Kerala Medu Vada Recipe: కేరళ స్టైల్ మెదు వడలు.. ఇంట్లోనే క్రిస్పీగా తయారు చేయండిలా !

Kerala Medu Vada Recipe: సౌత్ ఇండియాలో బ్రేక్ ఫాస్ట్ అనగానే..అందరికీ గుర్తొచ్చేది వేడివేడి ఇడ్లీ , క్రిస్పీగా ఉండే మెదు వడ. ముఖ్యంగా కేరళ స్టైల్‌లో చేసే మెదు వడలు పైన కరకరలాడుతూ.. లోపల దూదిలా మెత్తగా ఉండి అద్భుతమైన రుచిని ఇస్తాయి. సరైన పద్ధతిలో పిండిని రుబ్బడం, అవసరం అయిన అన్ని పదార్థాలు కలపడం ద్వారా హోటల్ స్టైల్ వడలను మనం ఇంట్లోనే సులభంగా తయారు చేసుకోవచ్చు. కొబ్బరి చట్నీ లేదా సాంబార్‌తో ఈ వడలను తింటే.. ఆ రుచే వేరు. దీనిని ఎలా చేయాలో ఇప్పుడు తెలుసుకుందాం.

కావలసిన పదార్థాలు:

మినపప్పు: 2 కప్పులు

పచ్చిమిర్చి: 3-4

అల్లం:ఒక అంగుళం ముక్క

కరివేపాకు:రెండు రెమ్మలు

మిరియాలు: 1 టీస్పూన్

ఉల్లిపాయ: 1

బియ్యం పిండి: 2 టేబుల్ స్పూన్లు

ఉప్పు: రుచికి తగినంత

నూనె: వేయించడానికి సరిపడా

తయారీ విధానం:
1. మొదట మినపప్పును శుభ్రంగా కడిగి, కనీసం 3 నుంచి 4 గంటల పాటు తగినన్ని నీళ్లలో నానబెట్టాలి. పప్పు బాగా నానితేనే వడలు మెత్తగా వస్తాయి.

2. నానిన పప్పులోని నీటిని పూర్తిగా వడకట్టి, గ్రైండర్‌లో లేదా మిక్సీలో వేయాలి. రుబ్బేటప్పుడు నీటిని చాలా తక్కువగా (అవసరమైతేనే స్పూన్లతో) పోయాలి. పిండి వెన్నలా మెత్తగా, గట్టిగా ఉండాలి.

3. రుబ్బిన పిండిని ఒక గిన్నెలోకి తీసుకుని, చేత్తో ఒకే దిశలో 5 నిమిషాల పాటు బాగా కలపాలి. దీనివల్ల పిండిలో గాలి చేరి వడలు గుల్లగా వస్తాయి.

4. ఇప్పుడు ఈ పిండిలో సన్నగా తరిగిన ఉల్లిపాయలు, పచ్చిమిర్చి, అల్లం, కరివేపాకు, మిరియాల పొడి, బియ్యం పిండి, రుచికి సరిపడా ఉప్పు వేసి బాగా కలుపుకోవాలి.

5. బాణలిలో నూనె వేడి చేయాలి. చేతిని నీళ్లతో తడుపుకుని, కొంచెం పిండిని తీసుకుని గుండ్రంగా చేసి మధ్యలో రంధ్రం చేయాలి.

6. కాగుతున్న నూనెలో జాగ్రత్తగా వడలను వేయాలి. మంటను మీడియం ఫ్లేమ్‌లో ఉంచి.. రెండు వైపులా గోల్డెన్ బ్రౌన్ కలర్ వచ్చే వరకు వేయించి తీయాలి.

Share

• 
• 
• 
• 
• 
•