Addanki Dayakar: సైబరాబాద్, మల్కాజిగిరి కార్పొరేషన్లతో భాగ్యనగర దశ తిరగబోతోంది: ఎమ్మెల్సీ డాక్టర్ అద్దంకి దయాకర్!

Addanki Dayakar: హైదరాబాద్ మహానగరాన్ని మూడు విభాగాలుగా పునర్విభజించాలనే ప్రభుత్వ నిర్ణయం నగర ప్రజల జీవన ప్రమాణాలను మెరుగుపరచడంతో పాటు, పరిపాలనలో విప్లవాత్మక మార్పులకు శ్రీకారం చుట్టబోతోందని తెలంగాణ కాంగ్రెస్ ఎమ్మెల్సీ డాక్టర్ అద్దంకి దయాకర్ ధీమా వ్యక్తం చేశారు. ప్రస్తుతం ఉన్న గ్రేటర్ హైదరాబాద్ మున్సిపల్ కార్పొరేషన్ (GHMC) పరిధిలో కోటి 20 లక్షల మందికి పైగా జనాభా ఉన్నారని, ఇంతటి భారీ జనాభా కలిగిన నగరాన్ని ఒకే కేంద్రం నుండి పాలించడం వల్ల సమస్యల పరిష్కారంలో తీవ్ర జాప్యం జరుగుతోందని ఆయన విశ్లేషించారు. తాను స్వయంగా ఎక్స్ అఫీషియల్ మెంబర్‌గా ఉన్న అనుభవంతో చెబుతున్నానని, కౌన్సిల్ సమావేశాల్లో కార్పొరేటర్లకు గానీ, సభ్యులకు గానీ ప్రజా సమస్యలను ప్రస్తావించడానికి తగిన సమయం దొరకడం లేదని ఆయన ఆవేదన వ్యక్తం చేశారు.

ఈ విభజన ద్వారా అధికార వికేంద్రీకరణ జరిగి, ప్రజలకు పాలన మరింత చేరువవుతుందని అద్దంకి దయాకర్ పేర్కొన్నారు. హైదరాబాద్‌ను మూడు కార్పొరేషన్లుగా విభజించడం వల్ల ప్రాంతీయ కార్యాలయాలు అందుబాటులోకి వస్తాయని, తద్వారా సామాన్య ప్రజలు తమ సమస్యల కోసం సుదూర ప్రాంతాల నుండి ప్రధాన కార్యాలయానికి రావాల్సిన అవసరం ఉండదని వివరించారు. ఈ నిర్ణయం వల్ల కౌన్సిల్ సమావేశాలు సమర్థవంతంగా జరుగుతాయని, స్థానిక సమస్యలపై త్వరితగతిన నిర్ణయాలు తీసుకోవడానికి వీలవుతుందని ఆయన అన్నారు. వేగవంతమైన అభివృద్ధికి ఈ నిర్ణయం ఒక గొప్ప ఊతం ఇస్తుందని, అందుకే ముఖ్యమంత్రి తీసుకున్న ఈ చారిత్రాత్మక నిర్ణయాన్ని తామంతా మనస్ఫూర్తిగా స్వాగతిస్తున్నామని తెలిపారు.

విపక్షాల విమర్శలపై స్పందిస్తూ, బీఆర్ఎస్ నేతలు కేవలం రాజకీయ ఉద్దేశాలతోనే ఈ నిర్ణయాన్ని వ్యతిరేకిస్తున్నారని అద్దంకి మండిపడ్డారు. గత పదేళ్లలో బీఆర్ఎస్ ప్రభుత్వం నగరాన్ని తమ గుప్పెట్లో ఉంచుకోవాలని చూసిందే తప్ప, ప్రజా సౌకర్యాల గురించి ఆలోచించలేదని ఆరోపించారు. అప్పటి మున్సిపల్ శాఖ మంత్రి కేటీఆర్ అధికారులకు అందుబాటులో ఉండేవారు కాదని, ఫలితంగా ఎన్నో సమస్యలు ప్రజలను వేధించాయని ఆయన గుర్తు చేశారు. ఇప్పుడు ముఖ్యమంత్రి ఈ నిర్ణయాన్ని పబ్లిక్ డొమైన్‌లో పెట్టి, విపక్షాల మరియు ప్రజల అభిప్రాయాలను తీసుకున్న తర్వాతే ముందుకు వెళ్తున్నారని స్పష్టం చేశారు. ఇందులో ఎలాంటి వ్యక్తిగత ఎజెండా లేదని, కేవలం పరిపాలనా సౌలభ్యం కోసమే ఈ అడుగు వేసినట్లు వివరించారు.

భవిష్యత్తులో హైదరాబాద్ భారతదేశంలోనే అతిపెద్ద నగరంగా ఆవిర్భవించబోతోందని అద్దంకి దయాకర్ ఆశాభావం వ్యక్తం చేశారు. ముఖ్యంగా ఔటర్ రింగ్ రోడ్ పరిధి వరకు నగరం విస్తరించిన నేపథ్యంలో, హైదరాబాద్‌కు “భారతదేశపు ఫ్యూచర్ సిటీ”గా ఉండే అన్ని అర్హతలు ఉన్నాయని పేర్కొన్నారు. ఈ అభివృద్ధి పథంలో భాగస్వామ్యం కావాల్సిన విపక్షాలు, అనవసరమైన రాద్ధాంతం మానుకోవాలని ఆయన హితవు పలికారు. నగరాభివృద్ధి కోసం తీసుకున్న ఈ పర్ఫెక్ట్ నిర్ణయానికి ప్రజలందరూ మద్దతు తెలపాలని ఆయన కోరారు.