Jacques Kallis : ఒకప్పుడు విదేశాల్లో ఆడాలంటే…భారత్ ఆటగాళ్లు చాలా కష్టాలు పడేవారు. కాలక్రమంలో నెమ్మదిగా అక్కడి వాతావరణ పరిస్థితులకి అలవాటు పడ్డారు. అంతేకాదు ఆధునిక శిక్షణలో భాగంగా రాటు దేలారు. విదేశీ కోచ్ లు వచ్చారు. ఆటలో మార్పులు వచ్చాయి. సాంకేతికత పెరిగింది. టెక్నిక్ మెరుగుపడింది. అలా ఆస్ట్రేలియా, న్యూజిలాండ్, ఇంగ్లాండ్ తదితర దేశాల్లో ఒకొక్క సిరీస్ లను గెలుస్తున్నారు.
కానీ దశాబ్దాలుగా సౌతాఫ్రికా గడ్డపై మాత్రం గెలవలేక పోతున్నారు. ఇప్పటి వరకు 8 టెస్ట్ సిరీస్ లు జరిగాయి. ఒక్కటి కూడా విజయం సాధించలేదు. అంత గొప్ప ట్రాక్ రికార్డ్ ఉన్న ధోనీ కూడా 1-1 తో డ్రా చేసుకుని బయట పడ్డాడు. అదొక్కటే ఉపశమనం తప్ప, మిగిలిన ఏడింట ఇండియా పరాజయం పాలైంది.
ఈ నేపథ్యంలో సౌతాఫ్రికా ఆల్ రౌండర్ వెటరన్ ప్లేయర్ జాక్వెస్ కలిస్ మాట్లాడుతూ టీమ్ ఇండియా విజయం సాధించాలంటే ఇదొక్కటే మార్గం ఉందని తెలిపాడు. సొంత గడ్డపై, పిచ్ లు వాటి పరిస్థితులు, ఇంకా కిటుకులు , సౌతాఫ్రికా టీమ్ బలహీనతలు చెబుతాడని అనుకుంటే, అంతా తూచ్ అన్నాడు.
ఇంతకీ తను చెప్పిందేమిటంటే… విరాట్ కొహ్లీ ఒక్కడు ఆడితే చాలు…టీమిండియా గెలుస్తుందని చిలకజోస్యం చెప్పాడు. కొహ్లీ క్రీజులోకి వెళ్లాక ఆడకుండా ఎలా ఉంటాడు? కావాలని అవుట్ అవడు కదా…అని నెటిజన్లు కామెంట్ చేస్తున్నారు.
కలిస్ ఏమంటున్నాడంటే… తను సీనియర్ కాబట్టి, జూనియర్స్ కి అతని విలువైన సూచనలు ఉపయోగపడతాయి. తను చెప్పినట్టు వాళ్లు ఆడగలిగితే, సౌతాఫ్రికాపై విజయం సాధించడం అంత పెద్ద కష్టమేం కాదని అంటున్నాడు.
కొహ్లీ రాణిస్తే విజయావకశాలు వాటంతటవే వస్తాయని అన్నాడు. ఎందుకంటే సౌతాఫ్రికా గడ్డపై ఆడిన అనుభవం తనకి ఉందని తెలిపాడు. అప్పుడు నేర్చుకున్న పాఠాలని కుర్రాళ్లకి నేర్పిస్తే చాలని తెలిపాడు.
సౌతాఫ్రికాలో టెస్టుల్లో కోహ్లికి మంచి రికార్డు ఉంది. 14 ఇన్నింగ్స్ ల్లో 719 పరుగులు చేశాడు. అందులో 51.36 సగటుతో ఉన్నాడు. అందులో రెండు సెంచరీలు, మూడు హాఫ్ సెంచరీలు కూడా ఉన్నాయి.
మరింతమంది ఆశలు పెట్టుకున్న విరాట్ కొహ్లీ ఏం చేస్తాడో చూడాలని అంతా ఆసక్తిగా ఎదురుచూస్తున్నారు.