Trains Cancelled: ప్రయాణీకులకు అలర్ట్.. తెలుగు రాష్ట్రాల్లో రోజుల పాటు ఈ రూట్లలో రైళ్లు క్యాన్సిల్!

SCR Cancels 8 Passenger Services: దక్షిణ మధ్య రైల్వే ప్రయాణీకులకు అలర్ట్ జారీ చేసింది. తన నెట్ వర్క్ పరిధిలో రెండు రోజుల పాటు 8 రైళ్లను క్యాన్సిల్ చేస్తున్నట్లు ప్రకటించింది. ఇవాళ, రేపు ప్యాసింజర్ రైళ్లను తాత్కాలికంగా రద్దు చేస్తున్నట్లు ప్రకటించింది. ఒకవేళ ఆ మార్గాల్లో వెళ్లే ప్రయాణీకులు ప్రత్యామ్నాయ మార్గాలు చూసుకోవాలని సూచించింది.

ఏ మార్గాల్లో రైళ్లు రద్దు అవుతున్నాయంటే?

తాజాగా క్యాన్సిల్ అయ్యే రైళ్ల వివరాలను సౌత్ సెంట్రల్ రైల్వే ప్రకటించింది. కాజీపేట- డోర్నకల్, డోర్నకల్- విజయవాడ, విజయవాడ-గుంటూరు మధ్య నడిచే రైళ్లు, అలాగే సికింద్రాబాద్-వరంగల్, వరంగల్-సికింద్రాబాద్ మార్గాల్లో నడిచే 8 ప్యాసింజర్ రైళ్లను రద్దు చేస్తున్నట్లు తెలిపింది. ఈ రైళ్లు సాధారణంగా ప్రతిరోజూ నడుస్తాయి. తెలంగాణ, ఆంధ్రప్రదేశ్ అంతటా స్వల్ప దూర, సబర్బన్ ప్రయాణికులకు ఎక్కువగా సేవలు అందిస్తాయి. రెండు రోజుల పాటు వీటి సేవలను నిలిపి వేస్తున్నట్లు సౌత్ సెంట్రల్ రైల్వే అధికారులు ప్రకటించారు.

రైళ్లను ఎందుకు రద్దు చేశారంటే?

రైళ్ల రద్దుకు సంబంధించి సౌత్ సెంట్రల్ రైల్వే కీలక వివరాలను వెల్లడించింది. భద్రత, ఆపరేషనల్ సామర్థ్యాన్ని మెరుగుపరచడమే లక్ష్యంగా మౌలిక సదుపాయాల నిర్వహణను సులభతరం చేయడానికి తాత్కాలిక సస్పెన్షన్ అవసరమని రైల్వే అధికారులు నిర్ణయించారు. ప్రయాణికులు రైలు షెడ్యూల్ ను ముందుగానే తనిఖీ చేయాలని, ప్రభావిత తేదీలలో వారి ప్రయాణాలను తదనుగుణంగా ప్లాన్ చేసుకోవాలని సూచించారు.

రెండు రోజుల తర్వాత తిరిగి రైలు సర్వీసులు ప్రారంభం

దక్షిణ మధ్య రైల్వే ఈ అసౌకర్యానికి చింతిస్తున్నట్లు ప్రకటించింది. ప్రయాణీకులకు మెరుగైన ప్రయాణ సౌకర్యాలు కల్పించడమే లక్ష్యంగా ఈ నిర్ణయం తీసుకున్నట్లు ప్రకటించింది. నిర్వహణ పనులు పూర్తయిన తర్వాత సాధారణ సేవలు తిరిగి ప్రారంభమవుతాయని వివరించింది. సౌత్ సెంట్రల రైల్వే జోన్ అంతటా మౌలిక సదుపాయాలు అప్ డేట్ చేసే సమయంలో వీలైనంత వరకు ప్రయాణీకులకు ఇబ్బందులు కలగకుండా చర్యలు తీసుకుంటున్నారు అధికారులు. ప్రయాణీకుల భద్రతకు ప్రాధాన్యతనిస్తూనే ఈ కార్యకలాపాలను చేపడుతున్నారు.