Raveena Tandon: ఆ దర్శకుడి భార్యకు కాల్ చేసి సారీ చెప్పిన రవీనా టాండన్!.. ఎందుకంటే?

Raveena Tandon: బాలీవుడ్ సీనియర్ నటి రవీనా టాండన్ ఇటీవల ఒక ఆసక్తికరమైన విషయాన్ని వెల్లడించారు. దర్శకుడు ఆదిత్య ధర్ తెరకెక్కించిన బ్లాక్ బస్టర్ చిత్రం ‘ధురంధర్’ (Dhurandhar) చూసిన తర్వాత, ఆమె ఆ చిత్ర దర్శకుడి భార్య, నటి యామీ గౌతమ్‌కు ఫోన్ చేసి ‘సారీ’ చెప్పారట. ఈ వార్త ఇప్పుడు సోషల్ మీడియాలో వైరల్ అవుతోంది.

యామీ గౌతమ్‌తో..

ఒక ప్రముఖ పోడ్‌కాస్ట్ సెషన్‌లో రవీనా టాండన్ మాట్లాడుతూ, ‘ధురంధర్’ సినిమా తనపై ఎంతటి ప్రభావం చూపిందో వివరించారు. “నేను ‘ధురంధర్’ సినిమా చూసిన వెంటనే యామీ గౌతమ్‌కు ఫోన్ చేశాను. యామీ.. నన్ను క్షమించు (I am sorry), నేను ఇప్పుడు నీ భర్తకు వీరాభిమానిని అయిపోయాను. ఇకపై నా అటెన్షన్‌ను నీవు నీ భర్తతో పంచుకోవాల్సిందే అని సరదాగా చెప్పాను” అని రవీనా పేర్కొన్నారు.

దర్శకుడిపై ప్రశంసలు..

ఆదిత్య ధర్ పనితీరును రవీనా ఆకాశానికెత్తారు. “ఆదిత్య ఒక జీనియస్. సినిమా మేకింగ్‌లో ఆయన ఆలోచనలు అద్భుతం. ప్రస్తుతం భారతీయ ప్రేక్షకులు ఏం కోరుకుంటున్నారో ఆయనకు బాగా తెలుసు. ‘పుష్ప’, ‘KGF’ వంటి చిత్రాల తర్వాత, ఒక హీరోను నిజమైన హీరోగా వెండితెరపై చూడాలని ప్రేక్షకులు ఆశ పడుతున్నారు. ఆ వెలితిని ‘ధురంధర్’ భర్తీ చేసింది. దేశం ఎదుర్కొంటున్న సమస్యలను డీల్ చేస్తూనే, ఒక మాస్ హీరోను అద్భుతంగా చూపించారు” అని ఆమె కొనియాడారు.

నటనకు ఫిదా..

ఈ సినిమాలో నటించిన ప్రతి ఒక్కరినీ రవీనా అభినందించారు. ముఖ్యంగా రణవీర్ సింగ్ నటన తనను ఆకట్టుకుందని చెప్పారు. “రణవీర్ చిన్నప్పటి నుంచి నా ఫ్యాన్ అని తెలిసింది. ఈ సినిమాలో ఆయన నటన అమోఘం. సంజయ్ దత్, అక్షయ్ ఖన్నా, సారా అర్జున్ వంటి నటులు తమ పాత్రల్లో జీవించారు” అని ఆమె అన్నారు. గత ఏడాది డిసెంబర్ 5న విడుదలైన ‘ధురంధర్’, బాక్సాఫీస్ వద్ద రికార్డుల వేట కొనసాగించింది. పాకిస్థాన్‌లోని కరాచీ (లియారీ టౌన్) నేపథ్యంలో సాగే ఈ స్పై థ్రిల్లర్ ప్రపంచవ్యాప్తంగా దాదాపు రూ.1300 కోట్లు వసూలు చేసింది. కేవలం భారతదేశంలోనే రూ.800 కోట్లకు పైగా వసూళ్లు సాధించి హిందీ చిత్ర పరిశ్రమలో ఒక మైలురాయిగా నిలిచింది. ప్రస్తుతం ఈ చిత్రానికి సీక్వెల్ ‘ధురంధర్: ది రివెంజ్’ కోసం ప్రేక్షకులు ఆసక్తిగా ఎదురుచూస్తున్నారు. ఈ రెండో భాగం మార్చి 19న విడుదల కానుంది.