Indian Racing League: రేసింగ్ లీగ్‌లో వరుస ప్రమాదాలు.. మహిళా రేసర్‌ కు గాయాలు..

Indian Racing League: ప్రెస్టీజియస్ ఈవెంట్. హైదరాబాద్ పేరు మారుమోగిపోయే రేసింగ్. అలాంటి ఇండియన్ రేసింగ్ లీగ్ లో వరుస ప్రమాదాలు జరుగుతున్నాయి. రేసింగ్ అన్నాక.. యాక్సిడెంట్స్ కామనే అయినా.. ఏర్పాట్లలో మన తప్పులూ ఉన్నాయా? అనే అనుమానం తలెత్తుతోందని అంటున్నారు.

అంతర్జాతీయ ప్రమాణాలతో రేసింగ్ ట్రాక్ ఏర్పాటు చేశామని చెప్పింది తెలంగాణ సర్కారు. అయితే, శనివారం జరిగిన రేసింగ్ లో ప్రసాద్ ఐమాక్స్ దగ్గర జరిగిన ప్రమాదం ఏర్పాట్లలో లోపాలను తెలియజేస్తోందని ఆరోపిస్తున్నారు. రేసింగ్ జరుగుతుండగా.. చెట్టు కొమ్మ విరిగి కారుపై పడింది. రేసర్ అలర్ట్ గా ఉండటంతో డ్యామేజ్ తప్పింది. రేసింగ్ లీగ్ అంటే జస్ట్ ట్రాక్ మాత్రమే కాదుగా.. మిగతా అరేంజ్ మెంట్స్ కూడా ముఖ్యమనే విషయం మన అధికారులకు తెలీలేదేమో అంటున్నారు. ఇంత పెద్ద ఈవెంట్ లో చెట్టు కొమ్మ విరగి పడటం అనేది చిన్న విషయమైతే కాకపోవచ్చు.

ఇక ఆదివారం మరో ప్రమాదం. ఎన్టీఆర్ మార్గ్‌లోని మూల మలుపు దగ్గర అదుపు తప్పి రెండు కార్లు ఢీకొన్నాయి. చెన్నై టర్బోరైడర్స్ టీమ్‌కు చెందిన మహిళా రేసర్ ప్రమాదానికి గురవడం కలకలం రేపింది. కారును కంట్రోల్ చేయలేక ఢీకొట్టి ఉంటే ఓకే. కానీ, మూల మలుపు దగ్గరే ఈ యాక్సిడెంట్ కావడంతో ట్రాక్ నిర్మాణంలో టెక్నికల్ లోపాలేమైనా ఉన్నాయా? అనే అనుమానం వ్యక్తం చేస్తున్నారు నిపుణులు. ప్రస్తుతానికైతే ఇది జస్ట్ కార్లు ఢీకొన్న ప్రమాదంగానే చూస్తున్నారు.