Cabinet: రేవంత్ సర్కార్ కీలక నిర్ణయం.. బీసీలకు 42% రిజర్వేషన్లు, డిసెంబర్‌లో సర్పంచ్ ఎన్నికలు?

సౌదీ అరేబియాలో జరిగిన బస్సు ప్రమాదంలో మరణించిన బాధిత కుటుంబాలకు ప్రభుత్వం రూ. 5 లక్షల చొప్పున పరిహారం అందించాలని కేబినెట్ నిర్ణయించింది. మత సంప్రదాయాల ప్రకారం మృతదేహాలను అక్కడే ఖననం చేసేందుకు ఏర్పాట్లు చేస్తూ, ఒక్కో కుటుంబం నుంచి ఇద్దరు సభ్యులను సౌదీకి తీసుకెళ్లడానికి ప్రభుత్వం సహకరిస్తుంది. ఈ ప్రక్రియను పర్యవేక్షించేందుకు మంత్రి అజారుద్దీన్, ఎంఐఎం ఎమ్మెల్యే, మైనారిటీ అధికారిలతో కూడిన ప్రభుత్వ బృందాన్ని వెంటనే సౌదీకి పంపాలని నిర్ణయించారు.

ప్రముఖ కవి, రాష్ట్ర గీత రచయిత అందెశ్రీ మరణం నేపథ్యంలో, ఆయన కుమారుడు ఎ. దత్త సాయికి డిగ్రీ కాలేజీ అసిస్టెంట్ ప్రొఫెసర్ ఉద్యోగం కల్పించేందుకు కేబినెట్ ఆమోదం తెలిపింది. తెలంగాణ ఉద్యమంలో అందెశ్రీ పాత్రను భావితరాలకు తెలియజేయడానికి అందెశ్రీ స్మృతి వనం ఏర్పాటు చేయాలని, అలాగే ఆయన రచించిన జయ జయ హే తెలంగాణ గీతాన్ని పాఠశాల పాఠ్యపుస్తకాల్లో చేర్చాలని నిర్ణయించారు.

ఇతర ముఖ్య నిర్ణయాలలో.. ఎస్ఆర్ఎస్పీ స్టేజ్ 2 మెయిన్ కెనాల్‌కు మాజీ మంత్రి దివంగత రాంరెడ్డి దామోదర్ రెడ్డి పేరు పెట్టేందుకు (RDR ఎస్ఆర్ఎస్పీ స్టేజ్ 2 కెనాల్) కేబినెట్ ఆమోదం తెలిపింది. అలాగే, అవుటర్ రింగ్ రోడ్ (ORR) లోపల ఉన్న ఇండస్ట్రియల్ ల్యాండ్‌ను మల్టీ యూజ్ జోన్స్ గా మార్చేందుకు హైదరాబాద్ ఇండస్ట్రియల్ ల్యాండ్స్ ట్రాన్స్‌ఫర్మేషన్ పాలసీ (HILTP)కి ఆమోదముద్ర పడింది. పంచాయతీ ఎన్నికలను డిసెంబర్ నెలలోనే పూర్తి చేయాలని నిర్ణయిస్తూ, రిజర్వేషన్ల జాబితా కోసం వారం రోజుల్లో డెడికేటెడ్ కమిషన్ నుంచి నివేదిక కోరాలని అధికారులను ఆదేశించింది. ప్రజా ప్రభుత్వం ఏర్పడి రెండేళ్లు పూర్తవుతున్న సందర్భంగా డిసెంబర్ 8, 9 తేదీల్లో తెలంగాణ రైజింగ్ గ్లోబల్ సమ్మిట్-2025 నిర్వహించాలని.. 9వ తేదీన తెలంగాణ రైజింగ్-2047 విజన్ డాక్యుమెంట్ ఆవిష్కరించాలని నిర్ణయం తీసుకున్నారు.

ALSO READ: Medchal District: మేడ్చల్ జిల్లాలో చైన్ స్నాచర్ల హల్చల్.. గంటల వ్యవధిలోనే దారుణం.. మహిళలే వీళ్ల టార్గెట్