NEET Protest: NEET పేపర్ లీకేజీ వ్యవహారం దేశ రాజధాని ఢిల్లీని ఒక్కసారిగా వేడెక్కించింది. లక్షలాది మంది విద్యార్థుల భవిష్యత్తుతో ముడిపడి ఉన్న ఈ సున్నితమైన అంశంపై కేంద్ర ప్రభుత్వం తక్షణమే స్పందించాలంటూ ప్రతిపక్షాలు పోరుబాట పట్టాయి. లోక్సభ ప్రతిపక్ష నేత రాహుల్ గాంధీ నాయకత్వంలో విద్యాశాఖ మంత్రి ధర్మేంద్ర ప్రధాన్ రాజీనామాను డిమాండ్ చేస్తూ మంగళవారం ప్రధానమంత్రి నరేంద్ర మోదీ నివాసం ముట్టడికి యత్నించడం రాజకీయ వర్గాల్లో పెను కలకలం రేపింది. ఖర్గే నివాసం నుంచి అనూహ్యంగా బయలుదేరిన నేతలు, ఊహించని రీతిలో ప్రధాని నివాసం వద్ద బైఠాయించడంతో ఢిల్లీ పోలీసులు ఒక్కసారిగా తీవ్ర ఒత్తిడికి లోనయ్యారు.
తోపులాటలో రాహుల్కు గాయాలు..
పరిస్థితిని అదుపులోకి తెచ్చేందుకు పోలీసులు నిరసనకారులను బలవంతంగా అదుపులోకి తీసుకునే ప్రయత్నం చేశారు. ఈ క్రమంలో ప్రతిపక్ష నేతలకు, పోలీసులకు మధ్య తీవ్ర పెనుగులాట, తోపులాట చోటుచేసుకుంది. రాహుల్ గాంధీని పోలీసులు ఈడ్చుకెళ్తూ బస్సులోకి ఎక్కించే సమయంలో ఆయన ముక్కు, కంటి కింద భాగంతో పాటు ఛాతీపై స్వల్ప గాయాలయ్యాయి. రాహుల్ ముక్కు నుంచి రక్తం కారుతున్న దృశ్యాలను కాంగ్రెస్ పార్టీ తన అధికారిక ‘X’ ఖాతాలో పోస్ట్ చేయడంతో అది క్షణాల్లో నెట్టింట వైరల్గా మారింది. అయితే, అభిమానులు, మద్దతుదారులు ఆందోళన చెందాల్సిన అవసరం లేదని, అది చిన్న గాయమేనని పార్టీ వర్గాలు స్పష్టం చేశాయి.
పోలీసుల తీరుపై కాంగ్రెస్ మండిపాటు..
ప్రజాస్వామ్యయుతంగా నిరసన తెలుపుతున్న ప్రతిపక్ష నేత పట్ల పోలీసులు వ్యవహరించిన తీరును తీవ్రంగా ఖండిస్తున్నట్లు కాంగ్రెస్ వర్గాలు పేర్కొన్నాయి.
అరెస్టులు.. సోనియా గాంధీ ఎంట్రీ!
నిరసనలో పాల్గొన్న రాహుల్ గాంధీతో పాటు కాంగ్రెస్ ముఖ్య నేత ప్రియాంక గాంధీ, సమాజ్వాదీ పార్టీ అధినేత అఖిలేష్ యాదవ్, ఎన్సీపీ నాయకురాలు సుప్రియా సూలేలను పోలీసులు అరెస్ట్ చేశారు. తమను అదుపులోకి తీసుకునే క్రమంలో ప్రియాంక గాంధీ పోలీసులను తీవ్రంగా నిరోధిస్తూ ప్రభుత్వ వ్యతిరేక నినాదాలతో హోరెత్తించారు. అనంతరం రాహుల్ను ఛత్రసాల్ స్టేడియానికి, ప్రియాంకను మందిర్ మార్గ్ పోలీస్ స్టేషన్కు తరలించారు. ప్రియాంకను విడిపించేందుకు సీనియర్ నేత సోనియా గాంధీ స్వయంగా పోలీస్ స్టేషన్కు రావడం ఈ డ్రామాలో మరొక సంచలన పరిణామంగా మారింది. రాత్రి సమయంలో నేతలందరినీ పోలీసులు విడుదల చేశారు.
చర్చల ప్రతిపాదన తిరస్కరణ.. వెనక్కి తగ్గేది లేదన్న ప్రతిపక్షాలు
పరిస్థితి తీవ్రతను గమనించిన కేంద్ర సహాయ మంత్రి జితేంద్ర సింగ్, హోం కార్యదర్శి గోవింద్ మోహన్ నిరసన స్థలానికి చేరుకుని నేతలతో మాట్లాడేందుకు ప్రయత్నించారు. పార్లమెంట్ వేదికగా ఈ అంశంపై సమగ్ర చర్చ జరుపుదామని ఆహ్వానించినప్పటికీ, రాహుల్ గాంధీ ఆ ప్రతిపాదనను తేల్చి చెప్పారు. బాధ్యులైన విద్యాశాఖ మంత్రి తక్షణమే రాజీనామా చేసే వరకు, విద్యార్థులకు స్పష్టమైన న్యాయం జరిగే వరకు తమ పోరాటం ఆగదని ఖరాకండీగా స్పష్టం చేశారు. కేవలం చర్చల పేరుతో కాలాన్ని వెళ్లదీయడానికి వీల్లేదని వారు గట్టిగా నిలబడ్డారు.
ముదిరుతున్న NEET సగటు మంటలు
దేశవ్యాప్తంగా విద్యార్థులు, వారి తల్లిదండ్రులు ఎదుర్కొంటున్న మానసిక వేదనకు ఈ పోరాటం అద్దం పడుతోందని కాంగ్రెస్ తెలిపింది. నాయకుల అరెస్టులతో లేదా పోలీసుల బలప్రయోగంతో తమ నిరసన తీవ్రత ఏమాత్రం తగ్గదని, రాబోయే రోజుల్లో ఈ అంశాన్ని పార్లమెంట్ లోపల, బయట మరింత ఉధృతం చేస్తామని హెచ్చరించింది. NEET పేపర్ లీకేజీ అంశం ఇప్పుడు కేవలం విద్యార్థుల సమస్యగానే కాకుండా, కేంద్ర ప్రభుత్వానికి సవాలుగా మారిన అతిపెద్ద రాజకీయ పోరాటంగా రూపాంతరం చెందింది.
Also Read: ఆర్టీసీ బస్సు చోరీ.. మూవీ రేంజ్లో ఛేజ్.. చివరికి క్లైమాక్స్ ఏంటంటే?
Share
గంగమ్మ నిత్యం జలాభిషేకం చేసే అద్భుత శివలింగం.. ఈ దృశ్యం చూస్తే మైమరచిపోతారు!
ట్రంప్ ప్రకటన.. జెనరిక్ మందులపై 200 శాతం సుంకాలు, భారతీయ కంపెనీలపై ప్రభావం ఎంత?
