Ottam Thullal OTT: ప్రకృతిని దైవంగా భావించి పూజించే సంప్రదాయం మన దేశంలో ఎన్నో ప్రాంతాల్లో కనిపిస్తుంది. ముఖ్యంగా పల్లెటూళ్లలో కొన్ని చెట్లను పవిత్రంగా భావిస్తూ, వాటి చుట్టూ ఎన్నో నమ్మకాలు, ఆచారాలు పాటిస్తుంటారు. అలాంటి ఒక పవిత్రమైన చెట్టును స్వార్థం కోసం నరికేస్తే, ఆ కుటుంబానికి ఎలాంటి పరిస్థితులు ఎదురవుతాయి? ఆ తర్వాత వరుసగా మరణాలు సంభవిస్తాయని తెలిస్తే ఆ ఇంట్లో వాళ్ల పరిస్థితి ఎలా ఉంటుంది? ఇలాంటి ఆసక్తికరమైన పాయింట్‌తో తెరకెక్కిన మలయాళ చిత్రం ‘Ottam Thullal’. అయితే ఇది కేవలం భయపెట్టే హారర్ సినిమా మాత్రమే కాదు. భయం, కుటుంబ భావోద్వేగాలు, కామెడీని కలిపి రూపొందించిన ఫ్యామిలీ ఎంటర్‌టైనర్. జీ మార్తాండన్ దర్శకత్వం వహించిన ఈ చిత్రంలో విష్ణు ఉన్నికృష్ణన్, విజయరాఘవన్, కలాభవన్ షాజోన్, హరిశ్రీ అశోకన్ కీలక పాత్రల్లో నటించారు. సెప్టెంబర్ 18న థియేటర్లలో విడుదలైన ఈ సినిమా ఇప్పుడు ఓటీటీలో అందుబాటులోకి వచ్చింది. దీని కథ ఏమిటి ? ఏ ఓటీటీలో చూడచ్చు ? తెలుగులో ఉందా ? అనే వివరాలను తెలుసుకుందాం పదండి.
మేథనమ్ అనే పల్లెటూరిలో అప్పు అనే పూజారి ఉంటాడు. ఆ ఊరిలో వందల ఏళ్ల చరిత్ర కలిగిన ఒక పవిత్రమైన పాల చెట్టు ఉంటుంది. గ్రామస్తులు ఆ చెట్టును ఎంతో భక్తితో చూస్తుంటారు. అయితే రాజన్ (విజయరాఘవన్) ఆ చెట్టును నరికేయాలని నిర్ణయించుకుంటాడు. పూజారి అప్పు ఎంతగా హెచ్చరించినా పట్టించుకోకుండా తన నిర్ణయాన్ని అమలు చేస్తాడు. కానీ ఆ నిర్ణయం తన కుటుంబానికి ఎలాంటి ముప్పు తీసుకొస్తుందో అతడికి తెలియదు. చెట్టును నరికిన మూడు రోజులకే రాజన్ అనూహ్య పరిస్థితుల్లో మరణిస్తాడు. దీంతో అప్పు మరో సంచలన విషయం చెబుతాడు. రాబోయే 16 రోజుల్లో రాజన్ కుటుంబానికి చెందిన మరో ఐదుగురు మరణిస్తారని చెబుతాడు. ఈ మాటలతో అప్పటివరకు సాధారణంగా ఉన్న ఆ కుటుంబంలో ఒక్కసారిగా భయం మొదలవుతుంది. ఎప్పుడు ఎవరి ప్రాణం పోతుందోనని అందరూ ఆందోళన చెందుతుంటారు.
అయితే రాజన్ కొడుకు మాత్రం ఈ విషయాలను అస్సలు నమ్మడు. పూజారి చెప్పిన మాటలన్నీ మూఢనమ్మకాలేనని కొట్టిపారేస్తాడు. మరణాల గురించి భయపడుతున్న కుటుంబ సభ్యుల మధ్య అతడి ప్రవర్తన మరింత గందరగోళానికి దారితీస్తుంది. ఆ 16 రోజుల గడువులో కుటుంబ సభ్యులను కాపాడుకోవడానికి అతను చేసే ప్రయత్నాలు, ఎదురయ్యే విచిత్రమైన సంఘటనలే సినిమాలో ఆసక్తికరమైన అంశాలు. ఒకవైపు ఏదో అరిష్టం జరగబోతోందనే భయం, మరోవైపు ఆ భయాన్ని నమ్మని వ్యక్తి చేసే హాస్యభరితమైన ప్రయత్నాలతో కథ ముందుకు సాగుతుంది. మరి పూజారి చెప్పినట్లుగానే కుటుంబంలో మరిన్ని మరణాలు జరుగుతాయా? లేక రాజన్ కొడుకు ఆ ప్రవచనం వెనుక ఉన్న అసలు విషయాన్ని బయటపెడతాడా? అనేది తెరపై చూడాలి.
ఈ సినిమాలో విష్ణు ఉన్నికృష్ణన్, విజయరాఘవన్ ప్రధాన పాత్రల్లో నటించగా.. కలాభవన్ షాజోన్, హరిశ్రీ అశోకన్, పౌలీ వాల్సన్, టినీ టామ్, మనోజ్ కె.యు. తదితరులు కీలక పాత్రలు పోషించారు. జీ మార్తాండన్ దర్శకత్వం వహించగా, బిను ససిరామ్ కథా రచన, స్క్రీన్‌ప్లే బాధ్యతలు చేపట్టారు. రాహుల్ రాజ్ సంగీతం అందించారు. సుమారు 1 గంట 56 నిమిషాల నిడివి ఉన్న ఈ సినిమా నవంబర్ 6 నుంచి Amazon Prime Videoలో అందుబాటులో ఉంది. ఇది మలయాళ ఆడియోతో, ఇంగ్లిష్ సబ్‌టైటిల్స్‌తో లభిస్తోంది. తెలుగు డబ్బింగ్ ప్రస్తుతం అందుబాటులో లేదు.
Read Also: ఆసుపత్రిలో దాడి… అదే సమయంలో ఫ్యామిలీ ఎమర్జెన్సీ… గూస్‌బంప్స్ తెప్పించే మలయాళ మిస్టరీ థ్రిల్లర్
Share
పులిని చూసి నక్క వాతలు పెట్టుకుంటే పులి అవ్వదు.. కేటీఆర్ గడ్డం పై సీఎం రేవంత్ కౌంటర్!
మేడ్చల్‌లో మిషన్ భగీరథ నీరు రోడ్డుపాలు.. పట్టించుకోని అధికారులు!
