Apple M5 Chip : కొత్త చిప్ సెట్ కు యాపిల్ గ్రీన్ సిగ్నల్.. ఇకపై ప్రాసెసర్ మరింత వేగంగా!

Apple M5 Chip : టెక్‌ దిగ్గజం యాపిల్‌ గురించి ప్రత్యేకంగా చెప్పనక్కర్లేదు. ఈ యాపిల్లో ఏ సిరీస్, ఎమ్ సిరీస్ చిప్స్తో కలగలిపిన system on a chip (SoC) ప్రాసెసర్ ఉంటుందన్న సంగతి తెలిసిందే. ఈ డిజైన్ సీపీయూ (సెంట్రల్ ప్రాసెసింగ్ యూనిట్), జీపీయూ (గ్రాఫిక్స్ ప్రాసెసింగ్ యూనిట్) ను ఒకే చిప్లో ఇంటిగ్రేడ్ చేస్తుంది. యాపిల్ ఈ రెండింటిని కలగలపడం ద్వారా దాని డివైసెస్ పనితీరు, అందులోని ప్రాసెసర్ స్పీడ్ ను మెరుగుపరుచుకుంది. ఇప్పటి వరకూ యాపిల్ డివైజస్ లో ఇదే ప్రాసెస్ కొనసాగగా.. తాజాగా మరో నిర్ణయం తీసుకుంది ఈ టెక్ దిగ్గజం.

ప్రముఖ స్మార్ట్ ఫోన్ తయారీ సంస్థ యాపిల్ ఓ కొత్త కీలక నిర్ణయం తీసుకోబోతున్నట్లు తెలిసింది. తన డివైసెస్లో ఓ మేజర్ ఛేంజ్ చేయబోతుందట. యాపిల్ అనలిస్ట్ మింగ్ చి కు (Ming-Chi Kuo) ఈ విషయాన్ని వెల్లడించింది. అప్కమింగ్ M5 ప్రో చిప్లో ఈ మేజర్ ఛేంజ్ ఉండబోతుందట. యాపిల్ ఇంటిగ్రేటెడ్ SoC డిజైన్ను మార్చబోతుందట. కొత్త డిజైన్లో సీపీయూ, జీపీయూను వేరు వేరుగా డిజైన్ చేయబోతుందట ఈ కంపెనీ.

ఆ రెండు కారణాల వల్లే –

ఈ మేజర్ ఛేంజ్ను చేయడానికి రెండు కారణాలు ఉన్నాయట. మరింత మెరుగైన పనితీరు, మెరుగైన ఉత్పత్తి కోసం యాపిల్ ఈ నిర్ణయం తీసుకుందట. సీపీయూ, జీపీయూను వేరు చేయడం వల్ల యాపిల్ టీఎస్ఎమ్సీ లేటెస్ట్ చిప్ ప్యాకేజింగ్ టెక్నాలజీని (SoIC-mH) తీసుకునే అడ్వాంటేజ్ ఉంటుంది.

ఈ అడ్వాన్స్డ్ ప్యాకేజింగ్ చిప్సెట్స్ థెర్మల్ పెర్ఫార్మెన్స్ను మెరుగుపరుస్తుంది. అంటే చిప్ ఓవర్హీటింగ్ అవ్వకుండా ఎక్కువ కాలం పాటు మన్నికంగా పనిచేస్తుంది. అలాగే దీని వల్ల చిప్స్ తయారీ ప్రక్రియలో లోపాలను తగ్గించడంతో పాటు అధిక నాణ్యత చిప్స్ను అందించవచ్చు.

ఈ కొత్త డిజైన్ కేవలం ఎమ్ 5 ప్రోకు మాత్రమే కాదు, ఎమ్ 5 మ్యాక్స్, ఎమ్ 5 అల్ట్రా వేరియంట్స్ లోనూ ఉపయోగపడుతుంది. ఈ హై ఎండ్ చిప్స్ను అడ్వాన్సడ్ చిప్ మ్యాన్యుఫ్యాక్చరింగ్ ప్రాసెస్ అయిన టీఎస్ఎమ్సీ N3P నోడ్ ద్వారా తయారు చేస్తారు. ఎమ్ 5 చిప్ 2025 ప్రథమార్థంలో, ఎమ్ 5 ప్రో, ఎమ్ 5 మ్యాక్ ఆ తర్వాత ఏడాది, ఎమ్ 5 అల్ట్రా 2026లో లాంఛ్ చేసే అవకాశముంది.

ఇకపోతే ఈ ఏడాదిలోనే యాపిల్‌ తన ఆర్టిఫిషియల్‌ ఇంటెలిజెన్స్ సాంకేతికతను తన డివైజుల్లో తీసుకొచ్చిన సంగతి తెలిసిందే. పలు సందర్భాల్లో యాపిల్ ఏఐ తప్పుడు సమాచారాన్ని అందించి తీవ్రంగా విమర్శలను ఎదుర్కొంది. అయితే ఇప్పుడు యాపిల్ తన ఆర్టిఫిషియల్ ఇంటెలిజెన్స్ను కూడా మరింత మెరుగుపరిచే దిశగా ముందుకు వెళ్లేందుకు సిద్ధమైందని తెలిసింది. ఎమ్ 5 ప్రో చిప్, యాపిల్ ఇంటెలిజెన్స్ సర్వర్స్తో పని చేయనున్నాయని తెలిసింది. టెక్ పరిశ్రమలో పనితీరు, సామర్థ్యం, ఉత్పత్తి సవాళ్లను సమతుల్యం చేయడంలో పెరుగుతున్న సంక్లిష్టతను కూడా తగ్గించడానికి యాపిల్ ప్రయత్నాలు చేస్తోంది. ఇక రాబోయో యాపిల్ గ్యాడ్జెట్స్ లో సైతం కొత్త చిప్ సెట్స్ రాబోతున్నాయని టెక్ వర్గాలు అంచనా వేస్తున్నాయి.