Gold Theft: జువెలరీ షాపులో కస్టమర్‌గా ప్రవేశించి, యజమాని దృష్టి మరల్చి బంగారు చెవి రింగులను అపహరించిన వ్యక్తిని మేడిపల్లి పోలీసులు అరెస్టు చేశారు. నిందితుడి నుంచి చోరీకి గురైన నాలుగు తులాల బంగారు ఆభరణాలను స్వాధీనం చేసుకున్నారు. అనంతరం న్యాయస్థానంలో హాజరుపరిచి రిమాండ్‌కు తరలించారు. మేడ్చల్‌-మల్కాజిగిరి జిల్లా బోడుప్పల్‌లోని వీరారెడ్డి నగర్‌ ఎక్స్‌ రోడ్డులో ఉన్న రాందేవ్‌ జువెలరీ షాపునకు ఈ నెల 2న సాయంత్రం 7 గంటల సమయంలో ఓ వ్యక్తి కస్టమర్‌గా వచ్చాడు.
షాపు యజమాని పనిలో నిమగ్నమై ఉండటాన్ని గమనించి, ఆయన దృష్టి మరల్చి బంగారు చెవి రింగులను అపహరించి అక్కడి నుంచి వెళ్లిపోయాడు. ఈ ఘటనపై బాధితుడి ఫిర్యాదుతో మేడిపల్లి పోలీస్‌ స్టేషన్‌లో కేసు నమోదైంది. ఇన్‌స్పెక్టర్‌ జలంధర్‌ రెడ్డి ఆధ్వర్యంలో దర్యాప్తు చేపట్టిన పోలీసులు సాంకేతిక ఆధారాలతో నిందితుడిని గుర్తించారు. హనుమకొండ జిల్లా వడ్డేపల్లికి చెందిన శ్రీపతి నగేష్‌ (41)ను అరెస్టు చేశారు. విచారణలో అప్పులు, ఆర్థిక ఇబ్బందుల కారణంగా చోరీకి పాల్పడినట్లు నిందితుడు వెల్లడించాడు.
కేసును త్వరితగతిన ఛేదించి నిందితుడిని అరెస్టు చేయడంతో పాటు చోరీ సొత్తును స్వాధీనం చేసుకున్న మేడిపల్లి పోలీసు అధికారులను, సిబ్బందిని మల్కాజిగిరి పోలీస్‌ కమిషనర్‌, ఉప్పల్‌ డీసీపీ అభినందించారు. జువెలరీ షాపుల యజమానులు అప్రమత్తంగా ఉండాలని, దుకాణాల్లో సీసీటీవీ కెమెరాలు ఏర్పాటు చేసుకోవాలని, ఆభరణాలు చూపించే సమయంలో తగిన జాగ్రత్తలు తీసుకోవాలని ఇన్‌స్పెక్టర్‌ జలంధర్‌ రెడ్డి సూచించారు. అనుమానాస్పద వ్యక్తులు కనిపిస్తే వెంటనే పోలీసులకు సమాచారం అందించాలని కోరారు.
Also Read: ‘తప్పు నంబర్ డయల్ చేశారు.. ధర్నా చేసుకోండి’.. రిజర్వేషన్లపై సుప్రీం ఆసక్తికర వ్యాఖ్యలు!
Share
రామాయణ సినిమాకు దిల్ రాజు రివ్యూ.. ఆ పాత్ర పై ప్రశంసలు!
ఏడుగురు రాజకుమారులు... ఒక్కోరికీ ఒక్కో శక్తి... యానిమే లవర్స్ కు ఫుల్ మీల్స్
