Rules In Village: ఇండియాలో చాలామంది ఆశ్చర్యపోయే ప్రదేశాలు ఉన్నాయి. పర్వతాలు, అడవులు, నదులు మాత్రమే కాదు… మనుషుల జీవనశైలి కూడా అక్కడి ప్రత్యేకతను చూపిస్తుంది. హిమాచల్ ప్రదేశ్‌లో ఉన్న ఒక చిన్న గ్రామం… పేరు మలానా. అక్కడి మనుషులు పాటించే కఠినమైన నియమాలు ప్రపంచం మొత్తం దీని గురించి మాట్లాడేలా చేసింది . మలానా గ్రామం ప్రత్యేకతలేంటి? అక్కడి ప్రజలను తాకితే ఎందుకు జరిమానా? వాళ్లు బయటి వ్యక్తులను ఎందుకు దూరంగా ఉంచుతారు? అనే విషయాలన్ని తెలుసుకుందాం.
మలానా ఊరి ప్రత్యేకత:
మలానా అనే ఈ గ్రామం హిమాచల్ ప్రదేశ్‌లోని పార్వతి వ్యాలీలో ఉంది. సముద్ర మట్టానికి సుమారు 2600 మీటర్ల ఎత్తులో ఉండే ఈ ఊరికి “ఒక స్వతంత్ర గణరాజ్యం” అనే పేరుంది. అంటే వాళ్ల ఊరికి వాళ్లే రాజులు, వాళ్లే చట్టం, వాళ్లే తీర్పు చెప్పే వారూ. ఈ ఊరు ప్రాచీనంగా చరిత్ర కలిగి ఉంది. ఇక్కడ నివసించే ప్రజలు తమను అలెగ్జాండర్ వంశజులమని నమ్ముతారు. వాళ్ల భాష, సంస్కృతి, సంప్రదాయాలన్నీ వేరేలా ఉంటాయి. అందుకే ఈ ఊరు బయట ప్రపంచానికి దూరంగా, చాలా ప్రత్యేకంగా ఉంది.
వాళ్లను తాకితే ఎందుకు జరిమానా?
మలానా ప్రజలు తమను అత్యంత పవిత్రులుగా భావిస్తారు. వాళ్ల నమ్మకం ప్రకారం బయటి వ్యక్తులు తాకితే వాళ్లపై దోషంగా భావిస్తారు, వాళ్లు అపవిత్రమవుతారు. అందుకే వాళ్లు ఎవరికీ తాకరాదు, తాకకూడదు అనే కఠిన నిబంధనలు పాటిస్తారు. ఈ నిబంధనను ఉల్లంఘిస్తే అంటే ఎవైనా మలానా వ్యక్తిని తాకితే లేదా ఆయన వస్తువులను తాకినా, వెంటనే రూ. 5000 జరిమానా వసూలు చేస్తారు. మరింతగా చెప్పాలంటే, ఎవరైనా మలానా ఇంట్లోకి ప్రవేశిస్తే ఆ ఇల్లు పూర్తిగా శుద్ధి చేయించుకుంటారు. ఇది వాళ్ల సంప్రదాయానికి సంబంధించిన ఒక ముఖ్యమైన నిబంధన.
బయటి వాళ్లకు ఆతిథ్యం లేదు:
ఇక్కడి ప్రజలు టూరిస్టుల్ని కూడా దూరంగా ఉంచాలనే కోణంలో ఉంటారు. మలానా గ్రామంలోకి మీరు వెళ్లవచ్చు కానీ అక్కడి ప్రజలతో మాట్లాడడం, స్నేహభావం, సెల్ఫీలు తీసుకోవడం, ఇంట్లోకి అడుగుపెట్టడం చాలా కఠినంగా ఉంటుంది. అయితే ఈ నియమాల్ని గౌరవించి, దూరంగా ఉండి చూస్తే మాత్రం వారు అనుమతి ఇస్తారు. మరో విషయం ఏంటంటే గ్రామంలో బోర్డులు కనిపిస్తాయి. “ప్రజలను తాకవద్దు”, “వస్తువులు తాకవద్దు” అని స్పష్టంగా రాసి ఉంటుంది.
అదే గ్రామంలో గంజాయి పంటలు?
మలానా గ్రామం మరోవైపు “మలానా క్రీమ్” అనే ప్రఖ్యాత గంజాయి (Cannabis) వల్ల కూడా ప్రపంచవ్యాప్తంగా ప్రసిద్ధి చెందింది. ఇది ప్రపంచవ్యాప్తంగా అత్యంత శుద్ధత కలిగిన గంజాయి ఉత్పత్తుల్లో ఒకటిగా గుర్తింపు పొందింది. అయితే ఇది చట్ట విరుద్ధమే. అయినా అక్కడి కొంతమంది రైతులు ఇప్పటికీ గుట్టుచప్పుడు కాకుండా ఈ పంటను సాగు చేస్తుంటారు.
మలానా ప్రజలు ఆచారాలు, సంప్రదాయాలు:
ఈ టెక్నాలజీ యుగంలో మనం మెట్రో ట్రైన్‌లు, 5G ఫోన్లు, ఆర్టిఫిషియల్ ఇంటలిజెన్స్ గురించి మాట్లాడుతున్నాం. కానీ మలానా గ్రామ ప్రజలు ఇప్పటికీ ఆచారాలు, సంప్రదాయాలు, తమ సాంస్కృతిక విలువలతో జీవిస్తున్నారు. వాళ్లకంటూ ఓ జ్యుడీషియల్ వ్యవస్థ కూడా ఉంది. సమస్యలు వచ్చినా, బయట కోర్టులకు వెళ్లకుండా వాళ్లే తీర్పులు చెబుతారు.
ఇది ఒక సామాన్య గ్రామం కాదు. ఇది సంప్రదాయాలకు నిలువెత్తు నిదర్శనం. మలానా ప్రజల ప్రత్యేకతను గౌరవించడం మన బాధ్యత. వాళ్లను తాకితే జరిమానా ఎందుకు వేస్తున్నారో తెలుసుకున్నాక, మనమే అర్థం చేసుకోవాలి – ఇది వాళ్ల విశ్వాసం, వాళ్ల జీవితం. మలానా ఒక నిశ్శబ్ద ఊరు… కానీ అందులో దాగి ఉన్న చరిత్ర, మనిషి ఆచారాల గౌరవం ఎంతో గొప్పది.
Share
Gold Rate: వామ్మో.. దడ పుట్టిస్తున్న బంగారం ధరలు.. రికార్డ్ బ్రేక్.
Block Spam Calls: స్పామ్ కాల్స్‌తో విసిగిపోయారా? ఈ సెట్టింగ్స్‌తో ఈజీగా బ్లాక్ చేయండి
