గాజులు తొడుకున్నావా, అమ్మాయిలా ఏడవొద్దు, అనే పదాలకు ముగింపు చెప్పాలి: నారా లోకేష్

సమాజంలో నైతిక విలువలు క్షీణిస్తున్న ప్రస్తుత తరుణంలో మహిళల పట్ల గౌరవాన్ని పెంపొందించాల్సిన గురుతర బాధ్యత ప్రతి పౌరుడిపై ఉందని ఆంధ్రప్రదేశ్ మంత్రి నారా లోకేశ్ స్పష్టం చేశారు. కర్ణాటకలో నిర్వహించిన ఒక కార్యక్రమంలో పాల్గొన్న ఆయన మన తెలుగు వాడుక భాషలో మహిళలను తక్కువ చేసే సంస్కృతికి స్వస్తి పలకాలని పిలుపునిచ్చారు. తెలుగు సమాజంలో తెలియకుండానే మహిళలను అవమానించేలా కొన్ని పదబంధాలు నిత్యం వినిపిస్తున్నాయని లోకేశ్ ఆందోళన వ్యక్తం చేశారు.

ముఖ్యంగా ‘గాజులు తొడుక్కున్నావా?’ లేదా ‘అమ్మాయిలా ఏడవద్దు’ వంటి మాటలు మహిళల సామర్థ్యాన్ని కించపరిచేలా ఉన్నాయని ఆయన పేర్కొన్నారు. ఇటువంటి విమర్శలకు ఫుల్‌స్టాప్ పెట్టాల్సిన సమయం ఆసన్నమైందని కోరారు. నేడు మహిళలు అన్ని రంగాల్లోనూ పురుషులతో సమానంగా రాణిస్తూ అద్భుతాలు సృష్టిస్తున్నారని చెప్పారు. అటువంటి వారిని బలహీనులుగా చిత్రించడం సరికాదని హితవు పలికారు. భావితరాలకు మహిళల పట్ల సరైన గౌరవ భావాన్ని నేర్పించడం ద్వారానే ఆరోగ్యకరమైన సమాజాన్ని నిర్మించగలమని ఆయన అభిప్రాయపడ్డారు.

ప్రభుత్వ పరంగా విద్యార్థుల్లో నైతిక విలువలను పెంపొందించేందుకు ప్రముఖ ప్రవచనకర్త చాగంటి కోటేశ్వరరావు సలహాదారుగా నియమించుకున్న విషయాన్ని లోకేశ్ ఈ సందర్భంగా ప్రస్తావించారు. పిల్లలకు చిన్నతనం నుంచే సంస్కారవంతమైన విద్యను అందించడమే తమ ప్రభుత్వ ప్రధాన లక్ష్యమని తెలిపారు. చాగంటి కోటేశ్వరరావు గారు గతంలో పిల్లలకు చెప్పిన ఒక గొప్ప సూత్రాన్ని లోకేశ్ గుర్తు చేశారు. ‘నువ్వు చేసే ఏ పనైనా నీ కన్న తల్లికి ధైర్యంగా చెప్పగలగాలి. నీ తల్లికి చెప్పలేని ఏ పనిని కూడా నువ్వు చేయకూడదు’ అనే చాగంటి గారి మాటలను ఆయన ఉదహరించారు.

ఈ ఒక్క సూత్రాన్ని ప్రతి యువకుడు పాటిస్తే సమాజంలో నేరాలు గణనీయంగా తగ్గుతాయని మంత్రి ఆశాభావం వ్యక్తం చేశారు. యువత తప్పుడు మార్గాల్లో వెళ్లకుండా ఉండాలంటే అమ్మానాన్నల పట్ల గౌరవం కలిగి ఉండాలని సూచించారు. విలువలతో కూడిన సమాజ నిర్మాణంలో ఆధ్యాత్మిక ప్రవచనాల పాత్ర ఎంతో కీలకమని ఆయన కొనియాడారు. కేవలం చదువు మాత్రమే కాకుండా సంస్కారం కూడా అలవడినప్పుడే విద్యార్థులు ఉత్తమ పౌరులుగా ఎదుగుతారని లోకేశ్ ఆకాంక్షించారు. ఈ మార్పు మన ఇంటి నుంచే ప్రారంభం కావాలని ఆయన నొక్కి చెప్పారు.

ALSO READ: అమరావతిపై బొత్సా కామెంట్స్.. జగన్ కంటే క్లారిటీగా అసలు విషయం చెప్పేశారుగా!