంచవ్యాప్తంగా ఐమ్యాక్స్ చరిత్రలోనే అత్యధిక వసూళ్లు సాధించిన భారతీయ చిత్రాలుగా నిలిచాయి.

ఈ కొత్త లోకేషన్లలో ఐమ్యాక్స్ అత్యంత అధునాతన లేజర్ సాంకేతికతను అమర్చనున్నారు. ఇది అద్భుతమైన 4K విజువల్స్, లీనమయ్యే సరికొత్త ఆడియో అనుభవాన్ని అందిస్తుంది. ‘AMB క్లాసిక్’ అనేది ఏషియన్ సినిమాస్‌తో పాటు ఘట్టమనేని మహేష్ బాబు, దగ్గుబాటి వెంకటేష్, సురేష్ దగ్గుబాటి, రానా దగ్గుబాటిల సంయుక్త భాగస్వామ్యంతో నడుస్తున్న సంస్థ. ఈ సరికొత్త ఐమ్యాక్స్ రాకతో హైదరాబాద్ సినీ ప్రేమికుల దశాబ్ద కాలపు నిరీక్షణకు తెరపడటమే కాకుండా, సినిమా ప్రదర్శన రంగంలో సరికొత్త ప్రమాణాలు నెలకొననున్నాయి.