Vande Bharat Express: వందే భారత్‌కు బాంబు ముప్పు.. రైళ్లను పేల్చేస్తామంటూ ఆగంతకుడి లేఖ.. వణికిపోతున్న ప్రయాణికులు!

Vande Bharat Express: భారతదేశ ప్రతిష్టాత్మక రైళ్లయిన వందే భారత్ ఎక్స్‌ప్రెస్‌లను పేల్చివేస్తామంటూ గుర్తుతెలియని వ్యక్తి నుంచి దక్షిణ మధ్య రైల్వే జనరల్ మేనేజర్ (GM) కార్యాలయానికి ఒక లేఖ అందింది. ఈ నెల 3వ తేదీన పోస్టు ద్వారా వచ్చిన ఈ లేఖలో దిగ్భ్రాంతికరమైన అంశాలు ఉన్నాయి. హైదరాబాద్‌లో నివసిస్తున్న నలుగురు వ్యక్తులతో కూడిన ఒక జిహాదీ బృందం ఈ దాడులకు కుట్ర పన్నిందని, రైల్వే లైన్లపై బాంబులు అమర్చి దాదాపు 250 మంది ప్రయాణికులను చంపడమే వారి లక్ష్యమని ఆ లేఖలో పేర్కొన్నారు. ఈ లేఖ రాసిన వ్యక్తి ఆ నలుగురు వ్యక్తుల పేర్లను కూడా ప్రస్తావించడంతో రైల్వే భద్రతా బలగాలు ఈ విషయాన్ని అత్యంత తీవ్రంగా పరిగణించాయి.

అయితే ఈ అంశంపై భద్రతా దళాలు లేఖ అందిన వెంటనే అప్రమత్తమైన రైల్వే ప్రొటెక్షన్ ఫోర్స్ (RPF), గవర్నమెంట్ రైల్వే పోలీస్ (GRP), సివిల్ పోలీసులతో కలిసి తనిఖీలను ముమ్మరం చేశారు. ముఖ్యంగా సికింద్రాబాద్, నాంపల్లి, కాచిగూడ వంటి ప్రధాన రైల్వే స్టేషన్లలో భద్రతను కట్టుదిట్టం చేశారు. వందే భారత్ రైళ్లు వెళ్లే మార్గాల్లో ట్రాక్ తనిఖీలు నిర్వహించడమే కాకుండా, రైలు లోపల బాంబ్ స్క్వాడ్, డాగ్ స్క్వాడ్‌తో క్షుణ్ణంగా సోదాలు చేపట్టారు. ప్రయాణికుల సామాగ్రిని స్కాన్ చేయడం, అనుమానిత వ్యక్తులను విచారించడం వంటి చర్యలు చేపట్టారు. ఎటువంటి అవాంఛనీయ సంఘటనలు జరగకుండా నిఘా వర్గాలు కూడా రంగంలోకి దిగాయి.

ప్రస్తుతం ఈ బెదిరింపు లేఖ వెనుక ఉన్న అసలు సూత్రధారి ఎవరనే కోణంలో పోలీసులు దర్యాప్తు వేగవంతం చేశారు. లేఖలో పేర్కొన్న పేర్లు నిజమైనవా లేక దర్యాప్తును పక్కదారి పట్టించడానికి సృష్టించినవా అనే అంశంపై ఆరా తీస్తున్నారు. లేఖ ఎక్కడి నుండి పోస్ట్ చేయబడింది? సీసీటీవీ ఫుటేజీల్లో ఏవైనా ఆధారాలు దొరుకుతాయా? అని సాంకేతిక విభాగం సాయంతో విశ్లేషిస్తున్నారు. గతంలో కూడా ఇలాంటి నకిలీ బెదిరింపు లేఖలు వచ్చిన సందర్భాలు ఉన్నప్పటికీ, ప్రస్తుత పరిస్థితుల దృష్ట్యా భద్రతా సంస్థలు ఎక్కడా రాజీ పడకుండా నిరంతర నిఘా కొనసాగిస్తున్నాయి.

Also Read: విజయవాడలో దారుణం.. ప్రేమించానని వివాహితకు వేధింపులు.. చివరకు విషమిచ్చి

ఈ హెచ్చరికల నేపథ్యంలో రైల్వే శాఖ ప్రయాణికులను అప్రమత్తంగా ఉండాలని కోరింది. రైల్వే స్టేషన్లలో లేదా రైళ్లలో ఎవరైనా అనుమానాస్పదంగా కనిపించినా, లేదా యజమాని లేని వస్తువులను గమనించినా వెంటనే రైల్వే పోలీసులకు లేదా హెల్ప్‌లైన్ నంబర్లకు సమాచారం అందించాలని సూచించింది. భయాందోళన చెందాల్సిన అవసరం లేదని, ప్రయాణికుల భద్రతకు అన్ని రకాల చర్యలు తీసుకుంటున్నామని అధికారులు భరోసా ఇచ్చారు. ఈ కుట్ర వెనుక ఉన్న అగంతకుడిని త్వరలోనే పట్టుకుంటామని పోలీసులు ధీమా వ్యక్తం చేస్తున్నారు.

వందేభారత్ రైళ్లు పేల్చేస్తామని రైల్వే అధికారులకు అగంతకుడి లేఖ

హైదరాబాద్ లో ఉంటున్న నలుగురు జిహాది బృందం పథకం వేశారని లేఖలో తెలిపిన ఆంగతకుడు

వందేభారత్ వెళ్లే రైల్వే లైన్లలో బాంబులు పెట్టి 250 మందిని చంపేందుకు పథకం వేశారంటూ లేఖ

ఈనెల 3న పోస్టులో జీఎంకి లేఖ

దింతో అప్రమత్తమై… pic.twitter.com/HZLLVhL7HI

— BIG TV Breaking News (@bigtvtelugu) February 7, 2026

Join WhatsApp Channel

Share

• 
• 
• 
• 
• 
•