Medigadda Barrage: పార్లమెంటులో కేంద్రం సంచలన ప్రకటన.. అత్యంత ప్రమాదకర స్థితిలో మేడిగడ్డ బ్యారేజ్!

Medigadda Barrage: దేశంలో డ్యాంల భద్రత, పాత డ్యాంల ప్రస్తుత పరిస్థితిపై పార్లమెంటులో కేంద్ర జలశక్తి శాఖ మంత్రి రాజ్‌భూషణ్ చౌదరి కీల‌క ప్ర‌క‌ట‌న చేశారు. ముఖ్యంగా తెలంగాణలోని మేడిగడ్డ (లక్ష్మీ) బ్యారేజ్‌ను అత్యంత ప్రమాదకరమైన ‘క్యాటగిరి-1’ కింద వర్గీకరించినట్లు కేంద్రం స్పష్టం చేసింది. డ్యాంల భద్రతపై లోక్‌సభలో టిడిపి ఎంపీలు జి. లక్ష్మీనారాయణ, డాక్టర్ బైరెడ్డి శబరిలు అడిగిన ప్రశ్నలకు జలశక్తి శాఖ సహాయ మంత్రి లిఖితపూర్వక సమాధానం ఇచ్చారు. 2025 వర్షాకాలం తర్వాత నిర్వహించిన తనిఖీ నివేదికల ఆధారంగా దేశవ్యాప్తంగా మూడు డ్యాంలు తీవ్రమైన భద్రతా లోపాలతో ఉన్నట్లు గుర్తించగా, అందులో మేడిగడ్డ బ్యారేజ్ ఒకటి.

నేషనల్ డ్యాం సేఫ్టీ అథారిటీ (NDSA) సేకరించిన సమాచారం ప్రకారం, దేశంలో 50 ఏళ్లు పైబడిన పాత డ్యాంలు మొత్తం 1,681 ఉన్నాయని కేంద్రం వెల్లడించింది. డ్యాంల భద్రతా చట్టం 2021 నిబంధనల ప్రకారం, ప్రతి డ్యాం యజమాని ఏటా వర్షాకాలానికి ముందు, వర్షాకాలం తర్వాత తనిఖీలు నిర్వహించాల్సి ఉంటుంది. ఈ క్రమంలో 2025 సంవత్సరంలో వర్షాకాలం కంటే ముందు 6,524 డ్యాంలను, వర్షాకాలం తర్వాత 6,553 డ్యాంలను అధికారులు తనిఖీ చేశారు. ఈ తనిఖీల ఆధారంగా డ్యాంల మరమ్మతుల అత్యవసరాన్ని బట్టి మూడు విభాగాలుగా విభజించారు. ఇందులో ‘క్యాటగిరి-1’ అంటే అత్యంత తీవ్రమైన లోపాలు ఉండి, వెంటనే చర్యలు తీసుకోకపోతే అవి వైఫల్యానికి దారితీసే ప్రమాదం ఉందని అర్థం.

మేడిగడ్డ బ్యారేజ్‌తో పాటు ఉత్తరప్రదేశ్ లోని లోయర్ ఖజూరీ డ్యాం, జార్ఖండ్ లోని బొకారో బ్యారేజ్‌లు కూడా ఈ ప్రమాదకర విభాగంలో ఉన్నాయి. లోయర్ ఖజూరీ మరియు బొకారో బ్యారేజ్‌లను పునరావాసం, భద్రతా పెంపు కోసం ‘డ్యామ్ రిహాబిలిటేషన్ అండ్ ఇంప్రూవ్‌మెంట్ ప్రాజెక్ట్’ (DRIP) ఫేజ్-2 కింద చేర్చినట్లు కేంద్రం తెలిపింది. అయితే మేడిగడ్డ బ్యారేజ్ విషయంలో, దాని నిర్మాణ సమగ్రతను కాపాడేందుకు నేషనల్ డ్యాం సేఫ్టీ అథారిటీ సిఫార్సు చేసిన వివిధ నివారణ, ఉపశమన చర్యలను అమలు చేయాలని తెలంగాణ రాష్ట్ర ప్రభుత్వాన్ని కోరినట్లు మంత్రి వివరించారు.

ప్రస్తుతం కేంద్ర ప్రభుత్వం 19 రాష్ట్రాల్లోని 736 డ్యాంల పునరుద్ధరణ కోసం 10,211 కోట్ల రూపాయల అంచనాతో డ్రిప్ (DRIP) ఫేజ్-II మరియు III పథకాలను అమలు చేస్తోంది. డిసెంబర్ 31, 2025 నాటికి ఈ పథకం కింద 2,029 కోట్ల రూపాయల వ్యయం చేసినట్లు కేంద్రం వెల్లడించింది. డ్రిప్ ఫేజ్-II కింద తెలంగాణ రాష్ట్రానికి 100 కోట్ల రూపాయల నిధులను కేటాయించినట్లు బడ్జెట్ వివరాల్లో పేర్కొన్నారు. పాత డ్యాంల భద్రతను పర్యవేక్షిస్తూ, ప్రమాదాలను నివారించేందుకు కేంద్రం నిరంతరం రాష్ట్ర ప్రభుత్వాలతో సమన్వయం చేసుకుంటున్నట్లు మంత్రి రాజ్‌భూషణ్ చౌదరి తన సమాధానంలో పునరుద్ఘాటించారు.

Read Also: Roja on Tirumala Laddu Issue: జగన్ కాళ్లు కడిగి.. ఆ నీళ్లను పవన్ తన నెత్తిన చల్లుకోవాలి.. రోజా ఫైర్

Share

• 
• 
• 
• 
• 
•