Guntur News: గుంటూరు జిల్లా నడింపాలెం వద్ద ఉన్న కాటూరి మెడికల్ కాలేజీలో ఒక దారుణ ఘటన ఆలస్యంగా బయటపడింది. మహిళా డాక్టర్లు దుస్తులు మార్చుకుంటున్నప్పుడు రహస్యంగా వారి నగ్న వీడియోలు చిత్రీకరిస్తున్న ఒక కాంపౌండర్ను పోలీసులు అరెస్ట్ చేశారు. సుమారు నెల రోజుల క్రితం విధుల్లో చేరిన సాయి అనే కాంపౌండర్ ఈ నీచ కార్యానికి పాల్పడ్డాడు. ఓపీ థియేటర్ దగ్గర ఉన్న డ్రెస్సింగ్ రూమ్ను ఇతను ఉపయోగించుకున్నాడు. ఈ విషయం ఇప్పుడు ఆ ప్రాంతంలో తీవ్ర చర్చకు దారితీసింది. కాలేజీ యాజమాన్యం మొదట్లో ఈ అంశాన్ని గోప్యంగా ఉంచాలని ప్రయత్నించినా.. ఘటన తీవ్రత వల్ల బయటకు వచ్చింది.
ఈ సంఘటన ఈ నెల 24వ తేదీన జరిగింది. ఓ మహిళా డాక్టర్ డ్రెస్ చేంజ్ చేసుకుంటున్న సమయంలో.. పక్క గది గోడ పై నుంచి కాంపౌండర్ సాయి మొబైల్తో వీడియో తీయడానికి ప్రయత్నించాడు. ఈ సమయంలో సడెన్గా మొబైల్ ఫ్లాష్ లైట్ ఆన్ అయింది. ఫ్లాష్ లైట్ వెలుగు గమనించిన మహిళా డాక్టర్ వెంటనే అప్రమత్తమై పెద్దగా కేకలు వేసింది. ఆమె అరుపులు విని అప్రమత్తమైన ఇతర సిబ్బంది వెంటనే అక్కడికి చేరుకున్నారు. వారు సాయిని పట్టుకున్నారు. అతని మొబైల్ను లాక్కున్నారు. అనంతరం కాలేజీ యాజమాన్యం ద్వారా పోలీసులకు సమాచారం ఇచ్చారు.
సమాచారం అందుకున్న సౌత్ జోన్ డీఎస్పీ భానోదయ వెంటనే ఘటనా స్థలానికి చేరుకున్నారు. పరిస్థితిని పరిశీలించి, కాంపౌండర్ సాయిని అదుపులోకి తీసుకున్నారు. అతన్ని అరెస్ట్ చేసి విచారణ ప్రారంభించారు. ఈ దారుణ చర్యకు పాల్పడిన సాయి మొబైల్ను పోలీసులు స్వాధీనం చేసుకున్నారు. ఫోరెన్సిక్ విచారణ కోసం మొబైల్ను ల్యాబ్కు పంపారు. పోలీసులు ప్రాథమికంగా మొబైల్లో కేవలం రెండు వీడియోలు మాత్రమే ఉన్నాయని చెబుతున్నారు.
అయితే.. మహిళా వైద్యులు తీవ్ర ఆందోళన వ్యక్తం చేస్తున్నారు. మొబైల్ డేటా రీట్రైవ్ అయిన తర్వాత మరింత కీలక సమాచారం లభించే అవకాశం ఉంది. అంటే, ఎక్కువ వీడియోలు దొరికే అవకాశం ఉందని వారు భయపడుతున్నారు. ఈ సంఘటన కాలేజీలో కలకలం రేపింది. ఒక కాంపౌండర్ ఇలాంటి పని చేయడంపై తీవ్ర విమర్శలు వ్యక్తమవుతున్నాయి. మహిళా డాక్టర్ల గోప్యతకు భంగం కలిగించిన ఈ కేసులో పూర్తి విచారణ జరిపి, నిందితుడిపై కఠిన చర్యలు తీసుకోవాలని అందరూ కోరుకుంటున్నారు. కాటూరి మెడికల్ కాలేజీ యాజమాన్యం మొదట్లో ఈ విషయాన్ని గుట్టుగా ఉంచాలని ప్రయత్నించడంపై కూడా విమర్శలు వచ్చాయి. ఈ ఘటన కాలేజీ వాతావరణాన్ని.. మహిళా డాక్టర్ల భద్రత అంశాన్ని చర్చనీయాంశంగా మార్చింది.
Share
OTT Movie: షుగర్ ఫ్యాక్టరీలో చూడచక్కని దయ్యాలు... రాత్రయితే చాలు వణికిపోయే కార్మికులు
Cheteshwar Pujara: టీమిండియాలో కలకలం..అతడు సూసైడ్, యువతిపై అత్యాచారం !
