The Grand Master OTT: సాధారణంగా స్పోర్ట్స్ డ్రామాలు అనగానే క్రికెట్, ఫుట్‌బాల్, బాక్సింగ్ వంటి ఆటల నేపథ్యంలో తెరకెక్కిన సినిమాలు గుర్తుకొస్తాయి. కానీ చదరంగం లాంటి మైండ్ గేమ్‌ను నేపథ్యంగా తీసుకొని, దాని చుట్టూ పేదరికం, సామాజిక వివక్ష, తల్లీకొడుకుల అనుబంధాన్ని కలిపి తెరకెక్కించిన తమిళ చిత్రం ‘ది గ్రాండ్ మాస్టర్’ (The Grand Master). కేవలం ఆటలో గెలవడం మాత్రమే కాదు.. సమాజం విధించే అడ్డంకులను దాటుకొని తన కలను నెరవేర్చుకోవడం ఎంత కష్టమో ఈ సినిమా చూపిస్తుంది. వెట్రి చెలియన్ దర్శకత్వం వహించిన ఈ చిత్రం నవంబర్ 6 నుంచి Sun NXT ఓటీటీలో అందుబాటులోకి వచ్చింది.
ఈ తమిళ స్పోర్ట్స్ డ్రామా చిత్రం సాధారణంగా ఉండే క్రీడా కథలకు భిన్నంగా, పేదరికం, సామాజిక వివక్ష మరియు ఒక తల్లి పడే త్యాగం చుట్టూ తిరుగుతుంది. చెన్నైలోని ఒక సాధారణ ప్రాంతానికి చెందిన పదేళ్ల బాలుడు నందన్‌కు చదరంగం (చెస్) అంటే ప్రాణం. ఆ మైండ్ గేమ్‌లో అద్భుతమైన ప్రతిభ ఉన్నప్పటికీ, పేదరికం, సమాజంలో ఎదురయ్యే కులవివక్ష అతని ప్రయాణానికి పెద్ద అడ్డంకులుగా మారుతాయి. మరోవైపు నందన్ తల్లి వెల్లయ్యమ్మ పారిశుద్ధ్య కార్మికురాలిగా పనిచేస్తూ కుటుంబాన్ని పోషిస్తుంటుంది. కొడుకు చెస్ మీద పెడుతున్న శ్రద్ధను చూసి మొదట్లో ఆమె ఆందోళన చెందినా, ఆ తర్వాత నందన్‌లో ఉన్న నిజమైన పట్టుదలను గుర్తిస్తుంది.
ఇక సమాజం నుంచి ఎన్ని అవమానాలు ఎదురైనా, తన బిడ్డ కలను నిజం చేయడానికి ఆ తల్లి తన వంతుగా ఎంతగానో పోరాడుతుంది. చివరికి నందన్ ఆ అడ్డంకులన్నింటినీ దాటి చెస్ ప్రపంచంలో తన ప్రతిభను నిరూపించుకున్నాడా లేదా, ఆ తల్లి కష్టాలు ఎలాంటి ఫలితాన్నిచ్చాయి అనేదే ఈ చిత్రంలోని భావోద్వేగమైన కథాంశం. తల్లీకొడుకుల మధ్య వచ్చే ఎమోషనల్ సీన్స్ ఈ సినిమాకు హైలైట్‌గా నిలుస్తాయి.
ఈ సినిమాలో అబర్నతి, లింగేష్, మాస్టర్ అశ్విన్, సురేష్ చంద్ర మీనన్, వెట్రి చెలియన్, తమిళరసి, అన్బు తదితరులు కీలక పాత్రల్లో నటించారు. వెట్రి చెలియన్ కథ అందించడంతో పాటు దర్శకత్వం కూడా వహించారు. దినేష్ ఆంటోనీ సంగీతం సమకూర్చగా, అర్జున్ రవి, జ్ఞానశేఖర్ ఆర్.ఎస్. సినిమాటోగ్రఫీ బాధ్యతలు నిర్వహించారు. 2026 సెప్టెంబర్ 25న థియేటర్లలో విడుదలైన ఈ సినిమా సుమారు 2 గంటల 11 నిమిషాల నిడివితో సాగుతుంది. ప్రస్తుతం నవంబర్ 6 నుంచి ఇది తమిళ భాషలో మాత్రమే అందుబాటులో ఉంది. తెలుగు డబ్బింగ్ వెర్షన్ ప్రస్తుతానికి అందుబాటులో లేదు.
Read Also: గల్లీ నుంచి గ్లోబల్ స్టేజ్ వరకు మనవడి మ్యూజికల్ బాక్సాఫీస్ సునామీ… గానా రికార్డుల మోత
Share
లిటిల్ హార్ట్స్‌కు భారీ లాభాలు.. కానీ నాకు మాత్రం.. మౌళి షాకింగ్ కామెంట్స్ !
చికెన్ కంటే పవర్‌ఫుల్.. పొట్ట ఆరోగ్యాన్ని కాపాడే 5 సూపర్ వెజిటేరియన్ ప్రోటీన్ ఫుడ్స్ ఇవే!
