తెలంగాణ అసెంబ్లీ వేదికగా ముఖ్యమంత్రి రేవంత్ రెడ్డి అధ్యక్షతన మంత్రివర్గ సమావేశం జరిగింది. అసెంబ్లీ కమిటీ హాల్లో జరిగిన ఈ భేటీలో రాష్ట్ర ప్రయోజనాలకు సంబంధించిన పలు కీలక అంశాలపై మంత్రులు సుదీర్ఘంగా చర్చించారు. పాలనా సంస్కరణలు ప్రజా సంక్షేమమే ధ్యేయంగా ఈ సమావేశంలో చారిత్రక నిర్ణయాలు తీసుకున్నారు.
ఈ భేటీలో గిగ్ వర్కర్ల సామాజిక భద్రత బిల్లు 2025పై ప్రధానంగా దృష్టి సారించారు. డెలివరీ బాయ్స్ క్యాబ్ డ్రైవర్లు వంటి అసంఘటిత రంగ కార్మికులకు అండగా నిలవాలని ప్రభుత్వం నిర్ణయించింది. రాష్ట్రవ్యాప్తంగా సుమారు మూడు నుంచి నాలుగు లక్షల మందికి ఈ చట్టం ద్వారా నేరుగా ప్రయోజనం చేకూరనుంది. వారి సంక్షేమం కోసం ప్రత్యేక నిధి ఏర్పాటుతో పాటు ప్రమాద బీమా వైద్య సదుపాయాలు కల్పించే దిశగా అడుగులు పడ్డాయి. దేశంలోనే ఆదర్శంగా నిలిచేలా ఈ బిల్లును రూపొందించారు.
మరోవైపు హైదరాబాద్ నగర సమగ్ర అభివృద్ధి కోసం పాత జీహెచ్ఎంసీ చట్టంలో సమూల మార్పులు చేయనున్నారు. కాలం చెల్లిన పాత నిబంధనల స్థానంలో సరికొత్త ‘కోర్ అర్బన్ యాక్ట్’ డ్రాఫ్ట్ బిల్లును ప్రవేశపెట్టేందుకు కేబినెట్ సుముఖత వ్యక్తం చేసింది. మౌలిక వసతుల కల్పన పారదర్శక పాలన లక్ష్యంగా ఈ నూతన చట్టం పనిచేస్తుంది. గ్రేటర్ పరిధిలో పెరుగుతున్న జనాభాకు అనుగుణంగా భవిష్యత్తు ప్రణాళికలను ఇందులో పొందుపరిచారు. రాష్ట్ర ఆర్థిక ప్రగతికి ఊతమిచ్చే మరికొన్ని ప్రతిపాదనలపై కూడా మంత్రుల బృందం తమ అభిప్రాయాలను పంచుకుంది.
తెలంగాణ మంత్రివర్గ సమావేశం రాష్ట్ర ప్రయోజనాలే లక్ష్యంగా పలు సంచలన నిర్ణయాలు తీసుకుంది. విద్వేషపూరిత ప్రసంగాలు సోషల్ మీడియా పోస్టులను అరికట్టేందుకు హేట్ స్పీచ్ ప్రివెన్షన్ బిల్లు 2026కు ఆమోదముద్ర వేసింది. కేంద్ర ప్రభుత్వ సోషల్ సెక్యూరిటీ కోడ్ నిబంధనలకు అనుగుణంగా స్వల్ప మార్పులు చేసి ఈ చట్టాన్ని రూపొందించింది. సమాజంలో మత సామరస్యాన్ని కాపాడటం అల్లర్లను అణచివేయడం ఈ చట్టం ముఖ్య ఉద్దేశం.
హైదరాబాద్ మెట్రో రైల్ ఫేజ్-1 వ్యవస్థను ఎల్ అండ్ టీ సంస్థ నుంచి ప్రభుత్వం స్వాధీనం చేసుకోనుంది. 69 కిలోమీటర్ల నెట్వర్క్ను రుణభారంతో కలిపి రూ.15 వేల కోట్లు చెల్లించి తీసుకునేందుకు కేబినెట్ అంగీకరించింది. ఈ నిధుల లావాదేవీల బాధ్యతలను హైదరాబాద్ మెట్రో రైల్ లిమిటెడ్ (HMRL) నోడల్ ఏజెన్సీగా పర్యవేక్షిస్తుంది. న్యాయవాదుల భద్రత కోసం తెలంగాణ అడ్వకేట్ ప్రొటెక్షన్ బిల్లుకు ఆమోదం లభించింది. గతంలో జరిగిన వామనరావు దంపతుల హత్య వంటి ఘటనలు పునరావృతం కాకుండా ఉండటానికి లాయర్లపై దాడులను కట్టడి చేసేలా దీనిని తెచ్చారు.
రాష్ట్రంలో జరిగిన సమగ్ర సామాజిక ఆర్థిక కుల సర్వే నివేదికను జస్టిస్ సుదర్శన్ రెడ్డి నిపుణుల కమిటీ సమర్పించింది. 2024 నవంబర్ నుంచి డిసెంబర్ వరకు 50 రోజుల పాటు జరిగిన ఈ సర్వే ఫలితాలను అధ్యయనం చేయడానికి కేబినెట్ సబ్ కమిటీని నియమించారు. విద్యాసంస్థల్లో కుల వివక్ష రూపుమాపడానికి రోహిత్ వేముల చట్టం విధివిధానాల రూపకల్పన బాధ్యతలను డిప్యూటీ సీఎం భట్టి విక్రమార్క నేతృత్వంలోని మరో ఉపసంఘానికి అప్పగించారు.
వృద్ధాప్యంలో తల్లిదండ్రులను నిర్లక్ష్యం చేసే ప్రజాప్రతినిధులు ఉద్యోగులపై ప్రభుత్వం కఠిన చర్యలు తీసుకోనుంది. అలాంటి వారి జీతాల నుంచి 15 శాతం లేదా రూ.10 వేలలో ఏది తక్కువైతే ఆ మొత్తాన్ని మినహాయించి నేరుగా తల్లిదండ్రులకు అందించే తల్లిదండ్రుల మద్దతు బిల్లుకు కేబినెట్ ఆమోదం తెలిపింది.
Share
Sambarala Yetigattu: హీరో శ్రీకాంత్ బర్త్డే స్పెషల్.. బ్రిటీషుగా ఫస్ట్ లుక్ అదిరింది!
Saffron water: ఉదయాన్నే ఖాళీ కడుపుతో కుంకుమపువ్వు నీళ్లు తాగితే ఏమవుతుంది?
