Spicy Paniyaram: స్పైసీ గుంతపొంగనాలు ఇలా చేస్తే కొబ్బరి చట్నీతో రుచి అదిరిపోతుంది

ఉదయం బ్రేక్ ఫాస్ట్ ఏం చేయాలా? అని ఆలోచిస్తున్నారా? స్పైసీ గుంత పొంగనాలు చేసి చూడండి. చాలా టేస్టీగా ఉంటాయి. దీన్ని ఉదయం బ్రేక్‌ఫాస్ట్‌గానే కాదు, సాయంత్రం స్నాక్‌గా కూడా చేసుకుని తినవచ్చు. సాధారణంగా ఇడ్లీ లేదా దోశ పిండితో చేసే ఈ వంటకం చేసేందుకు ఎక్కువ సమయం కూడా పట్టదు. కొంచెం మసాలా, ఉల్లిపాయలు కలిపి తయారు చేసే ఈ గుంతపొంగనాలు అందరికీ నచ్చుతాయి.

స్పైసీ గుంతపొంగనాలు రెసిపీకి కావాల్సిన పదార్థాలు
బియ్యం – రెండు కప్పులు
మినపప్పు – అర కప్పు
మెంతులు – అర స్పూన్
ఉల్లిపాయలు – రెండు
పచ్చిమిర్చి – 3 లేదా 4
అల్లం – చిన్న ముక్క
కరివేపాకులు – గుప్పెడు
ఆవాలు – ఒక స్పూన్
జీలకర్ర – అర స్పూన్
ఇంగువ – ఒక చిటికెడు
ఉప్పు – తగినంత
నూనె – అవసరమైనంత

Also read: Tan Removal tips: వేసవిలో ముఖానికి నల్లటి ట్యాన్ పట్టేసిందా? సింపుల్ గా ఇలా వదిలించేసుకోండి

స్పైసీ గుంతపొంగనాలు రెసిపీ
1. మొదట బియ్యం, మినపప్పు, మెంతులు మూడింటినీ బాగా కడిగి ఒక గిన్నెలో వేసి సుమారు 4 గంటల పాటు నీటిలో నానబెట్టాలి.
2. తరువాత నీరు వంపి మిక్సీలో వేసి మెత్తగా రుబ్బాలి. ఈ పిండిలో కొద్దిగా ఉప్పు వేసి బాగా కలపాలి. ఇప్పుడు ఈ పిండిని కనీసం 7 నుంచి 8 గంటలు లేదా రాత్రంతా మూతపెట్టి ఉంచాలి.
3. ఒక కళాయి స్టవ్ మీద పెట్టి తీసుకుని అందులో ఒక స్పూన్ నూనె వేసి వేడి చేయాలి. నూనె వేడిగా అయ్యాక ఆవాలు, జీలకర్ర వేయాలి.
4. అవి చిటపటలాడిన తర్వాత పచ్చిమిర్చి, అల్లం, కరివేపాకు వేయాలి. తరువాత సన్నగా తరిగిన ఉల్లిపాయలు వేసి బాగా వేయించాలి.
5. ఉల్లిపాయలు కొద్దిగా బంగారు రంగులోకి మారే వరకు వేయిస్తే మంచి రుచి వస్తుంది. చివరగా ఒక చిటికెడు ఇంగువ వేసి స్టవ్ ఆఫ్ చేయాలి. ఈ మసాలా మిశ్రమాన్ని పులిసిన పిండిలో వేసి బాగా కలపాలి.
6. ఇప్పుడు గుంత పొంగనాలు వేసే పాన్ తీసుకుని స్టవ్ మీద పెట్టాలి. చిన్న చిన్న గుంతల్లో కొద్దిగా నూనె వేయాలి.
7. తరువాత చెంచాతో పిండిని ప్రతి గుంతలో పోయాలి. కళాయిపై మూత పెట్టి మధ్యస్థ మంటపై 3 నుంచి 4 నిమిషాలు ఉంచాలి.
8. రెండు వైపులా బంగారు రంగు వచ్చే వరకు వేయించాలి. ఇలా రెండు వైపులా బాగా వేగిన తర్వాత గుంతపొంగనాలు తీసి ప్లేట్‌లో పెట్టుకోవాలి. అంతే స్పైసీ గుంత పొంగనాలు సిద్ధమైనట్టే.

వేడివేడిగా ఈ గుంత పొంగనాలు కొబ్బరి చట్నీ, టమాటా చట్నీ లేదా సాంబార్‌తో తింటే చాలా బాగుంటాయి. సాయంత్రం టీ టైమ్‌లో కూడా ఇది మంచి స్నాక్‌గా ఉపయోగపడుతుంది.