India US Trade Deal Protest: హైదరాబాద్లోని ఇందిరా పార్క్ వేదికగా ఇండియా–అమెరికా ప్రతిపాదిత వాణిజ్య ఒప్పందానికి వ్యతిరేకంగా కార్మిక, కర్షక సంఘాలు భారీ నిరసనను చేపట్టాయి. ఈ ధర్నా కార్యక్రమంలో టీపీసీసీ అధ్యక్షులు, ఎమ్మెల్సీ మహేష్ కుమార్ గౌడ్ పాల్గొని సంఘీభావం ప్రకటించారు. దేశీయ పరిశ్రమలు, చిన్న తరహా వ్యాపారాలు, రైతుల ప్రయోజనాలను విస్మరించి కుదుర్చుకునే ఏ ఒప్పందాన్ని కూడా కాంగ్రెస్ పార్టీ సమర్థించదని ఆయన ఈ సందర్భంగా స్పష్టం చేశారు. విదేశీ కంపెనీలకు అధిక ప్రాధాన్యం ఇచ్చే నిర్ణయాలు భవిష్యత్తులో దేశ ఆర్థిక వ్యవస్థపై తీవ్ర ప్రభావం చూపుతాయని ఆయన హెచ్చరించారు.
ఈ వాణిజ్య ఒప్పందం వల్ల వ్యవసాయ రంగం కుదేలయ్యే ప్రమాదం ఉందని కార్మిక సంఘాలు ఆందోళన వ్యక్తం చేశాయి. అంతర్జాతీయ మార్కెట్ పోటీ పెరగడం వల్ల భారతీయ రైతులకు కనీస మద్దతు ధర దక్కకుండా పోతుందని, సబ్సిడీల వ్యవస్థపై కూడా ప్రభావం పడుతుందని వారు ఆవేదన వ్యక్తం చేశారు. కార్మిక హక్కులు, వేతన భద్రత, ఉద్యోగ రక్షణ వంటి కీలక అంశాల్లో స్పష్టత లేకుండా కేంద్ర ప్రభుత్వం ఏకపక్షంగా నిర్ణయాలు తీసుకోవడం సమంజసం కాదని మహేష్ కుమార్ గౌడ్ విమర్శించారు. స్వదేశీ ఉత్పత్తులను ప్రోత్సహించాల్సిన బాధ్యతను కేంద్రం విస్మరిస్తోందని ఆయన మండిపడ్డారు.
ఒప్పందం అమలులోకి వస్తే కార్మిక చట్టాల సడలింపు, ప్రైవేటీకరణ ప్రక్రియ వేగవంతం అవుతుందనే భయం కార్మిక వర్గాల్లో నెలకొంది. దేశ ప్రయోజనాలను కాపాడేలా, పారదర్శకమైన చర్చల తర్వాతే వాణిజ్య ఒప్పందాలు కుదుర్చుకోవాలని నిరసనకారులు డిమాండ్ చేశారు. ఈ కార్యక్రమంలో పెద్ద సంఖ్యలో రైతు సంఘాల నాయకులు, కార్మిక ప్రతినిధులు, కాంగ్రెస్ పార్టీ శ్రేణులు పాల్గొని ప్రభుత్వ వ్యతిరేక నినాదాలు చేశారు. దేశీయ మార్కెట్ను విదేశీ దిగుమతులకు మార్గం సుగమం చేయడం వల్ల చిన్న వ్యాపారులు తీవ్రంగా నష్టపోతారని వారు హెచ్చరించారు.
Share
Peddi: రామ్ చరణ్ పెద్ది కోసం పెద్ద స్కెచ్.. అందుకే అతని రంగంలోకి..!
Social Boycott: ఛీ.. ఛీ.. ఇదేం సమాజం? చనిపోయిన వ్యక్తిపై కూడా కుల వివక్షా?
