Uttuttha Herolu: ‘ఉత్తుత్త హీరోలు’ చేసిన సినిమా ఎలా ఉందో తెలియాలంటే?.. ఈ రివ్యూలో..

Uttuttha Herolu: యూట్యూబ్ లో చిన్న వీడియోలతో బాగా పాపులర్ అయిన మహేష్ విట్టా.. ప్రస్తుతం ‘ఉత్తుత్త హీరోలు’ సినిమాతో ప్రేక్షకుల ముందుకు వచ్చారు. ఈ చిత్రం ఫిబ్రవరి 27, 2026న థియేటర్లలో విడుదలయ్యింది. మహేష్ విట్టా ఈ సినిమాతో హీరోగా పరిచయం అవ్వడమే కాకుండా, స్వయంగా నిర్మించారు. వాల్తేరు వినయ్ దర్శకత్వంలో రూపొందించిన ఈ చిత్రంపై ఇప్పటికే ప్రేక్షకులు మంచి అంచనాలు పెట్టుకున్నారు. ఇప్పటికే విడుదలైన ప్రచార చిత్రాలు మంచి బజ్ క్రియేట్ చేశాయి. అయితే ప్రేక్షకుల ముందుకు వచ్చిన ఈ సినిమా ప్రేక్షకులను ఎంత వరకూ మెప్పించింది ఫుల్ రివ్యూ ఇక్కడ తెలుసుకుందాం.

కథ

రాయలసీమ నేపథ్యంతో సాగే ఈ కథ నలుగురు యువకుల చుట్టూ తిరుగుతుంది. సినిమా ఇండస్ట్రీలో తాము అనుకున్న ప్రాజెక్టును పూర్తి చేయడానికి వారికి 30 లక్షల రూపాయల అవసరం పడుతుంది. ఆ డబ్బు కోసం వారు చేసే ప్రయత్నాలు, కిడ్నాప్ ప్లాన్‌లు, ఆ క్రమంలో వారు చిక్కుకునే హాస్యభరితమైన ఇబ్బందులే ఈ సినిమా ప్రధాన కథాంశం. చివరకి వారకి కావాల్సిన రూ.30 లక్షలు సమకూరాయా? కిడ్నాప్ ప్రయత్నం ఏం అయింది? కామిడీ టైమింగ్స్ తో అందరినీ అలరించే మహేష్ విట్టా ప్రేక్షకులను అలరించాడో లేదో తెలియాలంటే సినిమా చూడాల్సిందే.

విశ్లేషణ

ఈ సినిమాలో హీరోగా చేసిన మహేష్ విట్టా తనదైన రాయలసీమ యాసతో, టైమింగ్‌తో సినిమాను భుజాన వేసుకున్నారు. ఇతర నటీనటులు ప్రవీణ సోని, వాల్తేర్ వినయ్ తమ పాత్రలకు న్యాయం చేశారు. దర్శకుడిగా వాల్తేరు వినయ్ తొలి ప్రయత్నంలోనే ‘క్రైమ్ కామెడీ’ జానర్‌ను ఎంచుకుని ఆకట్టుకున్నారు. సినిమా ఇండస్ట్రీలోని కష్టాలను వ్యంగ్యంగా చూపిస్తూనే, వినోదాన్ని పంచే ప్రయత్నం చేశారు. జాన్ కె జోసెఫ్ అందించిన సంగీతం, ఛోటా కె ప్రసాద్ ఎడిటింగ్ సినిమా వేగానికి తోడ్పడ్డాయి. సినిమాటోగ్రఫీ విషయానికి వస్తే.. రాయలసీమ ప్రాంతపు సహజత్వాన్ని స్క్రీన్ మీద బాగా చూపించారు.