ది రెడ్ బ్యాగ్ మూవీ రివ్యూ.. క్రైమ్ థ్రిల్లర్ మెప్పించిందా?

The Red Bag Movie Review:మహిళా నేపథ్యంలో సినిమాలు అడపాదడపా ప్రేక్షకుల ముందుకు వస్తున్న విషయం తెలిసిందే. అలాంటి చిత్రాలలో ది రెడ్ బ్యాగ్ చిత్రం కూడా ఒకటి. రాధ్య , మోనిక, ఆకాంక్ష ప్రధాన పాత్రలో నటించగా.. సీనియర్ హీరోయిన్ రాశి కీలక పాత్రలో వచ్చిన చిత్రం ఇది. క్రైమ్ మిస్టరీ, సస్పెన్స్, రివేంజ్ థ్రిల్లర్ మూవీగా ది రెడ్ బ్యాగ్ మూవీని రూపొందించారు. రవికుమార్ సీరపు దర్శకత్వం వహించగా.. మెమొరీ మేకర్స్ పతాకం పై తెరకెక్కిన ఈ చిత్రం మహిళా శక్తి , మాతృత్వం వంటి అంశాలను మేలవించారు. శుక్రవారం ఆగస్టు 21న ప్రేక్షకుల ముందుకు వచ్చిన ఈ సినిమా ప్రేక్షకులను ఎంతవరకు మెప్పించింది ? అనేది ఇప్పుడు చూద్దాం..

ది రెడ్ బ్యాగ్ మూవీ స్టోరీ..

మహిళలపై జరిగే దోపిడీ, మాతృత్వం, ప్రతీకారం వంటి అంశాలను క్రైమ్ థ్రిల్లర్ ఫార్మాట్‌లో చెప్పే ప్రయత్నమే ‘ది రెడ్ బ్యాగ్’. చీకటి ప్రపంచంలో చిక్కుకున్న మహిళలు తమ జీవితాలపై తిరిగి ఎలా పట్టు సాధించారనే అంశం చుట్టూ కథ తిరుగుతుంది. స్టోరీ విషయానికి వస్తే.. అరిజోనాలోని ఓ లగ్జరీ పబ్‌లో విన్నీ డ్యాన్సర్‌గా పనిచేస్తుంటుంది. ఆ పబ్ వెనుక మైక్ నడిపించే అక్రమ కార్యకలాపాలు బయటపడతాయి. ఇదే సమయంలో ముగ్గురు భారతీయ యువతులు కూడా ఆ వ్యవస్థలో చిక్కుకుంటారు. మరి విన్నీ అక్కడికి ఎలా వచ్చింది? ఆ ముగ్గురి జీవితాల్లో దాగున్న నిజాలేంటి? మైక్ నెట్‌వర్క్ నుంచి వారు ఎలా బయటపడేందుకు ప్రయత్నించారు? ‘రెడ్ బ్యాగ్’ కథలో ఎందుకు కీలకంగా మారింది? అనే ప్రశ్నలకు సమాధానంగా సినిమా ముందుకు సాగుతుంది.

also read:అమీర్ లోగ్ మూవీ రివ్యూ.. పాతబస్తీ గల్లీ స్నేహం వర్కౌట్ అయ్యిందా?

ది రెడ్ బ్యాగ్ ప్లస్ పాయింట్స్:

రాధ్య నటన విన్నీ పాత్రలో సినిమాకు మంచి బలాన్ని ఇస్తుంది. ముఖ్యంగా భావోద్వేగ సన్నివేశాల్లో ఆమె పెర్ఫార్మెన్స్ ఆకట్టుకుంటుంది.

నలుగురు మహిళల చుట్టూ కథను నడిపిస్తూ మహిళల పోరాటాన్ని ఎమోషనల్‌గా చూపించే ప్రయత్నం చేశారు.

మాతృత్వానికి సంబంధించిన ఎమోషనల్ ట్రాక్ కథకు ఒక ప్రత్యేకమైన నేపథ్యాన్ని అందిస్తుంది.

కెమెరా వర్క్, బ్యాక్‌గ్రౌండ్ స్కోర్ థ్రిల్లర్ వాతావరణాన్ని క్రియేట్ చేయడంలో సహాయపడ్డాయి.

సీరియస్ కథనానికి మధ్యలో వచ్చే కామెడీ సన్నివేశాలు కొంత రిలీఫ్ ఇస్తాయి.

ది రెడ్ బ్యాగ్ మైనస్ పాయింట్స్:

మొదటి భాగంలో కథ పూర్తిగా వేగం అందుకోవడానికి కొంత సమయం పడుతుంది.

కొన్ని సన్నివేశాల్లో థ్రిల్ కంటే కథను వివరించే విధానం ఎక్కువగా కనిపిస్తుంది.

సెకండాఫ్‌లోని ఫ్లాష్‌బ్యాక్ ఎపిసోడ్స్‌లో కొన్ని విషయాలు ముందుగానే ఊహించే అవకాశం ఉంటుంది.

కొన్ని సన్నివేశాలను కుదించి ఉంటే రన్‌టైమ్, పేసింగ్ మరింత బెటర్‌గా ఉండేవి.

ప్రతీకారం, క్రైమ్ అంశాలకు ఇంకా బలమైన స్క్రీన్‌ప్లే ట్రీట్‌మెంట్ ఉంటే ప్రభావం పెరిగేది.

చివరి ఆఖరి మాటగా :

‘ది రెడ్ బ్యాగ్’లో కాన్సెప్ట్‌కు మంచి బలం ఉంది. మహిళల పోరాటాన్ని క్రైమ్, రివేంజ్, ఎమోషన్‌తో కలిపి చెప్పిన ప్రయత్నం ఆసక్తికరంగానే ఉంటుంది. అయితే కథలోని ముఖ్యమైన మలుపులు మరింత బిగువుగా, వేగంగా తెరకెక్కి ఉంటే థ్రిల్లర్ ఇంపాక్ట్ ఎక్కువగా ఉండేది. సందేశం అలాగే ఎమోషన్ ఉన్న క్రైమ్ డ్రామాలను ఇష్టపడేవారికి ఓసారి ప్రయత్నించొచ్చు. కానీ ఎడ్జ్-ఆఫ్-ది-సీట్ థ్రిల్లర్ ఆశిస్తే అంచనాలు కాస్త తగ్గించుకోవాలి.