అమెజాన్‌లో మరోసారి భారీ లేఆఫ్స్.. ఏకంగా 14వేల మందిపై వేటుకు సిద్ధం!

ప్రముఖ అంతర్జాతీయ ఇ-కామర్స్ దిగ్గజం అమెజాన్ మరోసారి సంచలన నిర్ణయం తీసుకోబోతోంది. ప్రపంచవ్యాప్తంగా ఉన్న తన సిబ్బందిలో భారీ కోత విధించేందుకు సిద్ధమవుతున్నట్లు తెలుస్తోంది. వచ్చే నెలలో దాదాపు 14,000 మంది ఉద్యోగులను తొలగించనున్నట్లు ఆసియా బిజినెస్ అవుట్‌లుక్ తాజాగా వెల్లడించింది. ఇప్పటికే పలు దఫాలుగా వేలాది మందిని ఇంటికి పంపిన ఈ సంస్థ మళ్లీ లేఆఫ్స్ బాట పట్టడం ఆందోళన కలిగిస్తోంది.

ఈ దఫా తొలగింపుల్లో ప్రధానంగా అమెజాన్ వెబ్ సర్వీసెస్ (AWS) విభాగం ప్రభావితం కానుంది. దీంతో పాటు రిటైల్ అలాగే హెచ్ఆర్ విభాగాల్లో పనిచేసే సిబ్బందిపై కూడా వేటు పడనుందని నివేదికలు స్పష్టం చేస్తున్నాయి. ఖర్చులను తగ్గించుకోవడంతో పాటు సంస్థాగత పునర్నిర్మాణంలో భాగంగానే ఈ నిర్ణయం తీసుకున్నట్లు సమాచారం. అయితే ఈ లేఆఫ్స్ వార్తలపై అమెజాన్ యాజమాన్యం ఇప్పటివరకు ఎలాంటి అధికారిక ప్రకటన విడుదల చేయలేదు.

గత కొద్దికాలంగా అమెజాన్ వరుసగా ఉద్యోగుల సంఖ్యను తగ్గిస్తూ వస్తోంది. 2025 చివరి నాటికి సుమారు 14,000 మందిని తొలగించిన సంస్థ.. ఈ ఏడాది జనవరిలోనే ఏకంగా 16,000 మందిని విధుల నుంచి తొలగించింది. తాజా నిర్ణయంతో మొత్తం తొలగింపుల సంఖ్య మరింత పెరగనుంది. ప్రపంచవ్యాప్తంగా నెలకొన్న ఆర్థిక అనిశ్చితి వల్ల టెక్ కంపెనీలు తమ వ్యయ నియంత్రణపై దృష్టి సారించడమే ఇందుకు ప్రధాన కారణంగా కనిపిస్తోంది.

కేవలం అమెజాన్ మాత్రమే కాకుండా ఐటీ రంగంలోని ఇతర దిగ్గజ సంస్థలు కూడా ఇదే బాటలో నడుస్తున్నాయి. ఇటీవల కాలంలో ఒరాకిల్, మైక్రోసాఫ్ట్, టీసీఎస్ వంటి దిగ్గజాలు పెద్ద ఎత్తున లేఆఫ్స్ ప్రకటించాయి. యాక్సెంచర్ కూడా భారీగా సిబ్బందిని తగ్గించుకుంది. సోషల్ మీడియా దిగ్గజం మెటా సైతం త్వరలోనే 15,000 మంది ఉద్యోగులను తొలగించేందుకు ప్రణాళికలు సిద్ధం చేస్తున్నట్లు విశ్లేషకులు చెబుతున్నారు.

టెక్ రంగంలో కొనసాగుతున్న ఈ పరిణామాలు ఉద్యోగుల్లో తీవ్ర అభద్రతా భావాన్ని కలిగిస్తున్నాయి. ఏఐ (ఆర్టిఫిషియల్ ఇంటెలిజెన్స్) వంటి కొత్త టెక్నాలజీల రాకతో పాటు వ్యాపార నమూనాల్లో వస్తున్న మార్పులు కూడా ఈ తొలగింపులకు దారితీస్తున్నాయి. అమెజాన్ వంటి సంస్థలో వచ్చే నెలలో జరగబోయే ఈ మార్పులు మార్కెట్ విశ్లేషకుల్లో తీవ్ర చర్చకు దారితీస్తున్నాయి. రాబోయే రోజుల్లో మరిన్ని విభాగాలు ఈ ప్రభావాన్ని ఎదుర్కోవాల్సి రావచ్చని హెచ్చరికలు వినిపిస్తున్నాయి.

ALSO READ: స్కూటీలో రూ.5 లక్షలు వదిలి.. ఉల్లిపాయలు చౌకగా వస్తాయని వెళ్లాడు, కట్ చేస్తే..