రైల్లో లోయర్ బెర్త్ లేదా సైడ్ లోయర్ బెర్త్ దొరికిన కొంతమందికి సంతోషం ఉండదు. రైలు ఎక్కి, నిద్రపోయే వరకు ఏదో తెలియని సందేహం వారిని వెంటాడుతుంది. ‘‘లేక లేక లోయర్ బెర్త్ దొరికింది.. దేవుడి దయవల్ల ఈ సీటు మాకు కావాలని ఎవరూ అడగకపోతే బాగున్ను’’ అని మనసులో అనుకుంటారు. రైలు ప్రయాణం చేసే ప్రతి ఒక్కరి అనుభవం ఇది. మీకు కూడా ఎప్పుడో ఇది ఎదురయ్యే ఉంటుంది. మిడిల్, అప్పర్ బెర్త్ ఎక్కలేని పెద్దవాళ్లకు, గర్బినీలకు సాయం చేసినా తప్పులేదు. కానీ, కొందరు పక్కవారి సీటును కూడా లాక్కోవడాన్ని హక్కుగా ఫీలవుతారు. ఆ సీటు ఇవ్వడానికి ఒప్పుకోని వ్యక్తిని విలన్లా చూస్తారు. పాపం.. ఆ సీటు కోసం ఎంత ఉదయాన్నే లేచి ఆన్లైన్లో ఆపసోపాలు పడి ఆ టికెట్ బుక్ చేసుకున్నాడో అని ఎవ్వరూ ఆలోచించరు. తాజాగా ఓ ప్రయాణికుడికి ఇలాంటి అనుభవమే ఎదురైంది. అదంతా సోషల్ మీడియాలో రాసుకొచ్చాడు.
‘‘నేను నా సైడ్ లోయర్ బెర్త్.. రుతుక్రమంతో బాధపడుతోన్న మహిళకు ఇవ్వనందుకు చాలా సిగ్గుగా, బాధగా ఉంది’’ అంటూ ఓ ప్రయాణికుడు రైల్లో తనకు ఎదురైన చేదు అనుభవం గురించి చెప్పుకొచ్చాడు. ‘‘నాకు దాదాపు మూడేళ్ల తర్వాత రైలులో సైడ్ లోయర్ బెర్త్ దొరికింది. చాలాసార్లు బుకింగ్ టైమ్లో ఆ సీటును ఎంచుకున్నా.. ఆటోమెటిక్గా వేరే సీటు వచ్చేది. కానీ, ఈసారి సైడ్ లోయర్ దొరికింది. ఇక ఎవరి డిస్ట్రబెన్స్ లేకుండా రైలు కిటికీ నుంచి చూస్తూ ప్రయాణం చేయొచ్చని అనుకున్నాను. కానీ, ఓ జంట దాన్ని నాశనం చేశారు. వారు నా దగ్గరకు వచ్చి నా బెర్త్ కావాలని అడిగారు. తన భార్య రుతుక్రమంతో బాధపడుతోందని, ఆమె సైడ్ అప్పర్ బెర్త్ ఎక్కలేదని చెప్పాడు. రిక్వెస్టింగ్గా అడిగితే పర్వాలేదు. ఆ సీటు ఇవ్వాల్సిందే అన్నట్లు అడిగారు’’ అని తెలిపాడు.
‘‘నాకు ఆ సీటును వదులుకోవడం ఇష్టం లేదు. ఇదే విషయాన్ని వారికి చెప్పాను. లోయర్ బెర్త్ ఎవరైనా ఇస్తారేమో అడగండి. నేను ఇది ఇవ్వలేను అని చెప్పాను. సున్నితంగానే తిరస్కరించా అంతే. కానీ, ఆ తర్వాత కోచ్లో పరిస్థితి ఒక్కసారిగా అసౌకర్యంగా మారిపోయింది. ఆ జంట నా వైపే అదోలా చూడటం మొదలుపెట్టారు. నన్ను చూస్తూ తిట్టుకున్నారు. పక్కవాళ్లకు కూడా ఆ విషయం చెప్పి.. నన్ను అక్కడ విలన్గా మార్చేశారు. అయితే, ఎవరూ నన్ను ఆ సీటు ఇవ్వమని సలహా ఇవ్వలేదు. కానీ, వారి చూపులు చూస్తే నాకు చాలా సిగ్గుగా అనిపించింది’’ అని తెలిపాడు.
ఆ ప్రయాణికుడు ఈ విషయాన్ని రెడిట్ సోషల్ మీడియాలో పోస్ట్ చేశాడు. దీనిపై పలువురు నెటిజన్స్ స్పందిస్తూ.. ‘‘నువ్వు మంచి నిర్ణయమే తీసుకున్నావు. అది నీ సీటు. అది ఇవ్వాలా వద్దా అనేది పూర్తిగా నీ ఇష్టం’’ అని అన్నారు. మరొకరైతే.. ‘‘ఒక్కసారి నువ్వు ‘నో’ చెప్పిన తర్వాత వాళ్లు అలా నీ వెంట పడకూడదు. వేరే ఆఫ్షన్స్ వెతుక్కోవాలి’’ అని అన్నారు. ‘‘నువ్వ తిరస్కరించిన తర్వాత.. వారిని అస్సలు పట్టించుకోకూడదు. మొబైల్ ఫోన్ చూసుకోవాలి. లేదా ఏదో నీ పనిలో బిజీగా ఉన్నట్లు నటించాలి. అసలు వాళ్లను చూడకూడదు’’ అని అన్నారు. మరి, దీనిపై మీ అభిప్రాయం ఏమిటీ?
Also Read: ఐఆర్సీటీసీ ఫుడ్ ధరల లిస్ట్ ఇదే.. బ్రేక్ ఫాస్ట్, లంచ్, డిన్నర్ కాస్ట్ ఏంతో తెలుసా?
Share
Tamil Nadu Transfer Scam: ఒక్కో ఉద్యోగానికి రూ.కోటి లంచం.. రూ. 365 కోట్ల లంచాల కుంభకోణం!
Allu Arjun: మన శంకర వరప్రసాద్ గారు సినిమా పై బన్నీ రివ్యూ .. బాస్ ఈజ్ బ్యాక్ అంటూ!
