హత్య జరిగిన ప్రతీ చోట నీలం రంగు పూల మొక్క… మిస్టీరియస్ కొరియన్ సిరీస్

Political Thriller: ఇన్వెస్టిగేటివ్ సైకో థ్రిల్లర్లు అంటే ఇష్టం లేని మూవీ లవర్స్ ఉండరేమో. సైకో హింట్స్ వదులుతూ మర్డర్స్ చేయడం, పోలీసులు వాడిని పట్టుకోవడం కోసం వేటాడడం, ఒక్కో క్లూను చేదిస్తూ చివరకు కిల్లర్ దగ్గరకు చేరుకోవడం… ఇలా సీన్ టూ సీన్ క్లైమాక్స్ వరకు కళ్ళు తిప్పుకోనివ్వనంత ఇంట్రెస్టింగ్ గా ఉంటాయి ఇలాంటి థ్రిల్లర్స్. ఇక ‘లిటిల్ ఉమెన్’ (Little Women) అనే కొరియన్ సిరీస్ కూడా ఆ లిస్ట్ లో ముందు వరుసలో ఉంటుంది. 2022లో విడుదలైన ఈ సిరీస్ ఎక్కడ స్ట్రీమింగ్ అవుతోంది ? స్టోరీ ఏంటి ? అనే విషయాలను తెలుసుకుండా పదండి.

కథలోకి వెళ్తే…

లూయిసా మే అల్కాట్ నవల ఆధారంగా ఈ సిరీస్ ను తీశారు. ఆధునిక కొరియాలోని ధనికుల రాజకీయ కుట్రలు, బ్లాక్ మనీ, ముగ్గురు పేద అక్కాచెల్లెళ్ల ధైర్య సాహసాల చుట్టూ తిరుగుతుంది. సిరీస్ లో ముగ్గురు సోదరీమణులదే కీలక పాత్ర. ఓ ఇన్-జూ పెద్దమ్మాయి. కుటుంబ బాధ్యతలు మోస్తూ, డబ్బు లేకపోతే సమాజం ఎంత క్రూరంగా ప్రవర్తిస్తుందో అనుభవించిన ఈమె, తన కుటుంబం గౌరవంగా బతకాలంటే భారీగా డబ్బు సంపాదించాలని నిర్ణయిస్తుంది. ఇక రెండో అమ్మాయి పేరు ఓ ఇన్-క్యాంగ్. ఆమె నిజాయితీ గల జర్నలిస్ట్. డబ్బు కంటే నిజాయితీ, చట్టం ముఖ్యం అని నమ్ముతుంది. మూడో అమ్మాయి పేరు ఓ ఇన్-హై. ఆర్ట్స్ కాలేజీలో చదివే అద్భుతమైన పెయింటర్ ఈ చిన్నమ్మాయి. తన అక్కల త్యాగాలను, పేదరికం చూసి విసిగిపోయి, ఎలాగైనా ఆ జీవితం నుండి బయటపడాలని అనుకుంటుంది.

ఇక్కడే కథలో 70 బిలియన్ వోన్ల మిస్టరీ ట్విస్ట్ వస్తుంది. ఒక ఆఫీసులో అకౌంటెంట్‌గా పనిచేసే పెద్దక్కకు, ఆమె స్నేహితురాలు హఠాత్తుగా చనిపోతూ 70 బిలియన్ కొరియన్ వోన్ల నల్లధనాన్ని వదిలి వెళ్తుంది. ఆ డబ్బును దక్కించుకోవడంతో ఈ ముగ్గురు అక్కాచెల్లెళ్ల జీవితాలు ఒక్కసారిగా మారిపోతాయి. అయితే ఆ డబ్బు వెనుక కొరియాలోనే అత్యంత శక్తివంతమైన, క్రూరమైన ఒక రాజకీయ కుటుంబం ఉందని వారికి తెలుస్తుంది. ఆ కుటుంబం కొరియాను శాసిస్తున్న ఒక రహస్య సంఘాన్ని నడుపుతుంటుంది.

ఎక్కడ హత్య జరిగినా అక్కడ ఒక వింతైన ‘బ్లూ ఆర్కిడ్’ (నీలం రంగు పూల మొక్క) కనిపిస్తూ ఉంటుంది. రెండో చెల్లెలు ఇన్-క్యాంగ్ తన జర్నలిజం పవర్‌ తో ఆ రాజకీయ కుటుంబం చేసిన అవినీతిని, హత్యలను బయట పెట్టడానికి ప్రయత్నిస్తుంది. చిన్న చెల్లెలు ఇన్-హై తెలియకుండానే ఆ విలన్ కూతురితో స్నేహం చేసి వారి ఇంట్లోనే ఇరుక్కుపోతుంది. ఈ ముగ్గురు అక్కాచెల్లెళ్లు తమ తెలివితేటలతో ఆ మహా సామ్రాజ్యాన్ని ఎలా ఎదిరించారు ? ఆ 70 బిలియన్ల డబ్బు చివరికి ఏమైంది ? అనేది తెలియాలంటే ఈ సిరీస్ పై ఓ లుక్కేయాల్సిందే. 12 ఎపిసోడ్‌ల ఈ కొరియన్ సిరీస్ ప్రస్తుతం Netflixలో అందుబాటులో ఉంది. కానీ తెలుగులో లేదు.