Chandrababu : అయ్యన్నపై రేప్‌ కేసు పెడతారా? ప్రభుత్వ టెర్రరిజం అంటూ చంద్రబాబు ఫైర్

Chandrababu : జలవనరుల శాఖ ఈఈని బెదిరించి అయ్యన్నపై తప్పుడు ఫిర్యాదు చేయించారని.. ప్రశ్నించిన వారిపై తప్పుడు కేసులు పెట్టి అక్రమంగా అరెస్టు చేశారని టీడీపీ అధినేత చంద్రబాబు మండిపడ్డారు.

అయ్యన్న పాత్రుడు అరెస్టు వైసీపీ అరాచక పాలనకు పరాకాష్టని.. విశాఖలో భూకబ్జాలపై పోరాడితే అరెస్టు చేస్తారా? అని చంద్రబాబు నిలదీశారు. పోలీసులు తాగి వచ్చారని.. గోడ దూకి రావాల్సిన అవసరం ఏముందని ప్రశ్నించారు. చెప్పులు కూడా వేసుకోనీయకుండా అయ్యన్నను లాక్కెళ్తారా? అని ఆగ్రహం వ్యక్తం చేశారు. వివేకా హత్యపై షర్మిల ఇచ్చిన వాంగ్మూలం, రుషికొండ అంశం నుంచి ప్రజల దృష్టి మళ్లించడానికే అయ్యన్నను అరెస్టు చేయించారన్నారు చంద్రబాబు.

హత్య చేసిన అవినాష్‌కు అభయం ఇస్తున్నారు.. ఉత్తరాంధ్ర కబ్జాలను ప్రశ్నించిన అయ్యన్నను అరెస్టు చేశారు.. వెనకబడిన వర్గాలపై కక్ష గట్టి పనిచేస్తారా? అని చంద్రబాబు నిలదీశారు. సీఐడీ ఆఫీస్‌ టార్చర్‌ ఆఫీస్‌గా మారిందని మండిపడ్డారు. నలుగురు మాజీ మంత్రులను అక్రమంగా అరెస్టు చేయించారన్నారు. .

అయ్యన్నపై రేప్‌ కేసు పెడతారా? అయ్యన్న కుటుంబంపై 12 కేసులు పెడతారా? కోర్టులు చీవాట్లు పెట్టినా వైసీపీ ప్రభుత్వానికి బుద్ధిరాలేదని చంద్రబాబు విమర్శించారు. ఇది ప్రభుత్వమే చేస్తున్న టెర్రరిజం అన్నారు.