Keesara Toll Plaza Accident: ఎన్టీఆర్ జిల్లా కంచికచర్ల మండలం కీసర టోల్ ప్లాజా వద్ద నిన్న సాయంత్రం జరిగిన ఘోర రోడ్డు ప్రమాదం యావత్ రాష్ట్ర ప్రజలను దిగ్భ్రాంతికి గురిచేసింది. ఒక భారీ ఫ్లై యాష్ ట్యాంకర్ అదుపుతప్పి పక్కనే ఉన్న కారుపై బోల్తా పడటంతో ప్రముఖ న్యాయవాది వదిలూరు శ్రీనివాసరావు మృతి చెందిన ఘటనలో.. అటు డ్రైవర్ నిర్లక్ష్యం ఎంత ఉందో, ఇటు టోల్ ప్లాజా యాజమాన్యం నిర్లక్ష్యం కూడా అంతే స్పష్టంగా కనిపిస్తోంది. కేవలం డ్రైవర్‌ను మాత్రమే నిందితుడిగా చూడటం కాకుండా, టోల్ ప్లాజా వద్ద ఉన్న భద్రతా లోపాలను కూడా పరిగణనలోకి తీసుకోవాల్సిన అవసరం ఉంది.
సీసీ టీవీ ఫుటేజీని గమనిస్తే, ప్రమాదానికి గురైన ట్యాంకర్ డ్రైవర్ తీవ్రమైన అయోమయానికి (Confusion) గురైనట్లు తెలుస్తోంది. టోల్ ప్లాజా వద్ద సరైన లైన్ గైడెన్స్ లేకపోవడంతో, డ్రైవర్ మొదట ఎడమ వైపు (Left) వెళ్లి, ఆ తర్వాత వెంటనే కుడి వైపు (Right) రావడానికి ప్రయత్నించాడు. ఓవర్ స్పీడ్‌లో ఉన్న ట్యాంకర్‌ను కంట్రోల్ చేయలేక డివైడర్ ఎక్కించడంతో, అది పక్కనే ఉన్న BMW కారుపై బోల్తా పడింది. దాదాపు 60 టన్నుల బరువున్న ఆ వాహనం కింద పడటంతో కారు నుజ్జునుజ్జు అయిపోయింది. ఆ సమయంలో కారులో ఉన్న అడ్వకేట్ శ్రీనివాసరావు అక్కడికక్కడే మృతి చెందారు. అక్కడ ఒక భారీ సిమెంట్ దిమ్మ ఉండటం వల్ల అది ట్యాంకర్‌ను ఆపిందని, లేదంటే పక్కన ఉన్న మరో రెండు కార్లు కూడా ధ్వంసమై ఉండేవని ప్రత్యక్ష సాక్షులు చెబుతున్నారు.
కీసర టోల్ ప్లాజా వద్ద రోజుకు సుమారు 18,000 వాహనాలు ప్రయాణిస్తుంటాయి. ఇంత రద్దీ ఉన్న చోట కనీస భద్రతా ప్రమాణాలు పాటించడం లేదన్న విమర్శలు వస్తున్నాయి. సాధారణంగా టోల్ ప్లాజాకు సమీపించే వాహనాల వేగాన్ని నియంత్రించడానికి ‘స్పీడ్ బ్రేకర్లు’ ఏర్పాటు చేయాలి. కానీ ఇక్కడ ఎక్కడా స్పీడ్ బ్రేకర్లు కనిపించకపోవడం గమనార్హం. అలాగే, వాహనాలు టోల్ గేట్లకు వచ్చే ముందు క్రమపద్ధతిలో లోపలికి రావడానికి పొడవైన డివైడర్లు లేదా లైన్ మార్కింగ్ ఉండాలి. ఇక్కడ అటువంటి ఏర్పాట్లు లేకపోవడం వల్ల భారీ వాహనాలు ఓవర్ స్పీడ్‌తో నేరుగా టోల్ గేట్ల వద్దకు దూసుకొస్తున్నాయి.
ప్రస్తుతం నిందితుడు డ్రైవర్ ఆంటోనీ పోలీసుల అదుపులో ఉన్నాడు. ఓవర్ స్పీడ్ కారణంగానే వాహనంపై కంట్రోల్ కోల్పోయానని అతను అంగీకరించినట్లు సమాచారం. అయితే, కేవలం డ్రైవర్‌పై కేసు నమోదు చేయడమే కాకుండా, పదే పదే ప్రమాదాలకు నిలయంగా మారుతున్న కీసర టోల్ ప్లాజా నిర్వహణ తీరుపై కూడా అధికారులు దృష్టి పెట్టాలి. టోల్ దాటిన తర్వాత కూడా రోడ్డు కిరుకుగా మారడం, దుకాణాల ఆక్రమణల వల్ల ట్రాఫిక్ సమస్యలు తలెత్తడం వంటివి కూడా ప్రమాదాలకు కారణమవుతున్నాయి. నిన్నటి ఘటనలో న్యాయవాది కుటుంబానికి జరిగిన నష్టం పూడ్చలేనిది. భవిష్యత్తులో ఇలాంటివి పునరావృతం కాకుండా స్పీడ్ బ్రేకర్లు, సరైన లైన్ డివైడర్లు ఏర్పాటు చేయాలని స్థానికులు డిమాండ్ చేస్తున్నారు.
Read Also: అల్లూరి జిల్లాలో పెను విషాదం.. ఈతకు వెళ్లి ముగ్గురు బాలురు మృతి
Share
Brahma Muhurtham: బ్రహ్మముహూర్తంలో ఆ పనులు చేస్తే అదృష్టం వరిస్తుందట
CSK VS DC: నిద్ర‌పోయిన అంపైర్లు..ఒకే ఓవర్ లో 7 లీగ‌ల్ బంతులు
