చిత్తూరులో దారుణం.. ఇచ్చిన డబ్బులు అడిగినందుకు కారుతో గుద్ది దారుణ హత్య!

Chittoor: ఇచ్చిన డబ్బులు తిరిగి అడగడమే ఆ ఇద్దరి ప్రాణాల మీదకు తెచ్చింది. రోజువారీ పనుల కోసం బయటకు వెళ్లిన వ్యక్తులు, తిరిగి రాని లోకాలకు వెళ్తారని ఆ కుటుంబ సభ్యులు కలలైనా ఊహించలేదు. చిత్తూరు జిల్లాలో చోటుచేసుకున్న ఈ ఘోర ఘటన స్థానికంగా తీవ్ర కలకలం రేపింది.

అసలేం జరిగింది?

కార్వేటినగరం పల్లిపట్టు మార్గంలో యుగంధర్, ప్రభుదాస్ అనే వ్యక్తులు బైక్‌పై ప్రయాణిస్తుండగా, ప్రదీప్ రాజు, దిలీప్ రాజు అనే దుండగులు తమ కారుతో వారిని దారుణంగా గుద్దారు. ఈ ప్రమాదంలో యుగంధర్ అక్కడికక్కడే ప్రాణాలు కోల్పోగా.. ప్రభుదాస్ తీవ్ర గాయాలతో ఆసుపత్రిలో మృత్యువుతో పోరాడుతున్నాడు.

రూ. 3 లక్షల వివాదమే కారణం

వీరి మధ్య రూ. 3 లక్షల ఆర్థిక లావాదేవీలకు సంబంధించిన గొడవ నడుస్తున్నట్లు తెలుస్తోంది. గత వారం రోజులుగా ఈ విషయమై తీవ్ర వాగ్వాదం జరుగుతుండటంతో, శనివారం ఉదయం కార్వేటినగరం పోలీస్ స్టేషన్‌లో ఇరువర్గాలు మధ్యవర్తిత్వం చేసుకున్నారు. అయితే, స్టేషన్ నుంచి బయటకు వచ్చిన కొద్దిసేపటికే ఈ ఘోరం జరగడం గమనార్హం.

బాధితుల తీవ్ర ఆందోళన

రోడ్డు ప్రమాదం ముసుగులో పక్కా ప్లాన్ ప్రకారం ఈ హత్య చేశారని మృతుని బంధువులు ఆరోపిస్తున్నారు. స్పాట్‌లోనే మరణించినా, ఇప్పటివరకు పోలీసులు కనీసం కేసు కూడా నమోదు చేయలేదని బాధితులు కన్నీరుమున్నీరవుతున్నారు. నిందితులను వెంటనే అరెస్ట్ చేసి న్యాయం చేయాలని స్థానికులు డిమాండ్ చేస్తున్నారు.

Also Read: కరువు సవాళ్లకు చెక్ పెట్టేలా తెలంగాణ సన్నాహాలు.. ఎల్‌నినోపై మంత్రి ఉత్తమ్ సమీక్ష!