Animal love: కుక్క కోసం సాహసమే చేశారు.. అక్షరాల రూ.15లక్షలు పెట్టి ఇండియా నుంచి ఆస్ట్రేలియాకు.. వీడియో వైరల్

సాధారణంగా ఉద్యోగరీత్యానో లేదా ఇతర కారణాల వల్ల విదేశాలకు వెళ్లేటప్పుడు చాలామంది తమ పెంపుడు జంతువులను ఇక్కడే ఇతరులకు ఇచ్చేయడమో లేదా వదిలేయడమో చేస్తారు. కానీ, హైదరాబాద్‌కు చెందిన ఒక జంట మాత్రం తమ పెంపుడు కుక్క ‘స్కై’ (కుక్క పేరు స్కై) కోసం ఏకంగా రూ. 15 లక్షలు ఖర్చు చేసి, ఆరు నెలల పాటు విరహాన్ని ఓర్చుకుని మరీ ఆస్ట్రేలియాకు తీసుకెళ్లారు. మానవత్వానికి, మూగజీవాల పట్ల ఉన్న ప్రేమానురాగాలకు నిదర్శనంగా నిలిచిన ఈ ఘటనకు సంబంధించిన వివరాలను ‘కహానీ ఆఫ్ టెయిల్స్’ (Kahaani of Tails) అనే ఇన్‌స్టాగ్రామ్ పేజీ ద్వారా ప్రపంచానికి తెలిసింది.

నిబంధనలే అడ్డంకిగా మారిన వేళ.. 

ఈ దంపతులకు ఆస్ట్రేలియా వెళ్లే అవకాశం వచ్చినప్పుడు వారు ఎంతో సంతోషించారు. అయితే, ఆ సంతోషం ఎంతోసేపు నిలవలేదు. ఆస్ట్రేలియా కఠినమైన బయోసెక్యూరిటీ నిబంధనల ప్రకారం.. భారత్ వంటి ‘రేబిస్ ఫ్రీ’ (Rabies-free) కాని దేశాల నుండి కుక్కలను నేరుగా ఆస్ట్రేలియాలోకి అనుమతించరు. ఒకవేళ భారత్ నుండి కుక్కను ఆస్ట్రేలియాకు తీసుకెళ్లాలంటే, అది ముందుగా ఏదైనా రేబిస్ రహిత దేశంలో కనీసం ఆరు నెలల పాటు ఉండాలి. ఆ తర్వాతే అక్కడి నుండి ఆస్ట్రేలియాకు అనుమతి లభిస్తుంది.

దుబాయ్‌లో ఆరు నెలల క్వారంటైన్.. 

ఈ నిబంధనల గురించి తెలిసినప్పుడు ఆ దంపతులు వెనకడుగు వేయలేదు. తమ కుక్కను భారత్‌లోనే వదిలేయడానికి వారు అంగీకరించలేదు. దీంతో స్కైని ముందుగా దుబాయ్ పంపారు. అక్కడ దానికి కొత్త వాతావరణం అలవాటు కావడానికి మొదటి నెల రోజులు ఈ దంపతులు కూడా అక్కడే ఉన్నారు. ఆ తర్వాత ఐదు నెలల పాటు స్కైని అక్కడి బోర్డింగ్ ఫెసిలిటీలోనే వదిలి వారు ఆస్ట్రేలియా చేరుకున్నారు. ఈ ఆరు నెలల సమయాన్ని భరించడం తమ జీవితంలో అత్యంత కఠినమైన పని అని వారు ఆవేదన వ్యక్తం చేశారు.

రూ. 15 లక్షల ఖర్చు.. ఆపై భావోద్వేగ ప్రయాణం.. 

ఈ మొత్తం ప్రక్రియకు దాదాపు రూ. 14 నుండి 16 లక్షల వరకు ఖర్చయింది. ‘కేవలం కుక్క కోసం ఇన్ని లక్షలా? కొత్త కుక్కను కొనుక్కోవచ్చు కదా!’ అని చాలామంది విమర్శించినా.. ఆ దంపతులు మాత్రం వెనక్కి తగ్గలేదు. ‘స్కై మాకు కేవలం కుక్క మాత్రమే కాదు, వాడు మా బిడ్డ. వాడి కోసం మేము ఏదైనా చేస్తాం’ అని వారు స్పష్టం చేశారు. ప్రతిరోజూ వీడియో కాల్స్, ఫోన్ అప్‌డేట్స్ ద్వారా తన క్షేమసమాచారాలు తెలుసుకుంటూ ఆరు నెలల నిరీక్షణను పూర్తి చేశారు. చివరకు స్కై ఆస్ట్రేలియా చేరుకున్నప్పుడు, వారి కళ్లలో ఆనందం వర్ణనాతీతంగా మారింది.

నెటిజన్ల ప్రశంసల జల్లు.. 

ఈ భావోద్వేగపూరితమైన వీడియో సోషల్ మీడియాలో షేర్ చేయగానే వేలాదిమంది స్పందించారు. ‘నిజమైన ప్రేమ అంటే ఇదే’ అని కొందరు, ‘మిమ్మల్ని చూస్తుంటే గర్వంగా ఉంది’ అని మరికొందరు కామెంట్స్ చేశారు. పెంపుడు జంతువులను వదిలించుకునే ఈ రోజుల్లో, ఇంతటి త్యాగం చేసిన ఈ జంట అందరికీ స్ఫూర్తిగా నిలిచారు. ఆ జంట పడ్డ కష్టం, పెట్టిన ఖర్చు.. స్కై ఆస్ట్రేలియాలో వారిని కలిసిన క్షణంలో కలిగిన ఆనందం ముందు ఏమాత్రం సరిపోవని నెటిజన్లు అభిప్రాయపడుతున్నారు.

ALSO READ: Sophie Rain: బిజినెస్, జాబ్ లేకున్నా.. రూ.900 కోట్లు గడించిన 21 ఏళ్ల యువతి, ఎలాగంటే?